Gold Import / ଆପଣ ସୁନା କିଣିଲେ ଡଲାର ଉପରେ ପଡ଼େ ପ୍ରଭାବ ଜାଣନ୍ତୁ କେମିତି

ଭାରତରେ ଶୁଭ କାର୍ଯ୍ୟ ହେଉ କି ପର୍ବପର୍ବାଣୀ, ସୁନା କିଣିବାକୁ ଅତ୍ୟନ୍ତ ଶୁଭ ବୋଲି ମନେ କରାଯାଏ । ବିବାହଠାରୁ ଆରମ୍ଭ କରି ଭବିଷ୍ୟତର ସଞ୍ଚୟ ପର୍ଯ୍ୟନ୍ତ ଭାରତୀୟମାନେ ବିପୁଳ ପରିମାଣରେ ସୁନା କିଣନ୍ତି । ସୁନାର ଦାମ ଯେତେ ବଢ଼ିଲେ ମଧ୍ୟ ଏହା ପ୍ରତି ଭାରତୀୟଙ୍କ ଆକର୍ଷଣ କମୁନାହିଁ । କିନ୍ତୁ ଆପଣ ଜାଣନ୍ତି କି, ଆପଣ କିଣୁଥିବା ସୁନାର ପ୍ରଭାବ କେବଳ ଆପଣଙ୍କ ପକେଟ୍‌ରେ ନୁହେଁ, ଦେଶର ଡଲାର ଚାହିଦା ଓ ବିଦେଶୀ ମୁଦ୍ରା ଭଣ୍ଡାର ଉପରେ ମଧ୍ୟ ପଡ଼ିଥାଏ ?

ଭାରତରେ ସୁନାର ଚାହିଦା ବହୁତ ଅଧିକ ହେଲେ ମଧ୍ୟ ଦେଶରେ ଏହାର ଘରୋଇ ଉତ୍ପାଦନ ଚାହିଦା ତୁଳନାରେ ବହୁତ କମ୍ । ତେଣୁ ଭାରତକୁ ଆବଶ୍ୟକତାର ବଡ଼ ଅଂଶ ସୁନା ବିଦେଶରୁ ଆମଦାନୀ କରିବାକୁ ପଡ଼େ । ଆନ୍ତର୍ଜାତୀୟ ବଜାରରେ ସୁନାର କାରବାର ସାଧାରଣତଃ ଆମେରିକୀୟ ଡଲାରରେ ହୁଏ । ବିଦେଶରୁ ସୁନା ଆଣିବା ପାଇଁ ଭାରତୀୟ ଆମଦାନୀକାରୀମାନଙ୍କୁ ଡଲାରରେ ପେମେଣ୍ଟ କରିବାକୁ ପଡ଼େ । ଏଥିପାଇଁ ସେମାନେ ଟଙ୍କା ଦେଇ ବଜାରରୁ ଡଲାର କିଣନ୍ତି ।

ବିଶେଷକରି ପର୍ବପର୍ବାଣୀ ଓ ବିବାହ ଋତୁରେ ସୁନାର ଚାହିଦା ବଢ଼ିଲେ ଡଲାରର ଚାହିଦା ମଧ୍ୟ ବଢ଼ିପାରେ । ଚାହିଦା ବଢ଼ିଲେ ଟଙ୍କା ଉପରେ ଚାପ ସୃଷ୍ଟି ହୋଇ ଡଲାର ତୁଳନାରେ ଟଙ୍କା ଦୁର୍ବଳ ହେବାର ଆଶଙ୍କା ରହେ । ଏହା ସହିତ ସୁନା ଆମଦାନୀ ବଢ଼ିଲେ ଦେଶର ବାଣିଜ୍ୟ ଘାଟତି ମଧ୍ୟ ବଢ଼ିପାରେ ।

ଟଙ୍କାର ମୂଲ୍ୟ ଉପରେ ଅଧିକ ଚାପ ପଡ଼ିଲେ ଭାରତୀୟ ରିଜର୍ଭ ବ୍ୟାଙ୍କ ଆବଶ୍ୟକତା ଅନୁସାରେ ବିଦେଶୀ ମୁଦ୍ରା ବଜାରରେ ହସ୍ତକ୍ଷେପ କରିପାରେ । ଏହାର ଅର୍ଥ, ଆମର ସୁନା ଚାହିଦାର ପରୋକ୍ଷ ପ୍ରଭାବ ଦେଶର ବିଦେଶୀ ମୁଦ୍ରା ଭଣ୍ଡାର ଉପରେ ମଧ୍ୟ ପଡ଼ିପାରେ ।

ତେବେ ସରକାର ସୁନାର ଆମଦାନୀ ଉପରେ ଶୁଳ୍କ କାହିଁକି ବଦଳାଏ ?
ସୁନା ଆମଦାନୀ ବଢ଼ିଲେ ଏହାକୁ ନିୟନ୍ତ୍ରଣ କରିବା ପାଇଁ ଶୁଳ୍କ ବଢ଼ାଇବା ଏକ ଉପାୟ । ଏଥିରେ ସୁନା ମହଙ୍ଗା ହୋଇ ଚାହିଦା କମିପାରେ । କିନ୍ତୁ ଅତ୍ୟଧିକ ଶୁଳ୍କ ଲାଗୁ କଲେ ଅବୈଧ ଚାଲାଣ ବା ସୁନା ତସ୍କରୀ ବଢ଼ିବାର ଆଶଙ୍କା ଥାଏ । ତେଣୁ ସରକାରଙ୍କ ପାଇଁ ଚ୍ୟାଲେଞ୍ଜ ହେଉଛି ସୁନାର ଚାହିଦା, ଆମଦାନୀ, ଡଲାରର ଚାହିଦା ଓ ତସ୍କରୀ ମଧ୍ୟରେ ଏକ ସନ୍ତୁଳନ ରକ୍ଷା କରିବା । ଅର୍ଥାତ୍, ଆପଣଙ୍କ ଗୋଟିଏ ଛୋଟ ସୁନା କିଣା ପଛରେ ମଧ୍ୟ ଦେଶର ଅର୍ଥନୀତି ସହ ଜଡ଼ିତ ଏକ ବଡ଼ ଗଣିତ ରହିଛି ।