Gold Price / ଏକାଥରେ ୧୦ ହଜାର ଟଙ୍କାରୁ ଅଧିକ ଶସ୍ତା ହେଲା ରୁପା, ସୁନା ଦର ବି ଖସିଲା

ସୁନା ଓ ରୁପା କିଣିବାକୁ ଅପେକ୍ଷା କରିଥିବା ସାଧାରଣ ଗ୍ରାହକଙ୍କ ପାଇଁ ଆସିଛି ଏକ ବଡ଼ ଆଶ୍ୱସ୍ତିକର ଖବର । କମୋଡିଟି ବଜାରରେ ଶୁକ୍ରବାର ରାତିରେ ହଠାତ୍ ଜୋରଦାର ବିକ୍ରି ଦେଖିବାକୁ ମିଳିଥିଲା । ଫଳରେ ସୁନା ଓ ରୁପା ଦରରେ ବଡ଼ ହ୍ରାସ ଘଟିଛି । ଗତ ୧୨ ମାସ ମଧ୍ୟରେ ଦର ସର୍ବନିମ୍ନ ସ୍ତରକୁ ଖସିଥିବା ଦାବି କରାଯାଉଛି।

ମଲ୍ଟି କମୋଡିଟି ଏକ୍ସଚେଞ୍ଜ (MCX)ରେ ରୁପା କିଲୋଗ୍ରାମ ପିଛା ୧୦,୦୦୦ ଟଙ୍କାରୁ ଅଧିକ ଶସ୍ତା ହୋଇଥିବା ବେଳେ ସୁନା ୧୦ ଗ୍ରାମ ପିଛା ୪,୦୦୦ ଟଙ୍କାରୁ ଅଧିକ ହ୍ରାସ ପାଇଛି । ତେବେ ଏହି ହଠାତ୍ ଦର ହ୍ରାସର କାରଣ କ'ଣ ? ସରାଫା ବଜାରରେ ନୂଆ ଦର କେତେ ରହିଛି ? ଆସନ୍ତୁ ଜାଣିବା ।

ଶୁକ୍ରବାର ରାତି ୮ଟାରେ ହଠାତ୍ ବଦଳିଗଲା ବଜାରର ସ୍ଥିତି
ମଲ୍ଟି କମୋଡିଟି ଏକ୍ସଚେଞ୍ଜ (MCX)ରେ ଶୁକ୍ରବାର ରାତି ପ୍ରାୟ ୮ଟା ସମୟରେ ହଠାତ୍ ବିକ୍ରି ବଢ଼ିଯାଇଥିଲା । ଡିସେମ୍ବର ଫ୍ୟୁଚର୍ସର ରୁପା ଦର ପ୍ରାୟ ୫ ପ୍ରତିଶତ ହ୍ରାସ ପାଇ କିଲୋଗ୍ରାମ ପିଛା ୧,୭୮,୯୦୦ରୁ ୧,୭୯,୦୦୦ ଟଙ୍କା ମଧ୍ୟରେ ପହଞ୍ଚିଥିଲା । ସେହିପରି MCXରେ ସୁନା ଦର ପ୍ରାୟ ୩ ପ୍ରତିଶତ ଖସି ୧୦ ଗ୍ରାମ ପିଛା ୧,୩୮,୨୫୦ରୁ ୧,୩୮,୪୦୦ ଟଙ୍କା ସ୍ତରକୁ ଆସିଥିଲା ।

ଅନ୍ତର୍ଜାତୀୟ ବଜାରରେ ବି ସୁନା ଓ ରୁପା ଦର ହ୍ରାସ
କେବଳ ଭାରତୀୟ ବଜାର ନୁହେଁ, ଅନ୍ତର୍ଜାତୀୟ ବଜାରରେ ମଧ୍ୟ ସୁନା ଓ ରୁପା ଦରରେ ବଡ଼ ହ୍ରାସ ଦେଖାଦେଇଛି । ବିଦେଶୀ ବଜାରରେ ସୁନା ଦର ୩.୩ ପ୍ରତିଶତରୁ ଅଧିକ ଖସି ପ୍ରତି ଆଉନ୍ସ ୩,୮୮୦ ଡଲାରରେ ପହଞ୍ଚିଥିଲା । ଏହା ଗତବର୍ଷ ଅକ୍ଟୋବର ପରଠାରୁ ସର୍ବନିମ୍ନ ସ୍ତର ବୋଲି କୁହାଯାଉଛି । ଅନ୍ୟପଟେ ରୁପା ଦର ମଧ୍ୟ ୫.୧୨ ପ୍ରତିଶତ ହ୍ରାସ ପାଇ ପ୍ରତି ଆଉନ୍ସ ୪୯ରୁ ୪୯.୭୦ ଡଲାର ମଧ୍ୟରେ ପହଞ୍ଚିଥିଲା ।

ସରାଫା ବଜାରରେ ୨୪, ୨୨ ଓ ୧୮ କ୍ୟାରେଟ୍ ସୁନାର ନୂଆ ଦର
ଇଣ୍ଡିଆ ବୁଲିୟନ୍ ଆଣ୍ଡ ଜୁଏଲର୍ସ ଆସୋସିଏସନ୍ (IBJA)ର ତଥ୍ୟ ଅନୁସାରେ ସୁନା ଓ ରୁପାର ଦର ନିମ୍ନଲିଖିତ ରହିଛି ।
- ୨୪ କ୍ୟାରେଟ୍ ସୁନା: ୧,୪୦,୦୦୦ ଟଙ୍କା ପ୍ରତି ୧୦ ଗ୍ରାମ ।
- ୨୨ କ୍ୟାରେଟ୍ ସୁନା: ୧,୨୮,୦୦୦ ଟଙ୍କା ପ୍ରତି ୧୦ ଗ୍ରାମ ।
- ୧୮ କ୍ୟାରେଟ୍ ସୁନା: ୧,୦୫,୦୦୦ ଟଙ୍କା ପ୍ରତି ୧୦ ଗ୍ରାମ ।
- ୯୯୯ ଶୁଦ୍ଧତାର ରୁପା: ୧,୮୧,୩୪୪ ଟଙ୍କା ପ୍ରତି କିଲୋଗ୍ରାମ ।

କାହିଁକି ହଠାତ୍ ଖସିଲା ସୁନା ଓ ରୁପା ଦର ?
ବଜାର ବିଶେଷଜ୍ଞଙ୍କ ମତରେ ସୁନା ଓ ରୁପା ଦରରେ ଏହି ବଡ଼ ହ୍ରାସ ପଛରେ ମୁଖ୍ୟତଃ ୩ଟି କାରଣ ରହିଛି ।
୧. ନିବେଶକଙ୍କ ଲାଭ ଉଠାଇବା ପାଇଁ ବିକ୍ରି (Profit Booking)
ଅଧିକ ସମୟ ଧରି ସୁନା ଓ ରୁପା ଦର ଉଚ୍ଚ ସ୍ତରରେ ରହିଥିଲା । ଏହାର ସୁଯୋଗ ନେଇ ଅନେକ ନିବେଶକ ନିଜର ଲାଭ ନିଶ୍ଚିତ କରିବା ପାଇଁ ଏକାଥରେ ବିକ୍ରି ଆରମ୍ଭ କରିଥିଲେ । ଫଳରେ ବଜାରରେ ବିକ୍ରି ଚାପ ବଢ଼ି ଦର ହ୍ରାସ ପାଇଥିଲା ।

୨. ଆମେରିକାର ଶକ୍ତିଶାଳୀ GDP ତଥ୍ୟ ଓ ଡଲାରର ମଜବୁତ ସ୍ଥିତି
ଆମେରିକାରୁ ଆସିଥିବା ଆର୍ଥିକ ତଥ୍ୟ ଆଶାଠାରୁ ଭଲ ରହିଥିଲା । ଏହା ଫଳରେ ଆମେରିକୀୟ ଡଲାର ଓ ଟ୍ରେଜେରୀ ୟିଲ୍ଡ ମଜବୁତ ହୋଇଥିଲା । ଡଲାର ଶକ୍ତିଶାଳୀ ହେବା ସାଧାରଣତଃ ସୁନା ଓ ରୁପା ଭଳି ଧାତୁର ଦର ଉପରେ ଚାପ ସୃଷ୍ଟି କରିଥାଏ ।

୩. ଆମେରିକାର ଫେଡେରାଲ୍ ରିଜର୍ଭର କଠୋର ସୁଧନୀତି ଆଶଙ୍କା
ଆମେରିକାର ଫେଡେରାଲ୍ ରିଜର୍ଭ ଅଧିକାରୀଙ୍କ ମନ୍ତବ୍ୟରୁ ସୁଧହାର ଅଧିକ ସମୟ ପର୍ଯ୍ୟନ୍ତ ଉଚ୍ଚ ରହିବାର ସଙ୍କେତ ମିଳିଥିଲା। ଏହା ଫଳରେ ନିବେଶକମାନେ ସୁନା ଓ ରୁପାରୁ ଟଙ୍କା କାଢ଼ି ଅନ୍ୟ ନିବେଶ ବିକଳ୍ପ ଆଡ଼କୁ ମୁହାଁଇଥିଲେ।

ଗ୍ରାହକଙ୍କ ପାଇଁ କ'ଣ ରହିଛି ଏହାର ଅର୍ଥ ?
ସୁନା ଓ ରୁପା ଦରରେ ଏହି ହ୍ରାସ ଗ୍ରାହକଙ୍କ ପାଇଁ ଆଶ୍ୱସ୍ତି ଆଣିପାରେ । ବିଶେଷକରି ବିବାହ ଓ ଅନ୍ୟାନ୍ୟ ଶୁଭ କାର୍ଯ୍ୟ ପାଇଁ ଗହଣା କିଣିବାକୁ ଯୋଜନା କରୁଥିବା ଲୋକଙ୍କ ପାଇଁ ଏହା ଏକ ଗୁରୁତ୍ୱପୂର୍ଣ୍ଣ ଖବର । ତେବେ ମନେ ରଖନ୍ତୁ, MCX ଓ IBJA ଦର ଏବଂ ଗହଣା ଦୋକାନର ଖୁଚୁରା ଦର ମଧ୍ୟରେ ପାର୍ଥକ୍ୟ ରହିପାରେ । ଗହଣା କିଣିବା ସମୟରେ GST, ମେକିଂ ଚାର୍ଜ ଓ ଅନ୍ୟାନ୍ୟ ଶୁଳ୍କ ମଧ୍ୟ ଯୋଡ଼ାଯାଏ । ତେଣୁ କିଣିବା ପୂର୍ବରୁ ସ୍ଥାନୀୟ ଜୁଏଲର୍ସଙ୍କଠାରୁ ସେହି ଦିନର ଦର ବୁଝନ୍ତୁ କିଣିନ୍ତୁ ।