ଜାନୁଆରୀ ୨୯ ତାରିଖରେ ସର୍ବକାଳୀନ ରେକର୍ଡ ଛୁଇଁଥିଲା ୨୪ କ୍ୟାରେଟ୍ ସୁନାର ଦର । ହେଲେ ଚାରିଦିନ ଭିତରେ ୩୫ ହଜାର ଟଙ୍କା କମିଲାଣି । ଆଜି ଗୋଟିଏ ଦିନରେ ଦୁଇଥର କମି ସଂଧ୍ୟା ସୁଦ୍ଧା ୧ ଲକ୍ଷ ୪୭ ହଜାର ୧୬୦ ଟଙ୍କାରେ ପହଞ୍ଚିଛି । ଦର କମ ରହିଥିବାରୁ ବର୍ତ୍ତମାନ ସୁନା ଗହଣା କିଣିବାକୁ ବ୍ୟବସାୟୀ କହୁଛନ୍ତି । ହେଲେ କମୋଡିଟି ଏକ୍ସଚେଞ୍ଜ ମାର୍କେଟରେ ଅସ୍ଥିରତା ଲାଗିରହିଛି । ତେଣୁ ସୁନାରେ ଦେଖି ଚାହିଁ ନିବେଶ କରବାକୁ ପରାମର୍ଶ ଦେଇଛନ୍ତି ବଜାର ବିଶେଷଜ୍ଞ । ଏପଟେ ୪ ଲକ୍ଷ ଟଙ୍କା ଛୁଇଁଥିବା ରୁପା ମୂଲ୍ୟ ମଧ୍ୟ ୨ ଲକ୍ଷ ୬୦ ହଜାର ଟଙ୍କାକୁ ଖସିଆସିଛି ।

ସୂଚନାନୁଯାୟୀ ଲଗାତର ଉପରମୁହାଁ ଥିବା ସୁନା ଦର ଗତ ୪ଦିନ ହେଲା ଅଚାନକ୍ ତଳକୁ ଖସିବାରେ ଲାଗିଛି । ଏପରିକି ଆଜି ଗୋଟିଏ ଦିନରେ ଦୁଇ ଦୁଇଥର ଖସିଛି ସୁନାର ବଜାର ମୂଲ୍ୟ । ସକାଳେ ୨୪ କ୍ୟାରେଟ୍ ସୁନାର ୧୦ ଗ୍ରାମ୍ ପିଛା ଦର ଖସି ୧ ଲକ୍ଷ ୫୧ ହଜାର ୫୩୦ ଟଙ୍କାରେ ପହଞ୍ଚିଥିଲା । ପୁଣି ସଂଧ୍ୟା ସୁଦ୍ଧା ଦର ଆହୁରି ଖସି ୧ ଲକ୍ଷ ୪୭ ହଜାର ୧୬୦   ଟଙ୍କାରେ ପହଞ୍ଚିଛି ।

ସମାନ ଢଙ୍ଗରେ ୨୨ କ୍ୟାରେଟ୍ ସୁନାର ଦର ମଧ୍ୟ ଆଜି ସକାଳୁ ତଳମୁହାଁ ହୋଇଛି । ସକାଳେ ୧୦ ଗ୍ରାମ ପିଛା ଦର ଖସି ୧ ଲକ୍ଷ ୩୮ ହଜାର ୯୦୦ ଟଙ୍କା, ଯାହା ସଂଧ୍ୟା ସୁଦ୍ଧା ଆହୁରି ନିମ୍ନଗାମୀ ହୋଇ ୧ ଲକ୍ଷ ୩୪ ହଜାର ୯୦୦ ଟଙ୍କାରେ ବନ୍ଦ ହୋଇଛି ।

ରୂପାର କିଲୋପିଛା ଦର ମଧ୍ୟ ଆଜି ସଂଧ୍ୟା ସୁଦ୍ଧା ଖସି ୨ ଲକ୍ଷ ୬୦ ହଜାରରେ ପହଞ୍ଚିଛି । ଉଭୟ ସୁନା ଓ ରୁପା ଦର ଖସିବା ପରେ ଗ୍ରାହକ, ବ୍ୟବସାୟୀ ସମସ୍ତେ ଉତ୍ସାହିତ ହୋଇପଡ଼ିଛନ୍ତି । ତଥାପି ସୁନା ଦର ସାଧାରଣ ଗ୍ରାହକଙ୍କୁ ବାଧୁଥିବାରୁ ବିଭିନ୍ନ ସ୍କିମ ଜରିଆରେ ସୁନା ଗହଣା କରିବାକୁ ପରାମର୍ଶ ଦେଉଛନ୍ତି ବ୍ୟବସାୟୀ ।

୨୯ ଜାନୁଆରୀରେ ସର୍ବକାଳୀନ ରେକର୍ଡ ୧ ଲକ୍ଷ ୮୩ ହଜାର ଛୁଇଁଥିବା ସୁନା ଦର ଗତ ଚାରିଦିନ ହେଲା ଲଗାତର ଖସିଚାଲିଛି । ନଜର ପକାନ୍ତୁ ଏହି ତଥ୍ୟ ଉପରେ -
ଲଗାତର ୪ ଦିନ ହେଲା ଖସୁଛି ସୁନା
୨୪ କ୍ୟାରେଟ୍ ସୁନାର ଦର (୧୦ ଗ୍ରାମ୍)
୩୦ ଜାନୁଆରୀ- ୧ ଲକ୍ଷ ୭୫ ହଜାର ଟଙ୍କା
୩୧ ଜାନୁଆରୀ- ୧ ଲକ୍ଷ ୬୫ ହଜାର ୭୯୫ ଟଙ୍କା
୧ ଫେବ୍ରୁଆରୀ- ୧ ଲକ୍ଷ ୬୦ ହଜାର ୫୮୦ ଟଙ୍କା
୨ ଫେବ୍ରୁଆରୀ- ୧ ଲକ୍ଷ ୪୭ ହଜାର ୧୬୦   ଟଙ୍କା

ସ୍ବାଭାବିକ ଭାବେ ପ୍ରଶ୍ନ ଉଠୁଛି ପ୍ରତିଦିନ ବଢ଼ି ଚାଲିଥିବା ସୁନା ଓ ରୁପାର ଦର ଅଚାନକ କାହିଁକି ଶସ୍ତା ହେଉଛି ।

କାହିଁକି ଖସୁଛି ସୁନା ଓ ରୁପା ଦର?
ଫେଡେରାଲ ରିଜର୍ଭରେ କେଭିନ ୱାର୍ସଙ୍କ ନିଯୁକ୍ତି ଘୋଷଣା ପରେ ବଢ଼ିଛି ଡଲାର ମୂଲ୍ୟ । 
ଅନ୍ତର୍ଜାତୀୟ ବଜାରରେ ଡଲାର ମଜଭୁତ ହେଲେ କମେ ସୁନା ଓ ରୁପାର ଚାହିଦା ।
ପ୍ରଫିଟ ବୁକିଂ ବା ଅଧିକ ଲାଭ ଆଶାରେ ସୁନା, ରୁପା ବିକ୍ରି କରୁଛନ୍ତି ବଡ଼ ନିବେଶକ ।
ଅନ୍ତର୍ଜାତୀୟ ଏକ୍ସଚେଞ୍ଜ ଟ୍ରେଡିଂ ପାଇଁ ମାର୍ଜିନ ବଢାଇବାରୁ ନଗଦ ଆବଶ୍ୟକ କରୁଛନ୍ତି ନିବେଶକ ।
ବଜେଟରେ ସୁନା, ରୁପାରେ ଆମଦାନୀ ଶୁଳ୍କ କମିଲା ନାହିଁ ତେଣୁ ବିକ୍ରି ବଢ଼ିଯାଇଛି ।
ଘରୋଇ ବଜାରରେ ଗହଣା କିଣାକିଣି କମିଗଲା ଓ ଚାହିଦା କମିବାରୁ ଦର ଖସିଲା । 

ଦର କମିଥିବାରୁ ବର୍ତ୍ତମାନ ସମୟରେ ସୁନା, ରୁପା କିଣାକିଣି କରିବାକୁ ବ୍ୟବସାୟୀ ପରାମର୍ଶ ଦେଉଛନ୍ତି । ହେଲେ କମୋଡିଟି ଏକ୍ସଚେଞ୍ଜ ମାର୍କେଟରେ ଅସ୍ଥିରତା ଲାଗି ରହିଥିବାରୁ ବର୍ତ୍ତମାନ ସୁନା, ରୁପାରେ ଦେଖିଚାହିଁ ନିବେଶ କରିବାକୁ ପରାମର୍ଶ ଦେଉଛନ୍ତି ବଜାର ବିଶେଷଜ୍ଞ ।