ଅର୍ଗସ ବ୍ୟୁରୋ: ଆଫ୍ରିକୀୟ ଦେଶ ନାଇଜେରିଆର ଉତ୍ତର-ପଶ୍ଚିମ ରାଜ୍ୟ ଜମ୍ଫାରାରେ ସେନାର ଏୟାର ଷ୍ଟ୍ରାଇକ୍ । ରବିବାର ସେନା କରିଥିବା ଏୟାର ଷ୍ଟ୍ରାଇକ୍‌ରେ ୧୬ ଜଣଙ୍କ ମୃତ୍ୟୁ ହୋଇଛି । ଖବର ଅନୁସାରେ, ପାଇଲଟ୍ ସ୍ଥାନୀୟ ଲୋକଙ୍କୁ ଅପରାଧୀ ଗ୍ୟାଙ୍ଗ ଭାବି ଭୁଲ୍ ବଶତଃ ଗୁଳିମାଡ଼ କରିଛନ୍ତି । ଏହି ଅଞ୍ଚଳରେ ନାଇଜେରିଆ ସେନା ଦୀର୍ଘଦିନ ହେଲା ଅପରାଧୀ ଗ୍ୟାଙ୍ଗଙ୍କ ସହ ଲଢ଼ି ଆସୁଛି । ସ୍ଥାନୀୟ ଅଞ୍ଚଳରେ ଏହି ଗ୍ୟାଙ୍ଗକୁ ଡାକୁ କୁହାଯାଏ ।

ଗ୍ୟାଙ୍ଗର ସଦସ୍ୟ ଗାଁ ଉପରେ ଆକ୍ରମଣ କରି ଲୁଟ୍‌ପାଟ୍ କରିବା ସହ ଲୋକଙ୍କୁ ଅପହରଣ କରି ନିଅନ୍ତି । ଏପରିକି ଅପହରଣ ପରେ ଘରେ ନିଆଁ ମଧ୍ୟ ଲଗାଇ ଦେଇଥାନ୍ତି । ଯେଉଁଥିପାଇଁ ସେ ଅଞ୍ଚଳରେ ରହୁଥିବା ସାଧାରଣ ଲୋକ ନିଜ ସୁରକ୍ଷା ଲାଗି ବନ୍ଧୁକ ରଖି ଅପରାଧୀଙ୍କ ମୁକାବିଲା କରିଥାନ୍ତି ।

ଶନିବାର ମଧ୍ୟ ଜମ୍ଫାରାର ଡାଙ୍ଗେଵେ ଗାଁ ଉପରେ ଗ୍ୟାଙ୍ଗ ଆକ୍ରମଣ କରି ଗୃହ ପାଳିତ ପଶୁଙ୍କୁ ନେଇ ଯାଇଥିଲା । ଏହା ପରେ ଗ୍ରାମବାସୀ ମଧ୍ୟ ଗ୍ୟାଙ୍ଗ ଉପରକୁ ଗୁଳିମାଡ଼ କରିଥିଲେ । ଆଉ ସେହି ସମୟରେ ସେନାର ଯୁଦ୍ଧ ବିମାନ ତୁଙ୍ଗର କାରା ନିକଟରେ ଗୁଳିମାଡ଼ କରିଛି । ଯେଉଁଥିରେ ପ୍ରାୟ ୧୬ ଜଣ ଗ୍ରାମବାସୀଙ୍କ ମୃତ୍ୟୁ ହୋଇଥିବା କୁହା ଯାଉଛି ।

ତେବେ ନାଇଜେରିଆରେ ସେନାର ଏଭଳି ଆକ୍ରମଣ ନୂଆ ନୁହେଁ । ଏହା ପୂର୍ବରୁ ବି ସେନା ସାଧାରଣ ଲୋକଙ୍କ ଉପରେ ଏଭଳି ବର୍ବରୋଚିତ ଆକ୍ରମଣ କରିଛି । ୨୦୨୩ରେ ମଧ୍ୟ ନାଇଜେରିଆ ସେନା ଭୁଲ୍ ବଶତଃ କଡ୍ଡନା ରାଜ୍ୟର ଧାର୍ମିକ ସଭା ଉପରେ ବିମାନରୁ ଗୁଳି ବର୍ଷା କରିଥିଲା । ଯେଉଁଥିରେ ୮୫ ଜଣଙ୍କ ଜୀବନ ଯାଇଥିଲା । ଏହାଛଡ଼ା ୨୦୧୭ରେ ଏକ ଶରଣାର୍ଥୀ ଶିବିର ଉପରେ ବିମାନରୁ ହୋଇଥିବା ଆକ୍ରମଣରେ ଆଖି ବୁଜିଥିଲେ ୧୧୨ ଜଣ ।

Argus News | argus news | -Argusnews Home: Odisha Latest News, Breaking News, Trending News, Live TV and more