61 ବର୍ଷରେ ଦ୍ୱିତୀୟ ବିବାହ କରିବେ ଆମାଜନର ଫାଉଣ୍ଡର୍ ଜେଫ୍ ବେଜୋସ୍ । ମଝି ସମୁଦ୍ରରେ ବାହା ହେବେ ବିଶ୍ୱର ଦ୍ୱିତୀୟ ଧନୀ ବ୍ୟକ୍ତି ଜେଫ୍ ବେଜୋସ୍ ଓ ଫିଅନ୍ସି ଲରେନ୍ ସାନଚେତ୍ । 2019ରେ ପ୍ରଥମ ପତ୍ନୀ ମ୍ୟାକେଞ୍ଜି ସ୍କଟ୍ ଙ୍କୁ ଛାଡପତ୍ର ଦେଇଥିଲେ ବେଜୋସ୍ । ବିବାହର 25 ବର୍ଷ ପରେ ତାଙ୍କୁ ଛାଡପତ୍ର ଦେବା ପରେ ଏବେ ପୁଣି ଥରେ ବାହା ହେବାକୁ ଯାଉଛନ୍ତି ଆମାଜନ ଫାଉଣ୍ଡର୍ ।

ବେଜୋସ୍ ଙ୍କ ଫିଅନ୍ସି ଲରେନ୍ ସାନଚେତ୍ ହେଉଛନ୍ତି ଜଣେ ଉଦ୍ୟୋଗପତି । ତାଙ୍କ ବିବାହ ନେଇ ଖୁବ୍ ଚର୍ଚ୍ଚା ହେଉଥିବାବେଳେ ଚଳିତ ବର୍ଷ ଶେଷ ଆଡକୁ ସେ ବାହା ହେବା ନେଇ ସୂଚନା ମିଳିଛି । ବିଳାସପୂର୍ଣ୍ଣ ଜାହାଜ "କୋରୁ"ରେ ଅନୁଷ୍ଠିତ ହେବ ବିବାହ । ଆଉ ବିବାହରେ ଖର୍ଚ୍ଚ ହେବ 5000 କୋଟିରୁ ଉର୍ଦ୍ଧ୍ୱ ଟଙ୍କା । 'କୋରୁ' ବିଶ୍ୱର ସବୁଠୁ ବଡ ବିଳାସପୂର୍ଣ୍ଣ ଜାହାଜ । ଏହାର ମେଣ୍ଟେନାନ୍ସରେ ଖର୍ଚ୍ଚ ହୁଏ କୋଟି କୋଟି ଟଙ୍କା । ଖବର ଅନୁଯାୟୀ ବିବାହ ପାଇଁ "କୋରୁ" ଇଟାଲୀୟ ଉପକୂଳ ନିକଟରେ ଲାଗି ରହିବ । ବିବାହର ସଠିକ୍ ତାରିଖ ଏପର୍ଯ୍ୟନ୍ତ ସାର୍ବଜନୀନ କରାଯାଇ ନାହିଁ ।

କୋରୁ ଏକ ଚମତ୍କାର ଏବଂ ଅତ୍ୟାଧୁନିକ ଭାସମାନ ପ୍ରାସାଦ ସଦୃଶ । ଏହା 2023 ମସିହାରେ ଡଚ୍ ଜାହାଜ କମ୍ପାନୀ ଓସେନକୋ ଦ୍ୱାରା ନିର୍ମିତ ହୋଇଥିଲା ଏବଂ ଏହା ବିଶ୍ୱର ସବୁଠାରୁ ବଡ଼ ନୌବାହନ ୟାଟ୍ ମଧ୍ୟରୁ ଗୋଟିଏ ।

କୋରୁ ନାମଟି ମାଓରି ଭାଷାରୁ ଆସିଛି, ଯାହାର ଅର୍ଥ "ନୂତନ ଆରମ୍ଭ"। କୋରୁ 127 ମିଟର (ପ୍ରାୟ 417 ଫୁଟ) ଲମ୍ବା। ଏହାର ବାହ୍ୟ ଡିଜାଇନ୍ ଶାସ୍ତ୍ରୀୟ ଏବଂ ଆଧୁନିକ ଶୈଳୀର ମିଶ୍ରଣ । କାଠ ଏବଂ ଇସ୍ପାତକୁ ମିଶାଇ ଏହାକୁ ଡିଜାଇନ କରାଯାଇଛି । କୋରୁର ଆନୁମାନିକ ମୂଲ୍ୟ 500 ନିୟୁତ ଆମେରିକୀୟ ଡଲାର (ପ୍ରାୟ 4,000 କୋଟି ଟଙ୍କା) ।

କୋରୁରେ ଏକାଧିକ କୋଠରୀ ରହିଛି । ଡାଇନିଂ ଏରିଆ ଏବଂ ଲାଉଞ୍ଜ ମଧ୍ୟ ରହିଛି । ଏଥିରେ ଏକ ବଡ଼ ସୁଇମିଂ ପୁଲ୍ ଅଛି । ଏହା ବିଶ୍ୱର ସବୁଠାରୁ ମହଙ୍ଗା ୟାଟ୍ ମଧ୍ୟରୁ ଗୋଟିଏ । ଏହାର ରକ୍ଷଣାବେକ୍ଷଣ ଏବଂ ପରିଚାଳନା ପାଇଁ ବାର୍ଷିକ କୋଟି କୋଟି ଟଙ୍କା ମଧ୍ୟ ଖର୍ଚ୍ଚ ହୁଏ।