ନାଚଗୀତ ଚାଲିଥିବା ବେଳେ ନାଇଟ୍ କ୍ଲବରେ ବ୍ୟାପିଗଲା ନିଆଁ, ୫୦ ଦଗ୍ଧ
ରବିବାର ଉତ୍ତର ମାସେଡୋନିଆର ଏକ ନାଇଟ୍ କ୍ଲବରେ ବଡ଼ଧରଣର ଅଗ୍ନିକାଣ୍ଡ ହୋଇଛି । କୋକାନି ସହରରେ ଥିବା ଏକ ନାଇଟ୍ କ୍ଲବରେ ନିଆଁ ଲାଗି ଚାଲି ଯାଇଛି ୫୦ରୁ ଅଧିକ ଜୀବନ । ଅଗ୍ନିକାଣ୍ଡରେ ପ୍ରାୟ ୧୦୦ ଜଣ ଆହତ ହୋଇଥିବା ଜଣାପଡ଼ିଛି ।
ଏହି ଅଗ୍ନିକାଣ୍ଡ ଉତ୍ତର ମାସେଡୋନିଆର ରାଜଧାନୀ ସ୍କୋପଜେ ଠାରୁ ପ୍ରାୟ ୧୦୦ କିଲୋମିଟର ଦୂରରେ ଘଟିଛି । ସୂଚନା ଅନୁସାରେ ବିଳମ୍ବିତ ରାତି ପ୍ରାୟ ୨ଟାରେ ନାଇଟ୍ କ୍ଲବରେ ନିଆଁ ଲାଗିଥିଲା । ଉକ୍ତ ନାଇଟ୍ କ୍ଲବରେ ଚର୍ଚ୍ଚିତ ହିପ୍-ହାଁପ୍ ଯୋଡ଼ିଆ ଏଡିଏଏନ୍ଙ୍କ କାର୍ଯ୍ୟକ୍ରମ ଚାଲିଥିଲା । ଆଉ ଉକ୍ତ କାର୍ଯ୍ୟକ୍ରମରେ ୧୫୦୦ରୁ ଅଧିକ ସାମିଲ୍ ହୋଇଥିଲେ ।
ମିଳିଥିବା ସୂଚନା ଅନୁସାରେ, ଅଗ୍ନିକାଣ୍ଡର ଦୀର୍ଘ ଘଣ୍ଟା ନିଆଁ ଆୟତ୍ତକୁ ଆସି ନଥିଲା । ଏପରିକି ଅଗ୍ନିଶମ ବାହିନୀ ପହଞ୍ଚିବା ବେଳକୁ ଏକାଧିକ ବ୍ୟକ୍ତି ପ୍ରାଣ ହରାଇ ସାରିଥିଲେ । ଆହତଙ୍କ ମଧ୍ୟରୁ ଅଧିକାଂଶଙ୍କ ଅବସ୍ଥା ସଙ୍କଟାପନ୍ନ ଥିବାରୁ ସେମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି ।
ପ୍ରାଥମିକ ତଦନ୍ତରୁ ଜଣାପଡ଼ିଛି, କାର୍ଯ୍ୟକ୍ରମ ବେଳେ ବ୍ୟବହାର କରାଯାଇଥିବା ପାୟରୋଟେକ୍ନିକ (ଏକ ପ୍ରକାର ବାଣ) ପାଇଁ ଏହି ନିଆଁ ଲାଗିଥିଲା । ଅଗ୍ନିକାଣ୍ଡର ଭାଇରାଲ୍ ଭିଡିଓରେ ଦେଖା ଯାଉଛି, ଷ୍ଟେଜରୁ ଛିଟିକି ପଡ଼ୁଥିବା ନିଆଁ ଖଣ୍ଡରୁ ଚାରିଆଡ଼େ ନିଆଁ ବ୍ୟାପି ଯାଉଛି । ଜୀବନ ବିକଳରେ ଯିଏ, ଯେଉଁଆଡ଼େ ପାରିଲେ ଦୌଡ଼ୁଛନ୍ତି । ସ୍ଥାନୀୟ ପ୍ରଶାସନ ଅଗ୍ନିକାଣ୍ଡ କିଭଳି, କେଉଁ ପରିସ୍ଥିତିରେ ଘଟିଲା ଯାଞ୍ଚ କରୁଛି ।
