ଅର୍ଗସ ବ୍ୟୁରୋ: ଗତ ମଙ୍ଗଳବାର ଠାରୁ ଲାଗିଥିବା ନିଆଁ ଆହୁରି ବ୍ୟାପି ଚାଲିଛି । କବଳିତ କରୁଛି ଗୋଟିଏ ପରେ ଗୋଟିଏ ଜଙ୍ଗଲ । ଆକଳନ ଅନୁସାରେ, କାଲିଫର୍ଣ୍ଣିଆର ପ୍ରାୟ ୧୬୦ ସ୍କୋୟାର କିଲୋମିଟର ଅଞ୍ଚଳକୁ ବ୍ୟାପି ଗଲାଣି ବନାଗ୍ନି । ଆଉ ଏହି ନିଆଁରେ ଏଯାବତ୍ ୨୪ ଜଣଙ୍କ ମୃତ୍ୟୁ ହୋଇଥିବା ଜଣାପଡ଼ିଛି । ମୃତକଙ୍କ ମଧ୍ୟରେ ଅଛନ୍ତି ଅଷ୍ଟ୍ରେଲୀୟ ଟିଭି ଅଭିନେତା ରୋରି ସାଇକ୍ସ ।

ଯଦିଓ ଏବେ ବି ଅଗ୍ନିକାଣ୍ଡର କାରଣ ଜଣାପଡ଼ି ନାହିଁ ତଥାପି ଏହି ନିଆଁ ଆମେରିକା ଇତିହାସରେ ସବୁଠୁ ବ୍ୟୟ ବହୁଳ ସାବ୍ୟସ୍ତ ହେବ ବୋଲି କୁହା ଯାଉଛି । ଆକ୍ୟୁୱେଦରର ପ୍ରାଥମିକ ଆକଳନ ଅନୁସାରେ, ନିଆଁରେ ପ୍ରାୟ ୧୩୫ରୁ ୧୫୦ ବିଲିଅନ୍ ଆମେରିକୀୟ ଡଲାର ମୂଲ୍ୟର କ୍ଷୟକ୍ଷତି ହୋଇଛି । ପ୍ରାୟ ୧୨ ହଜାର କୋଠା କ୍ଷତିଗ୍ରସ୍ତ ହୋଇଛି ।

ଜଙ୍ଗଲରେ ଲାଗିଥିବା ନିଆଁ ଯୋଗୁଁ ଲୋକଙ୍କ ବଞ୍ଚିବା ଅସହ୍ୟ ହୋଇ ଗଲାଣି । ପେସିଫିକ୍ ପାଲିସେଡସ୍ ଓ ଅଲ୍ଟାଡେନା ଅଞ୍ଚଳରୁ ଲୋକଙ୍କୁ ଅନ୍ୟତ୍ର ସ୍ଥାନାନ୍ତର କରାଯାଇଛି । ପ୍ରାୟ ଦେଢ଼ ଲକ୍ଷ ଲୋକଙ୍କୁ ସ୍ଥାନାନ୍ତର କରାଯାଇଥିବା ବେଳେ ୯ଟି ଶରଣାର୍ଥୀ ଶିବିରରେ ୭୦୦ରୁ ଅଧିକ ଲୋକ ଆଶ୍ରୟ ନେଇଛନ୍ତି । ରବିବାର କାଲିଫର୍ଣ୍ଣିଆ ଅଗ୍ନିଶମ ବାହିନୀ ଦେଇଥିବା ତଥ୍ୟ ଅନୁସାରେ, ପାଲିସେଡସ୍‌ରେ ଲାଗିଥିବା ନିଆଁର ୧୧ ପ୍ରତିଶତ ଓ ଇଟନ୍‌ର ୨୭ ପ୍ରତିଶତ ନିଆଁ ଆୟତ୍ତକୁ ଆସିଛି ।

ରବିବାର ସକାଳ ସୁଦ୍ଧା କାଲିଫର୍ଣ୍ଣିଆରେ ପ୍ରାୟ ୭୦ ହଜାର ଉପଭୋକ୍ତା ଅନ୍ଧାରରେ ଅଛନ୍ତି । ନିଆଁ ଲାଗି ବିଦ୍ୟୁତ୍ ସଂଯୋଗ କାଟି ଦିଆ ଯାଇଛି । ଲସ୍ ଆଞ୍ଜେଲସ୍‌ରେ ବି ସମାନ ସ୍ଥିତି । ପାଣିପାଗ ବିଭାଗର ଆକଳନ ଅନୁସାରେ, ଆଗକୁ ସାନ୍ତା ଆନା ପବନ ବହିପାରେ । ଯେଉଁଥି ଲାଗି ବୁଧବାର ପର୍ଯ୍ୟନ୍ତ ରେଡ୍ ଆଲର୍ଟ ଜାରି ହୋଇଛି । ପବନ ବହିଲେ ନିଆଁ ଆହୁରି ଅଧିକ ବ୍ୟାପିବା ଆଶଙ୍କା ରହିଛି ।