China Gold Buying / ଚୀନର ସୁନା ପ୍ରେମ... ୨୨ ମାସ ଧରି କିଣା ଚାଲିଛି ସୁନା

ସୁନା ପ୍ରତି ଚୀନର ଆଗ୍ରହ କମିବାର ନାଁ ନେଉନାହିଁ । ନିଜର ଗୋଲ୍ଡ ରିଜର୍ଭକୁ ଲଗାତାର ବଢ଼ାଇ ଚାଲିଛି ଚୀନ । ଭାରତ ଓ ଚୀନ ଭଳି ବଡ଼ ଅର୍ଥନୀତିଗୁଡ଼ିକ ଗତ କିଛି ବର୍ଷ ଧରି ସୁନା କିଣୁଥିବା ବେଳେ ଭାରତର କିଣା ପରିମାଣରେ କିଛି ହ୍ରାସ ଦେଖାଯାଇଛି । କିନ୍ତୁ ଚୀନ ନିଜର ସୁନା ଭଣ୍ଡାର ବଢ଼ାଇବା ଜାରି ରଖିଛି ।
ଅଗଷ୍ଟରେ କିଣିଲା ୨୦.୨ ଟନ୍ ସୁନା

ପିପୁଲ୍ସ ବ୍ୟାଙ୍କ ଅଫ୍ ଚାଇନା (PBOC) ଅଗଷ୍ଟ ୨୦୨୬ରେ ନିଜ ଗୋଲ୍ଡ ରିଜର୍ଭରେ ପ୍ରାୟ ୬,୫୦,୦୦୦ ଆଉନ୍ସ ବା ପ୍ରାୟ ୨୦.୨ ଟନ୍ ସୁନା ଯୋଡ଼ିଛି । ଅକ୍ଟୋବର ୨୦୨୩ ପରେ ଗୋଟିଏ ମାସରେ ଚୀନର ଏହା ସବୁଠାରୁ ବଡ଼ ସୁନା କିଣା ବୋଲି କୁହାଯାଉଛି ।

ସବୁଠାରୁ ଖାସ କଥା ହେଉଛି, ଅଗଷ୍ଟ ମାସରେ ବିଶ୍ୱ ବଜାରରେ ସୁନା ଦର ପ୍ରାୟ ୧୦ ପ୍ରତିଶତ ବଢ଼ିଥିଲା । ସାଧାରଣତଃ ସୁନା ଦର ଦ୍ରୁତ ବଢ଼ିଲେ କେନ୍ଦ୍ରୀୟ ବ୍ୟାଙ୍କଗୁଡ଼ିକ କିଣାକୁ ଧୀମା କରିଥାନ୍ତି । କିନ୍ତୁ ଚୀନ ଦର ବୃଦ୍ଧିକୁ ଖାତିର ନକରି ନିଜର ସୁନା କିଣା ଜାରି ରଖିଛି ।

ଲଗାତାର ୨୨ ମାସ ଧରି କିଣୁଛି ଚୀନ
PBOCର ତଥ୍ୟ ଅନୁସାରେ, ଅଗଷ୍ଟରେ ଆଉ ୨୦.୨ ଟନ୍ ସୁନା କିଣିବା ପରେ ଚୀନର ମୋଟ ଅଧିକାରିକ ଗୋଲ୍ଡ ରିଜର୍ଭ ରେକର୍ଡ ୨,୩୮୬.୬ ଟନ୍‌ରେ ପହଞ୍ଚିଛି । ଅର୍ଥାତ୍ ପ୍ରାୟ ୭୬.୭୩ ମିଲିୟନ୍ ଆଉନ୍ସ ସୁନା ଚୀନ ପାଖରେ ରହିଛି ।

ଚୀନର କେନ୍ଦ୍ରୀୟ ବ୍ୟାଙ୍କ ଲଗାତାର ୨୨ ମାସ ଧରି ସୁନା କିଣୁଛି । ଡଲାର ମୂଲ୍ୟରେ ଦେଖିଲେ, ଅଗଷ୍ଟ ଶେଷ ସୁଦ୍ଧା ଚୀନ ପାଖରେ ଥିବା ସୁନାର ମୂଲ୍ୟ ପ୍ରାୟ ୩୫୦.୦୮ ବିଲିୟନ୍ ଡଲାର ଥିଲା । ଜୁଲାଇରେ ଏହା ପ୍ରାୟ ୩୦୬.୩୫ ବିଲିୟନ୍ ଡଲାର ଥିଲା ।

କାହିଁକି ଏତେ ସୁନା କିଣୁଛି ଚୀନ ?
ଆର୍ଥିକ ବିଶ୍ଳେଷକମାନଙ୍କ ମତରେ, ଚୀନ କୌଣସି ତୁରନ୍ତ ଲାଭ ପାଇଁ ଏଭଳି ସୁନା କିଣୁନାହିଁ । ଏହା ଏକ ଦୀର୍ଘମିଆଦୀ ରଣନୀତିର ଅଂଶ । ନିଜର ବିଦେଶୀ ମୁଦ୍ରା ଭଣ୍ଡାରରେ ଡଲାର ଉପରେ ନିର୍ଭରଶୀଳତା କମାଇ ସୁନାର ଅଂଶ ବଢ଼ାଇବା ଚୀନର ଲକ୍ଷ୍ୟ ବୋଲି ବିଶ୍ଳେଷଣ କରାଯାଉଛି ।

ଅଗଷ୍ଟ ୨୦୨୬ରେ ଆମେରିକାର ଅର୍ଥ ବିଭାଗ ଦୀର୍ଘମିଆଦୀ ସରକାରୀ ବଣ୍ଡ୍‌ର ବାୟବ୍ୟାକ୍ ବଢ଼ାଇବା ନେଇ ଅପ୍ରତ୍ୟାଶିତ ପଦକ୍ଷେପ ନେଇଥିଲା । ଏହା ପରେ ଡଲାରର ମୂଲ୍ୟ ଏବଂ ବିଶ୍ୱସ୍ତରରେ ମୁଦ୍ରାର ମୂଲ୍ୟହ୍ରାସକୁ ନେଇ ଚିନ୍ତା ବଢ଼ିଥିଲା । ଏଭଳି ପରିସ୍ଥିତିରେ ଚୀନ ସୁନାକୁ ଏକ ବିକଳ୍ପ ଏବଂ ଅଧିକ ସୁରକ୍ଷିତ ସମ୍ପତ୍ତି ଭାବେ ଦେଖୁଥିବା କୁହାଯାଉଛି ।

ରୁଷିଆଠାରୁ ଶିକ୍ଷା ନେଇଛି ଚୀନ ?
ୟୁକ୍ରେନ୍ ଯୁଦ୍ଧ ପରେ ରୁଷିଆ ଉପରେ ପଶ୍ଚିମ ଦେଶଗୁଡ଼ିକ ଲଗାଇଥିବା ଆର୍ଥିକ କଟକଣା ଚୀନ ପାଇଁ ଏକ ବଡ଼ ଶିକ୍ଷା ବୋଲି ଦେଖାଯାଉଛି । ଡଲାର ଓ ୟୁରୋ ଭଳି ବିଦେଶୀ ମୁଦ୍ରା ଭଣ୍ଡାରକୁ ଆବଶ୍ୟକ ପଡ଼ିଲେ ଫ୍ରିଜ୍ କରାଯାଇପାରେ ବୋଲି ଚୀନ ବୁଝିଛି ।

ସରଳ ଭାଷାରେ କହିଲେ, ଡଲାର କିମ୍ବା ଡିଜିଟାଲ୍ ବଣ୍ଡ୍‌ ଆକାରରେ ବିଦେଶୀ ମୁଦ୍ରା ଭଣ୍ଡାର ରଖିଲେ ଏହା ଆନ୍ତର୍ଜାତିକ ବ୍ୟାଙ୍କିଂ ବ୍ୟବସ୍ଥା ମାଧ୍ୟମରେ ଚାଲିଥାଏ । ଭବିଷ୍ୟତରେ ଯଦି ଚୀନ ଓ ଆମେରିକା ମଧ୍ୟରେ ବଡ଼ ରାଜନୈତିକ କିମ୍ବା ସାମରିକ ଉତ୍ତେଜନା ସୃଷ୍ଟି ହୁଏ, ତେବେ ଚୀନର ବିଦେଶୀ ସମ୍ପତ୍ତି ଉପରେ କଟକଣା ଲଗାଯିବାର ଆଶଙ୍କା ରହିପାରେ ।

କିନ୍ତୁ ଭୌତିକ ସୁନା କ୍ଷେତ୍ରରେ ଚିତ୍ରଟି ଭିନ୍ନ । ଏହାକୁ ଡିଜିଟାଲ୍ ଭାବେ ବ୍ଲକ୍ କରିବା କିମ୍ବା ସିଷ୍ଟମ୍‌ରୁ ଫ୍ରିଜ୍ କରିବା ସହଜ ନୁହେଁ। ତେଣୁ ଆର୍ଥିକ କିମ୍ବା ଭୂ-ରାଜନୈତିକ ସଙ୍କଟ ସମୟରେ ସୁନାକୁ ଚୀନ ଏକ ରଣନୀତିକ ସୁରକ୍ଷା କବଚ ଭାବେ ବ୍ୟବହାର କରିପାରେ ।

ଏହି କାରଣରୁ ସୁନା ଦର ଉଚ୍ଚ ସ୍ତରରେ ଥିଲେ ମଧ୍ୟ ଚୀନର କେନ୍ଦ୍ରୀୟ ବ୍ୟାଙ୍କର ସୁନା କିଣା ଜାରି ରହିଛି । ଆଗକୁ ଚୀନ ଏହାର ଗୋଲ୍ଡ ରିଜର୍ଭକୁ କେତେ ଦୂର ବଢ଼ାଏ, ତାହା ଉପରେ ବିଶ୍ୱ ଅର୍ଥନୀତିର ନଜର ରହିଛି ।