ଅର୍ଗସ ବ୍ୟୁରୋ : ଆଫ୍ରିକୀୟ ରାଷ୍ଟ୍ର କଙ୍ଗୋରେ ଭୀଷଣ ଗୃହଯୁଦ୍ଧ । ଡେମୋକ୍ରାଟିକ୍ ରିପବ୍ଲିକ୍ ଅଫ୍ କଙ୍ଗୋର କିନଶାସାରେ ଚାଲିଥିବା ହିଂସାକୁ ନେଇ ଭାରତୀୟ ଦୂତାବାସ ପକ୍ଷରୁ ଜାରି ହୋଇଛି ଆଡଭାଇଜରୀ । କିନଶାସାରେ ଥିବା ଭାରତୀୟ ଦୂତାବାସ ପକ୍ଷରୁ ବୁକାଭୁରେ ଥିବା ସମସ୍ତ ଭାରତୀୟ ନାଗରିକଙ୍କୁ ତୁରନ୍ତ ସୁରକ୍ଷିତ ସ୍ଥାନକୁ ଚାଲିଯିବାକୁ ପରାମର୍ଶ ଦିଆଯାଇଛି । ଆଫ୍ରିକୀୟ ଦେଶରେ ଭାରତୀୟ ନାଗରିକଙ୍କ ସୁରକ୍ଷା ସ୍ଥିତି ଉପରେ ତୀକ୍ଷ୍ଣ ନଜର ରଖିଛି ବୈଦେଶିକ ମନ୍ତ୍ରଣାଳୟ । ହିଂସାକାଣ୍ଡରେ ବର୍ତ୍ତମାସ ସୁଦ୍ଧା 7 ଶହରୁ ଅଧିକ ଲୋକଙ୍କ ମୃତ୍ୟୁ ହୋଇଛି ।

ଦୂତାବାସ ରବିବାର ତିନିଟି ଆଡଭାଇଜରୀ ଜାରି କରି ଭାରତୀୟଙ୍କ ସତର୍କ କରିଛନ୍ତି । ଏମ-୨୩ ବିଦ୍ରୋହୀ ଗୋଷ୍ଠୀ ବୁକାଭୁରୁ ମାତ୍ର ୨୦-୨୫ କିଲୋମିଟର ଦୂରରେ ରହିଥିବାରୁ କୌଣସି ବି ସମୟରେ ସ୍ଥିତି ସଙ୍ଗୀନ ହେବା ଆଶଙ୍କା ରହିଛି । ଆବଶ୍ୟକୀୟ ପରିଚୟ ପତ୍ର ଏବଂ ଯାତ୍ରା ପାଇଁ ଜରୁରୀ କାଗଜପତ୍ର ପାଖରେ ରଖିବା ସହ ହିଂସାଗ୍ରସ୍ତ ଅଞ୍ଚଳକୁ ନଯିବାକୁ ଭାରତୀୟଙ୍କୁ ପରାମର୍ଶ ଦିଆଯାଇଛି । ଆଡଭାଇଜରୀ ଜାରି ହେବା ସହ ଜରୁରୀକାଳୀନ ପରିସ୍ଥିତିରେ ଯୋଗାଯୋଗ କରିବା ପାଇଁ ଭାରତୀୟ ନାଗରିକମାନଙ୍କ ପାଇଁ ଫୋନ ନମ୍ବର ଓ ଇମେଲ୍ ଆଇଡି ଦିଆଯାଇଛି।