ନୋବେଲ ଶାନ୍ତି ପୁରସ୍କାର ପାଇଁ ଟ୍ରମ୍ପ କେମିତି ବିକଳ, ତାର ଚିତ୍ର ସାମ୍ନାକୁ ଆସିଛି । ନରୱେ ପ୍ରଧାନମନ୍ତ୍ରୀଙ୍କୁ ଆମେରିକା ରାଷ୍ଟ୍ରପତି ଲେଖିଥିବା ଚିଠି ଭାଇରାଲ ହେବା ପରେ ଏହା ଜଣାପଡ଼ିଛି । ଚିଠିରେ ନୋବେଲ ପୁରସ୍କାର ନ ମିଳିବାରୁ ଅସନ୍ତୋଷ ଝାଡ଼ିଛନ୍ତି ଟ୍ରମ୍ପ । ଏବେ ବିଶ୍ଵରେ ଶାନ୍ତି ପ୍ରତିଷ୍ଠା ତାଙ୍କ ଦାୟିତ୍ଵ ନୁହେଁ ବୋଲି ସେ ସ୍ପଷ୍ଟ କରିଦେଇଛନ୍ତି । ଏପରିକି ଗ୍ରୀନଲ୍ୟାଣ୍ଡ ଦଖଲ ପାଇଁ ପ୍ରୟାସ, ତାଙ୍କର ସେହି ଅସନ୍ତୋଷର ପ୍ରତିଫଳନ ବୋଲି ଚିଠିରେ ଏକ ପ୍ରକାର ଇସାରା କରିଛନ୍ତି ।

ନରୱେ ପ୍ରଧାନମନ୍ତ୍ରୀଙ୍କୁ ଟ୍ରମ୍ପ ଲେଖିଥିବା ଚିଠି... ଏହି ଚିଠି ଲିକ୍ ହୋଇ ଏବେ ସୋସିଆଲ ମିଡ଼ିଆରେ ଘୁରି ବୁଲୁଛି । ଏଥିରୁ ଜଣାପଡୁଛି ଯେ, ନୋଵେଲ ଶାନ୍ତି ପୁରସ୍କାର ପାଇଁ କେମିତି ବିକଳ ଆମେରିକା ରାଷ୍ଟ୍ରପତି । ଆଠଟି ଯୁଦ୍ଧ ଅଟକାଇଥିଲେ ବି ନୋବେଲ ଶାନ୍ତି ପୁରସ୍କାର ପାଇଁ ତାଙ୍କ ନାଁକୁ ବିଚାର ମଧ୍ୟ କରାଗଲା ନାହିଁ, ଏହା ତାଙ୍କୁ ବିଶେଷ ଆଘାତ ଦେଇଛି । ତେଣୁ ସେ ଆଉ ବିଶ୍ଵରେ ଶାନ୍ତି ପ୍ରତିଷ୍ଠା ପାଇଁ ପ୍ରୟାସ ନକରି, ଆମେରିକାର ସ୍ଵାର୍ଥ ରକ୍ଷା କରିବେ ବୋଲି ଚିଠିରେ ଉଲ୍ଲେଖ କରିଛନ୍ତି ।

ଆଠଟି ଯୁଦ୍ଧ ଅଟକାଇବା ପରେ ମଧ୍ୟ ଆପଣଙ୍କ ଦେଶ ମୋତେ ନୋବେଲ ଶାନ୍ତି ପୁରସ୍କାର ଦେବାକୁ ବିଚାର କଲାନି, ତେଣୁ ମୁଁ ଏବେ କେବଳ ଶାନ୍ତି ପ୍ରତିଷ୍ଠା ପାଇଁ ପ୍ରୟାସ କରିବି ନାହିଁ । ଯଦିଓ ଶାନ୍ତି ପ୍ରତିଷ୍ଠା ସଵୁବେଳେ ମୋର ପ୍ରାଥମିକତା ରହିବ । କିନ୍ତୁ ଏବେ ମୁଁ ଆମେରିକା ପାଇଁ କ'ଣ ଭଲ ଓ ଉଚିତ ହେବ ସେ ସଂପର୍କରେ ବିଚାର କରିବି ।

ନରୱେର ପ୍ରଧାନମନ୍ତ୍ରୀ ଜୋନସ୍ ଗାହର ଷ୍ଟୋରେଙ୍କୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଲେଖିଥିବା ଏହି ଚିଠି ଲିକ୍ ହୋଇଯାଇଛି । ଯେଉଁଥିରୁ ସ୍ପଷ୍ଟ ହେଉଛି ଯେ, ନୋଵେଲ ପୁରସ୍କାର ନମିଳିବାରୁ ବିଚଳିତ ହୋଇ ଗ୍ରୀନଲ୍ୟାଣ୍ଡ ଦଖଲ କରିବାକୁ ବାହାରିଛନ୍ତି ଆମେରିକା ରାଷ୍ଟ୍ରପତି । ଚିଠିରେ ମଧ୍ୟ ଟ୍ରମ୍ପ ସେହି ଆଡ଼କୁ ଇସାରା କରିଛନ୍ତି । ଏଣିକି ଗ୍ରୀନଲ୍ୟାଣ୍ଡକୁ ହାସଲ କରିବା ପାଇଁ ସେ କଡ଼ା ପଦକ୍ଷେପ ନେବେ । ପ୍ରକୃତରେ ଗ୍ରୀନଲ୍ୟାଣ୍ଡ ଏକ ସ୍ଵାୟତ୍ତ କ୍ଷେତ୍ର ହୋଇଥିଲେ ମଧ୍ୟ ଡେନମାର୍କ ଏହା ଉପରେ ଅଧିକାର ସାବ୍ୟସ୍ତ କରିଆସୁଛି । ଯାହାକୁ ଚ୍ୟାଲେଞ୍ଜ କରିଛନ୍ତି ଟ୍ରମ୍ପ । ଚିଠିରେ ଟ୍ରମ୍ପ ଲେଖିଛନ୍ତି ଯେ, ରୁଷିଆ ଓ ଚୀନଠାରୁ ଗ୍ରୀନଲ୍ୟାଣ୍ଡକୁ ରକ୍ଷା କରିପାରିବ ନାହିଁ ଡେନମାର୍କ । ଯଦିଓ ନରୱେ ପ୍ରଧାନମନ୍ତ୍ରୀଙ୍କୁ ଟ୍ରମ୍ପ ଚିଠି ଲେଖିଛନ୍ତି କିନ୍ତୁ ଜାଣିରଖିବା ଉଚିତ୍ ଯେ, ନୋବେଲ ଶାନ୍ତି ପୁରସ୍କାର ନରୱେ ସରକାର ଦିଅନ୍ତି ନାହିଁ ବରଂ ଏକ ସ୍ବତନ୍ତ୍ର ପାଞ୍ଚ ଜଣିଆ କମିଟି ପ୍ରଦାନ କରିଥାନ୍ତି, ଯାହାକୁ ଚୟନ କରେ ନରୱେ ସଂସଦ ।

କିଛିଦିନ ତଳେ ବିଶ୍ୱ ରାଜନୀତିରେ ଏକ ଅଭୂତପୂର୍ବ ଓ ଚାଞ୍ଚଲ୍ୟକର ଘଟଣା ଦେଖିବାକୁ ମିଳିଥିଲା। ଭେନେଜୁଏଲାର ବିରୋଧୀ ଦଳର ନେତ୍ରୀ, ତଥା ୨୦୨୫ ନୋବେଲ ଶାନ୍ତି ପୁରସ୍କାର ବିଜେତା ମାରିଆ କୋରିନା ମାଚାଡୋ ନିଜ ନୋବେଲ ପୁରସ୍କାରକୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଉପହାର ସ୍ୱରୂପ ଦେଇଥିଲେ । ୧୫ ଜାନୁଆରୀରେ ହ୍ୱାଇଟ ହାଉସରେ ହୋଇଥିବା ଏକ ବୈଠକରେ ଟ୍ରମ୍ପ ଏହି ଉପହାର ଗ୍ରହଣ କଲେ । ଆଉ ଖୁସିରେ ଗଦ ଗଦ ହୋଇ କହିଥିଲେ ଏହା ଏକ ସୁନ୍ଦର ସମ୍ମାନ । ଏସଵୁ ଘଟଣା ପରେ ଟ୍ରମ୍ପ କେମିତି ନୋବେଲ ଶାନ୍ତି ପୁରସ୍କାର ପାଇଁ ଲାଳିୟିତ ଓ ନ ମିଳିବାରୁ ପ୍ରତିଶୋଧ ପରାୟଣ ହୋଇପଡ଼ିଛନ୍ତି, ତାର ପ୍ରମାଣ ମିଳୁଛି ।