ଅର୍ଗସ ବ୍ୟୁରୋ: ପୁତିନଙ୍କୁ ଭେଟିବେ ଟ୍ରମ୍ପ । ଜାହିର୍ କଲେ ଦୃଢ଼ ଇଚ୍ଛା । ଆମେରିକା ରାଷ୍ଟ୍ରପତି ଭାବେ ଟ୍ରମ୍ପ ଶପଥ ନେବା ପରେ ଋଷ ରାଷ୍ଟ୍ରପତି ଭ୍ଲାଦିମିର ପୁତିନଙ୍କୁ ଭେଟିବାକୁ ମନସ୍ଥ କରିଛନ୍ତି । ଏଥିସହ ଆମେରିକାର ପୂର୍ବ ରାଷ୍ଟ୍ରପତି ଜନ୍ ଏଫ୍ କେନେଡି, ତାଙ୍କ ଭାଇ ରବର୍ଟ ଏଫ୍ କେନେଡି ଓ ସମାଜସେବୀ ମାର୍ଟିନ ଲୁଥର କିଙ୍ଗ ଜୁନିଅରଙ୍କ ହତ୍ୟା ସମ୍ପର୍କିତ ଫାଇଲ୍ ସାର୍ବଜନୀନ ନିର୍ଦ୍ଦେଶ ଉପରେ ଦସ୍ତଖତ କରିଛନ୍ତି ।

ଗୁରୁବାର ହ୍ଵାଇଟ୍ ହାଉସରେ ଗଣମାଧ୍ୟମକୁ ସମ୍ବୋଧିତ କରି ଟ୍ରମ୍ପ କହିଛନ୍ତି, ମୁଁ ଯାହା ଶୁଣୁଛି ପୁତିନ ବି ମୋ ସହ ଭେଟ ହେବାକୁ ଚାହୁଁଛନ୍ତି । ଆମେ ଖୁବଶୀଘ୍ର ଭେଟ୍ ହେବୁ । ଆମେ ଭେଟିବା ବହୁତ ଜରୁରୀ । କାରଣ ଋଷ-ୟୁକ୍ରେନ୍ ଯୁଦ୍ଧରେ ପ୍ରତିଦିନ ଅନେକ ସୈନିକଙ୍କ ମୃତ୍ୟୁ ହେଉଛି ।

ମିଡିଆ ରିପୋର୍ଟ ଅନୁସାରେ, ଟ୍ରମ୍ପ ତାଙ୍କ ପ୍ରତିନିଧି କିଥ କେଲଙ୍ଗଙ୍କୁ ଋଷ-ୟୁକ୍ରେନ୍ ମଧ୍ୟରେ ଚୁକ୍ତି କରାଇବା ଲାଗି ୧୦୦ ଦିନ ସମୟ ଦେଇଛନ୍ତି । ବୁଧବାର ପୁତିନଙ୍କୁ ଧମକ ଦେଇ ଟ୍ରମ୍ପ କହିଥିଲେ, ସେ ଯଦି ବୁଝାମଣା ଲାଗି ପ୍ରସ୍ତୁତ ନାହାନ୍ତି ତ ଋଷ ଉପରେ ନୂଆ ପ୍ରତିବନ୍ଧକ ଲଗାଇବୁ ।

ସେପଟେ ଡାଭୋସରେ ହେଉଥିବା ବିଶ୍ଵ ଅର୍ଥନୀତିକ ଫୋରମକୁ ଟ୍ରମ୍ପ ଭର୍ଚୁଆଲ୍‌ରେ ସମ୍ବୋଧିତ କରିଛନ୍ତି । କହିଛନ୍ତି, ସାଉଦି ଆରବ ଓ ଓପିଇସିର ଅନ୍ୟ ସଦସ୍ୟ ରାଷ୍ଟ୍ର ଅଶୋଧିତ ତୈଳଦର କମ କଲେ ଋଷିଆ-ୟୁକ୍ରେନ୍ ମଧ୍ୟରେ ଚାଲିଥିବା ଯୁଦ୍ଧ ତୁରନ୍ତ ବନ୍ଦ ହୋଇ ପାରିବ ।