ଗୋଟିଏ ପଟେ, ଭାରତ ବିପକ୍ଷରେ କ୍ରିକେଟ୍ ମ୍ୟାଚ୍ ସମୟରେ ପାକିସ୍ତାନୀ ଟିମ୍‌ ଯେଉଁଭଳି ଅପମାନିତ ହେଲା, ସେନେଇ ସାରା ବିଶ୍ୱରେ ଚର୍ଚ୍ଚା ଚାଲିଛି। ଠିକ୍‌ ଏହି ସମୟରେ, ପାକିସ୍ତାନୀ ଟିମ୍‌କୁ ପୁଣି ଥରେ ଲଜ୍ଜାର ସମ୍ମୁଖୀନ ହେବାକୁ ପଡ଼ିଛି ଜାପାନରେ। ପାକିସ୍ତାନୀ ଫୁଟବଲ୍ ଟିମ୍‌ ଜାପାନ ଯାଇଥିଲା । କିନ୍ତୁ ଜାପାନ ସେମାନଙ୍କୁ ନକଲି ଟିମ୍‌ କହି ଫେରାଇ ଦେଇଥିଲା । ଏହା କୌଣସି ସାଧାରଣ ଘଟଣା ନୁହେଁ, ଏହାକୁ ମାନବ ତସ୍କରୀର ଏକ ପ୍ରୟାସ ବୋଲି ମଧ୍ୟ ବିବେଚନା କରାଯାଇପାରେ ।

କୁହାଯାଉଛି ଯେ ଏହି ଟିମ୍‌ର ସଦସ୍ୟମାନେ ନକଲି କାଗଜପତ୍ର ସହିତ ଜାପାନ ଆସିଥିଲେ ଏବଂ ସିଆଲକୋଟ ଫୁଟବଲ୍ ଟିମ୍‌ର ଅଂଶ ବୋଲି ସମସ୍ତେ ଦାବି କରିଥିଲେ। ପାକିସ୍ତାନର ଫେଡେରାଲ୍ ଇନ୍‌ଭେଷ୍ଟିଗେସନ୍ ଏଜେନ୍ସି କହିଛି ମୋଟ ୨୨ ଜଣ ଏହି ଫର୍ଜି ଟିମ୍‌ର ସଦସ୍ୟ । ସେମାନେ ସିଆଲକୋଟ ବିମାନବନ୍ଦରରୁ ଜାପାନ ଯାତ୍ରା ଆରମ୍ଭ କରିଥିଲେ । ଜାପାନୀ କର୍ତ୍ତୃପକ୍ଷ ସେମାନଙ୍କର ନକଲି କାଗଜପତ୍ର ବିଷୟରେ ଜାଣିପାରିଥିଲେ । ତେଣୁ ସେମାନଙ୍କୁ ଦେଶରୁ ବାହାର କରାଯାଇଥିଲା ।

ନକଲି ଟିମ୍‌ ବୋଲି ମାମଲା ରୁଜୁ ହେଲା

ମାମଲାର ମୁଖ୍ୟ ଅଭିଯୁକ୍ତ ମଲିକ ୱାକାସ ବୋଲି FIA ପକ୍ଷରୁ କୁହାଯାଇଛି । ତାଙ୍କୁ ଗିରଫ କରି ଗୁଜରାଂଓ୍ୱାଲା ପୋଲିସ ଷ୍ଟେସନରେ ରଖାଯାଇଛି । ତଦନ୍ତରୁ ଜଣାପଡିଛି ଯେ ୱାକାସ 'ଗୋଲ୍ଡେନ ଫୁଟବଲ୍ ଟ୍ରାଏଲ୍' ନାମକ ଏକ ଫୁଟବଲ୍ କ୍ଲବ୍ ଗଠନ କରିଥିଲେ । ସେ ଲୋକଙ୍କୁ ଖେଳାଳି ହେବାର ନାଟକ କରିବାକୁ ଶିଖାଇଥିଲେ। ବିଦେଶ ଯାତ୍ରାରେ ସାହାଯ୍ୟ କରିବା ପାଇଁ ସେ ପ୍ରତ୍ୟେକ ସଦସ୍ୟଙ୍କଠାରୁ 40 ଲକ୍ଷ ଟଙ୍କା ଲେଖାଏଁ ନେଇଥିଲେ । ଏହି ଘଟଣାରେ ଅଧିକ ତଦନ୍ତ ଜାରି ରହିଛି।

ଏହା ପାକିସ୍ତାନ ଟିମ୍‌ ସହିତ ଲଗାତାର ଦ୍ୱିତୀୟ ବିବାଦ। ଏସିଆ କପରେ ଭାରତଠାରୁ ପରାଜୟ ପରେ, ଦୁଇ ଦେଶ ମଧ୍ୟରେ ହାତ ମିଳାଇବା ନେଇ ବିବାଦ ହୋଇଥିଲା। ଦୁବାଇରେ ଖେଳାଯାଇଥିବା ମ୍ୟାଚ୍ ପୂର୍ବରୁ ଏବଂ ପରେ ଉଭୟ ଦଳର ଖେଳାଳିମାନେ ହାତ ମିଳାଇ ନଥିଲେ। ପାକିସ୍ତାନ କ୍ରିକେଟ୍ ବୋର୍ଡ କହିଛି ଯେ ମ୍ୟାଚ୍ ରେଫରି ଆଣ୍ଡି ପାଇକ୍ରଫ୍ଟ ଦୁଇ ଅଧିନାୟକ - ଭାରତର ସୂର୍ଯ୍ୟକୁମାର ଯାଦବ ଏବଂ ପାକିସ୍ତାନର ସଲମାନ ଅଲି ଆଗାଙ୍କୁ ଟସ୍ ପୂର୍ବରୁ ହାତ ମିଳାଇବା ପାଇଁ କହିନଥିଲେ। ପିସିବି ଏହାକୁ ନିନ୍ଦା କରିଛି । ଏନେଇ ଆଇସିସିରେ ମଧ୍ୟ ଅଭିଯୋଗ କରିଛି। ତେବେ ଆଇସିସି ପକ୍ଷରୁ ଏପର୍ଯ୍ୟନ୍ତ କୌଣସି ଆନୁଷ୍ଠାନିକ ପ୍ରତିକ୍ରିୟା ଆସି ନାହିଁ।