ବଡ଼ଦିଅଁର ଭାବରୁ ନିଜକୁ ଦୂରେଇ ପାରିନାହାନ୍ତି ବିଦେଶୀ । ବିଦେଶ ମାଟିରେ ଗଡିଲା ବଡଠାକୁରଙ୍କ ରଥ । ଲଣ୍ଡନ,ବାହାରିନ,ନ୍ୟୁୟର୍କ, ଲଣ୍ଡନ, ଅଷ୍ଟ୍ରେଲିଆ, ବୋଷ୍ଟନ, ବାଂଲାଦେଶ, ମିଆଁମାରରେ ଉତ୍ସାହର ସହ ପାଳନ ହୋଇଛି ରଥଯାତ୍ରା ଉତ୍ସବ । ବଡଦାଣ୍ଡ ନୁହେଁ ୟୁକେର ଚକଚକିଆ ବିସ୍ତୃତ ଓସାରିଆ ରାସ୍ତାରେ ଗଡିଲା ଜଗାରଥ। ୟୁକେରେ ମଧ୍ୟ ରଥଯାତ୍ରା ଧୁମଧାମର ସହ ଆଯୋଜିତ ହୋଇଯଇଛି। ତିନି ରଥରେ ତିନି ଠାକୁରଙ୍କୁ ବସାଇ ଶୋଭାଯାତ୍ରା କରିଛନ୍ତି ଶ୍ରଦ୍ଧାଳୁ । ଭଜନ କୀର୍ତ୍ତନ ଓ ହରିନାମ ଭିତରେ ଅନୁଷ୍ଠିତ ହୋଇଛି ରଥଯାତ୍ରା ।ଲଣ୍ଡନରେ ମଧ୍ୟ ଜାକଜକମରେ ପାଳିତ ହୋଇଛି ରଥଯାତ୍ରା।ଜୟ ଜଗନ୍ନାଥ ଧ୍ୱନୀରେ କମ୍ପିଲା ଲଣ୍ଡନ ସହର। ମହାପ୍ରଭୁଙ୍କ ଦର୍ଶନ ପାଇଁ ଏକାଠି ହୋଇଥିଲେ ଶହ ଶହ ଭକ୍ତ।

ବାହାରିନରେ ଶ୍ରୀଜଗନ୍ନାଥଙ୍କ ଭକ୍ତିରେ ଝୁମିଥିଲେ ପ୍ରବାସୀ ଓଡ଼ିଆ । ପ୍ରବାସୀ ଓଡ଼ିଆ ସଙ୍ଗଠନ ବାହାରିନ ଓଡ଼ିଆ ସମାଜ ଆନୁକୂଲ୍ୟରେ ଦୀର୍ଘ ୨୫ବର୍ଷ ଧରି ଏଠାରେ ରଥଯାତ୍ରା ଅନୁଷ୍ଠିତ ହୋଇ ଆସୁଛି । ଶ୍ରୀକ୍ଷେତ୍ର ପୁରୀର ରୀତିନୀତି ଅନୁଯାୟୀ ସମସ୍ତ ବିଧିବିଧାନ ସହ ଶ୍ରୀଜୀଉମାନଙ୍କ ପହଣ୍ଡିବିଜେ, ରଥପ୍ରତିଷ୍ଠା, ଛେରାପହଁରା ପରେ ଆରମ୍ଭ ହୋଇଥିଲା ରଥଟଣା।ନ୍ୟୁୟର୍କ ସହରରେ ମଧ୍ୟ ପାଳନ ହୋଇଛି ରଥଯାତ୍ରା। ଇସକନ୍ ଟ୍ରଷ୍ଟ ପକ୍ଷରୁ ଏହି ରଥଯାତ୍ରା ଅନୁଷ୍ଠିତ ହୋଇଛି । ପ୍ରତିକୂଳ ପାଗ ସତ୍ତ୍ବେ ହଜାର ହଜାର ଲୋକଙ୍କ ଗହଣରେ ନ୍ୟୁୟର୍କ ସଡକରେ ଗଡିଛି ରଥ ।ୟୁଏସଏର ବୋଷ୍ଟନ ସହରରେ ମଧ୍ୟ ଜଗାପ୍ରେମୀଙ୍କ ଭକ୍ତି ଦେଖିବାକୁ ମିଳିଛି। ଇସକନ୍ ପକ୍ଷରୁ ଆୟୋଜିତ ରଥଯାତ୍ରାରେ ଶହଶହ ଜଗା ପ୍ରେମୀ ଯୋଗ ଦେଇ ଭକ୍ତିଭାବରେ ବୁଡିଥିଲେ।

ଆବାଳ ବୃଦ୍ଧ ବନିତା ଏଥିରେ ସାମିଲ ହୋଇ ରଥ ଟାଣିଛନ୍ତି।ଅଷ୍ଟ୍ରେଲିଆରେ ମଧ୍ୟ ରଥଯାତ୍ରା ରିତିନୀତିରେ ଅନୁଷ୍ଠିତ ହୋଇ ଯାଇଛି। ଏଠାରେ ତିନିରଥ ପରିବର୍ତ୍ତେ ଗୋଟିଏ ରଥରେ ତିନି ଠାକୁରଙ୍କୁ ବସାଇ ଶୋଭାଯାତ୍ରା କରିଛନ୍ତି ଶ୍ରଦ୍ଧାଳୁ । ପଡୋଶୀ ଦେଶ ବାଙ୍ଗଲାଦେଶ ଏବଂ ମିଆମାରରେ ମଧ୍ୟ ଅନୁଷ୍ଠିତ ହୋଇଛି ରଥଯାତ୍ରା। ହଜାର ହଜାର ଶ୍ରଦ୍ଧାଳୁ ଉତ୍ସାହର ସହିତ ରଥ ଟାଣିବା ସହିତ ନାମ ସଂକିର୍ତ୍ତନରେ ନିଜକୁ ହଜାଇ ଦେଇଛନ୍ତି ।