ନୂଆଦିଲ୍ଲୀ: ହମାସର ଅନ୍ଧାର କୋଠରୀରେ ବନ୍ଦ ଥିବା ଇସ୍ରାଏଲ୍ ବନ୍ଧକ ମୁକ୍ତ ହେବେ । ପ୍ରାୟ ୨ ବର୍ଷ ପରେ ଦେଖିବେ ସକାଳର ସୂର୍ଯ୍ୟୋଦୟ, ଖୋଲା ଆକାଶ ତଳେ ନେବେ ନିଶ୍ଵାସ । ଆଉ ଏମିତି ହେଲେ ସବୁ କ୍ରେଡିଟ୍ ଯିବ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ।

ଆମେରିକା ରାଷ୍ଟ୍ରପତିଙ୍କ ଚେତାବନୀ ପରେ ହମାସ୍ ଟ୍ରମ୍ପଙ୍କ ପ୍ରାୟ ସବୁ ବଡ଼ ସର୍ତ୍ତ ମାନି ନେବାକୁ ପ୍ରସ୍ତୁତ ହୋଇଛି । ଯେଉଁଥିରେ ଗାଜାରୁ ସମସ୍ତ ଇସ୍ରାଏଲ୍ ବନ୍ଧକଙ୍କୁ ମୁକ୍ତ କରିବା ସାମିଲ୍ ଅଛି । ଏହା ପରେ ସମସ୍ତଙ୍କ ମନରେ ଗୋଟିଏ ପ୍ରଶ୍ନ ଇସ୍ରାଏଲ୍-ହମାସ୍ ମଧ୍ୟରେ ଚାଲିଥିବା ସଂଘର୍ଷରେ ପଡ଼ିବ କି ଯବନିକା ? କାରଣ ଦୁଇ ବର୍ଷ ହେଲା ଦୁଇ ଦେଶ ମଧ୍ୟରେ ଯୁଦ୍ଧ ଚାଲିଛି ।

ଏଥିସହ ପଢ଼ନ୍ତୁ: ଇସ୍ରାଏଲ୍ ଇରାନ ଯୁଦ୍ଧ ନେଇ ଆମେରିକାର ବଡ଼ ଘୋଷଣା

ଗାଜାକୁ ନେଇ ଟ୍ରମ୍ପ କରିଥିବା ଯୋଜନା ଓ ପ୍ରସ୍ତାବକୁ ନେଇ ହମାସ୍ ପଜିଟିଭ୍ ପ୍ରତିକ୍ରିୟା ଦେଇଛି । ହମାସର ଏହି ନିଷ୍ପତ୍ତି ପରେ ଆଶା କରାଯାଉଛି, ହୁଏତ ଗାଜାରେ ଯୁଦ୍ଧ ଶୀଘ୍ର ବନ୍ଦ ହୋଇଯିବ । ଫିଲିସ୍ତୀନର ମିଲିସିଆ ସଂଗଠନ ଶୁକ୍ରବାର କହିଛି, "ଟ୍ରମ୍ପଙ୍କ ଶାନ୍ତି ପ୍ରସ୍ତାବ ଅନୁସାରେ ଇସ୍ରାଏଲ୍‌ର ସମସ୍ତ ବନ୍ଧକଙ୍କୁ ଛାଡ଼ିବାକୁ ପ୍ରସ୍ତୁତ ଅଛୁ । ସେ ଜୀବିତ ହୁଅନ୍ତୁ କି ମୃତ ।"

ଟ୍ରମ୍ପଙ୍କ 'ଗାଜା ପ୍ଲାନ୍'

• 
  ହମାସ୍-ଇସ୍ରାଏଲ୍ ମଧ୍ୟରେ ଶାନ୍ତି ଚୁକ୍ତିର ୭୨ ଘଣ୍ଟା ଭିତରେ ଜୀବିତ ଓ ମୃତ, ସମସ୍ତ ଇସ୍ରାଏଲ୍ ବନ୍ଧକଙ୍କୁ ହମାସକୁ ମୁକ୍ତ କରିବାକୁ ପଡ଼ିବ ।
• 
  ପ୍ରତି ବଦଳରେ ଇସ୍ରାଏଲ୍ ମଧ୍ୟ ସମସ୍ତ ଫିଲିସ୍ତୀନ କଏଦୀଙ୍କୁ ତାର ଜେଲ୍‌ରୁ ଛାଡ଼ିବ ।
• 
  ଅସ୍ତ୍ରବିରତି ଲାଗୁ ହେଲେ ଇସ୍ରାଏଲ୍‌ ତାର ସେନାକୁ ପର୍ଯ୍ୟାୟକ୍ରମେ ଗାଜାରୁ ପ୍ରତ୍ୟାହାର କରି ନେବ ।
• 
  ଇସ୍ରାଏଲ୍ ଉପରେ ରକେଟ୍ ଓ ଅନ୍ୟ ଆକ୍ରମଣ ଗାଜା କରିବ ନାହିଁ ।
• 
  ସୁରକ୍ଷା ଦୃଷ୍ଟିରୁ ଗାଜାରେ ଏକ ବହୁରାଷ୍ଟ୍ରୀୟ ଫୋର୍ସ ମୁତୟନ କରାଯିବ । ଯେଉଁଥିରେ ଆରବ ରାଷ୍ଟ୍ର ସହ ଆମେରିକା ଓ ନାଟୋ ଦେଶର ଭାଗିଦାରୀ ରହିବ ।

ଗାଜାରେ ସରକାର ଚଳାଇବ ନାହିଁ ହମାସ୍

ଟ୍ରମ୍ପଙ୍କ ପ୍ଲାନ ନେଇ ହମାସ୍ ଏକ ବିବୃତି ଜାରି କରିଛି । ଯେଉଁଥିରେ କୁହାଯାଇଛି, "ଟ୍ରମ୍ପଙ୍କ ଗାଜା ପ୍ଲାନ୍ ଉପରେ ଚର୍ଚ୍ଚା ଆଲୋଚନା ପାଇଁ ମଧ୍ୟସ୍ଥିଙ୍କ ସହ କଥାହେବାକୁ ପ୍ରସ୍ତୁତ । ଯଦି ଆଲୋଚନା ସଫଳ ରୁହେ ତ ବନ୍ଧକଙ୍କୁ ଫେରାଇବା ଲାଗି ମାସ ମାସର ପ୍ରୟାସ ଫଳପ୍ରଦ ହେବ ।" ହମାସ ଆହୁରି କହିଛି, ଗାଜାର ପ୍ରଶାସନକୁ ଫିଲିସ୍ତୀନର ଟେକ୍ନୋକ୍ରେଣ୍ଟୋର ଏକ ସ୍ଵତନ୍ତ୍ର ଦଳକୁ ହସ୍ତାନ୍ତର କରିବାକୁ ପ୍ରସ୍ତୁତ ।

ଏଥିସହ ପଢ଼ନ୍ତୁ: ଗାଜା ସିଟି ଉପରେ ଇସ୍ରାଏଲ୍ କରିବ ସାମରିକ ନିୟନ୍ତ୍ରଣ !

We welcome President Trump’s leadership as peace efforts in Gaza make decisive progress. Indications of the release of hostages mark a significant step forward.

India will continue to strongly support all efforts towards a durable and just peace.@realDonaldTrump @POTUS

— Narendra Modi (@narendramodi) October 4, 2025

ଗାଜାରେ ଶାନ୍ତି ପାଇଁ ଟ୍ରମ୍ପ ଆଣିଥିବା ପ୍ରସ୍ତାବକୁ ନେଇ ପ୍ରତିକ୍ରିୟା ରଖିଛି ଭାରତ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଆମେରିକା ରାଷ୍ଟ୍ରପତିଙ୍କୁ ପ୍ରଶଂସା କରିଛନ୍ତି । ପ୍ରଧାନମନ୍ତ୍ରୀ କହିଛନ୍ତି, "ଏହା ଆନନ୍ଦର ମୁହୂର୍ତ୍ତ, ଗାଜା ପଟ୍ଟିରେ ଶାନ୍ତି ଫେରିବ । ଇସ୍ରାଏଲର ବନ୍ଧକ ଘରକୁ ଫେରିବେ ।" ଏନେଇ ପିଏମ୍ ମୋଦି Xରେ ପୋଷ୍ଟ କରିଛନ୍ତି । ଯେଉଁଥିରେ ଭାରତ ସ୍ଥାୟୀ ଓ ନ୍ୟାୟ ସଂଗତ ଶାନ୍ତି ପଥରେ ସମସ୍ତ ପ୍ରୟାସକୁ ଦୃଢ଼ତାର ସହ ସମର୍ଥନ କରୁଥିବା କୁହାଯାଇଛି ।