ପାକିସ୍ତାନରେ ହିନ୍ଦୁ ମହିଳାଙ୍କୁ ଅତ୍ୟାଚାର କରିବା ଘଟଣା ନୂଆ ନୁହେଁ । ପାକିସ୍ତାନର ସିନ୍ଧୁ ପ୍ରାନ୍ତରେ ପ୍ରତିଦିନ ଏପରି ଘଟଣା ନଜରରେ ଆସେ ଯେଉଁଠି ହିନ୍ଦୁ ମହିଳାମାନଙ୍କୁ ଧର୍ମାନ୍ତରଣ କରି ମୁସଲିମ ବ୍ୟକ୍ତିଙ୍କ ସହ ତାଙ୍କର ବିବାହ କରାଯାଏ । ତେବେ ବର୍ତ୍ତମାନ ସିନ୍ଧ୍‌ର ତନ୍ଦୋ ଅଲ୍ଲାହୟାର ଜିଲ୍ଲାରେ ତିନିଜଣ ନାବାଳିକାଙ୍କ ପରିବାର ଲୋକେ ଏହି ଘଟଣାକୁ ନେଇ ପୋଲିସ ଷ୍ଟେସନରେ ଏଫଆଇଆର(FIR) ଦୋଇଛନ୍ତି । ସେଥିରେ ଲେଖାଅଛି, କି ତିନିଟି ଅଲଗା ଅଲଗା ସ୍ଥାନରେ ନାବାଳିକା ୩ ଜଣଙ୍କୁ ଅପହରଣ କରାଯାଇ ଜୋର ଜବରଦସ୍ତ ତାଙ୍କର ଧର୍ମ ପରିବର୍ତ୍ତନ କରାଯାଇ ତାଙ୍କୁ ମୁସଲିମ ବ୍ୟକ୍ତିଙ୍କ ସହ ବିବାହ କରାଯାଉଛି ।

ତେବେ ଏହି ଧର୍ମ ପରିବର୍ତ୍ତନକୁ ନେଇ ସେମାନଙ୍କ ପରିବାର ପକ୍ଷରୁ ବିରୋଧ କରାଯାଇଛି, ଏବଂ ସେହି ଅପହରଣକାରୀଙ୍କୁ ଗିରଫ କରିବାକୁ ସେମାନେ ଦାବି କରିଛନ୍ତି । ଏଫଆଇଆର ଦେବାପରେ ସେମାନେ ଥାନା ବାହାରେ ବିରୋଧ ପ୍ରଦର୍ଶନ କରିଛନ୍ତି । ଯେପର୍ଯ୍ୟନ୍ତ ଅପହରଣକାରୀଙ୍କୁ ଗିରଫ ନକରାଯାଇଛି, ସେମାନେ ବିରୋଧ କରିବେ ବୋଲି ପୋଲିସକୁ କଡା ଚେତାବନୀ ଦେଇଛନ୍ତି ।

ତେବେ ମଙ୍ଗଳବାରଦିନ ଏହି ତିନିଜଣ ଝିଅ ଅପହରଣକାରୀଙ୍କ ସହ କୋର୍ଟରେ ହାଜିର ହୋଇଥିଲେ । ହେଲେ ସମସ୍ତଙ୍କ ସାମ୍ନାରେ ସେହି ୨ଜଣ ନାବାଳିକା କହିଥିଲେ, ସେମାନେ ନିଜ ଇଚ୍ଛାରେ ମୁସଲିମ ଧର୍ମ ପରିବର୍ତ୍ତନ କରି ନିଜ ପ୍ରେମୀକଙ୍କୁ ବିବାହ କରିଛନ୍ତି । ତେବେ ଏହାକୁ ନେଇ ସିନ୍ଧର ମାନବାଧିକାର ଆୟୋଗ ପକ୍ଷରୁ ପୋଲିସ ସୁପରିଟେଣ୍ଡେଣ୍ଟଙ୍କୁ ଏକ ପତ୍ରଦ୍ବାରା ଏହି ୩ ଝିଅଙ୍କ ମାମଲାରେ ନିଷ୍ପକ୍ଷ ଯାଞ୍ଚ ପାଇଁ କୁହାଯାଇଛି। ଯଦି ସେମାନେ ପ୍ରକୃତରେ ନାବାଳିକା ତେବେ ତାଙ୍କର ବିବାହ ସିନ୍ଧ୍ ବିବାହ ପ୍ରତିବନ୍ଧକ ଆଇନ, ୨୦୧୩ ଅନୁଯାୟୀ ବେଆଇନ ହେବ ।

ତେବେ ପାକିସ୍ତାନରେ ପୋଲିସ ପ୍ରଶାସନ ଏବଂ ସରକାରଙ୍କ ଉପରେ ଅଳ୍ପସଂଖ୍ୟକ ହିନ୍ଦୁ ଏବଂ ଅନ୍ୟ ଅଳ୍ପସଂଖ୍ୟକ ସମୁଦାୟଙ୍କ ମଧ୍ୟରେ ଭେଦଭାବ ଏବଂ ତାଙ୍କର ଅଧିକାରୀଙ୍କୁ ଅଣଦେଖଆ କରିବାର ଆରୋପ ଲଗାଯାଇଛି ।

Argus News | argus news | Odisha Latest News, Breaking News, Trending News, Live TV