ନୂଆଦିଲ୍ଲୀ: ଜେଲ୍ ବାହାରେ ଅଣ୍ଡାମାଡ଼ । ଇମ୍ରାନ ଖାନଙ୍କ ଭଉଣୀଙ୍କୁ ଅଣ୍ଡା ମାଡ଼ର ଭିଡିଓ ଭାଇରାଲ୍ । ରାୱଲପିଣ୍ଡିର ଅଦିଅଲା ଜେଲ୍ ବାହାରେ ଇମ୍ରାନଙ୍କ ଭଉଣୀ ଅଲୀମା ଖାନୁମଙ୍କ ଉପରେ ଅଣ୍ଡା ମାଡ଼ ହୋଇଛି । ଇମ୍ରାନ୍ ଖାନ ସେହି ଜେଲ୍‌ରେ କଏଦୀ ଥିବାବେଳେ ତାଙ୍କ ଭଉଣୀଙ୍କ ଉପରେ ଅଣ୍ଡାମାଡ଼ର ଭିଡିଓ ଭାଇରାଲ୍ ହେଉଛି ।

ଇମ୍ରାନ ଖାନ ଅଭିଯୁକ୍ତ ଥିବା ତୋଷଖାନା ମାମଲାର ଶୁଣାଣିରେ ଅଂଶଗ୍ରହଣ କରି ଅଲୀମା ମିଡିଆକୁ ସମ୍ବୋଧିତ କରୁଥିଲେ । ଜେଲ୍ ବାହାରେ ଗଣମାଧ୍ୟମକୁ ପ୍ରତିକ୍ରିୟା ଦେଉଥିବା ବେଳେ ଅଲୀମା ଖାନୁମଙ୍କ ଉପରକୁ କେହି ଅଣ୍ଡା ଫିଙ୍ଗିଥିଲା । ଅଲୀମାଙ୍କ ବେକରେ ଅଣ୍ଡା ବାଜି ପୋଷାକ ସାରା ପଡ଼ିଥିବା ଭିଡିଓରେ ଦେଖା ଯାଉଛି ।

ତେବେ କିଏ ଅଣ୍ଡା ମାଡ଼ କରିଥିଲା ଜଣାପଡ଼ିନି । ଅଣ୍ଡା ମାଡ଼ ପରେ ମଧ୍ୟ ଅଲୀମା ବ୍ୟତିବ୍ୟସ୍ତ ହୋଇ ନଥିଲେ । ବରଂ 'କିଛି କଥା ନାହିଁ, ଯିବାକୁ ଦିଅନ୍ତୁ' ବୋଲି ଅଲୀମା କହିଥିବା ଭାଇରାଲ୍ ଭିଡିଓରେ ଶୁଣିବାକୁ ମିଳୁଛି । ଘଟଣା ପରେ ରାୱଲପିଣ୍ଡି ପୋଲିସ ଆକ୍ସନକୁ ଆସି ଅଣ୍ଡା ଫିଙ୍ଗିଥିବା ୨ ଜଣ ମହିଳାଙ୍କୁ ଗିରଫ କରିଛି ।

ପୋଲିସ ଅନୁସାରେ, ଗିରଫ ମହିଳା ଦ୍ଵୟ ଇମ୍ରାନଙ୍କ ଦଳ ପିଟିଆଇର ସମର୍ଥକ ଏବଂ ସାମ୍ବାଦିକ ପଚାରିଥିବା ଏକ ପ୍ରଶ୍ନକୁ ଅଲୀମା ଏଡ଼ାଇଯିବାରୁ ଅଣ୍ଡା ମାଡ଼ କରିଛନ୍ତି । ତେବେ ଅଲୀମାଙ୍କ ଉପରେ ହୋଇଥିବା ଆକ୍ରମଣକୁ ପିଟିଆଇ ସମର୍ଥକ ନିନ୍ଦା କରିଛନ୍ତି ।

Argus News | argus news | Odisha Latest News, Breaking News, Trending News, Live TV