ନିରାଶ ହେଲା ପାକିସ୍ତାନ । ହାତ ମିଳାଇଲେନି ଭାରତୀୟ ଖେଳାଳି। ପାକ୍ ପ୍ଲେୟର୍ସ ଅପେକ୍ଷା କରିଥିଲେ କିନ୍ତୁ ମୁହଁ କୁ ବି ଅନାଇଲେନି ସୂର୍ଯ୍ୟ ସେନା । ହାରିବା ପରେ ଏବେ ଭାରତୀୟ ଖେଳାଳିଙ୍କ ଏ ବିରୋଧକୁ ଦେଖି ପାକିସ୍ତାନ ନିରାଶ । ଗତକାଲି ଦୁବାଇରେ ଅନୁଷ୍ଠିତ ହୋଇଥିଲା ହାଇଭୋଲଟେଜ୍ ମ୍ୟାଚ୍ । ମୁହାଁ ମୁହିଁ ହୋଇଥିଲେ ଦୁଇ ପାରମ୍ପରିକ ପ୍ରତିଦ୍ବନ୍ଦୀ ଭାରତ-ପାକ୍ ।

ତେବେ ପହଲଗାମ ଆତଙ୍କୀ ହମଲା ପରେ ଦେଶରେ ପାକିସ୍ତାନ ପ୍ରତି ଲୋକଙ୍କ ଘୃଣାଭାବ ବଢ଼ିଛି । ଯାହାକି ଗତକାଲି ମ୍ୟାଚରେ ବି ଦେଖିବାକୁ ମିଳିଛି । ଆତଙ୍କୀଙ୍କୁ ସେମାନଙ୍କ ଭାଷାରେ ଦେଶର ସେନା ଜବାବ ଦେଇସାରିଥିବା ବେଳେ, ପାକ କ୍ରିକେଟ୍ ଟିମକୁ ମଧ୍ୟ ପଡ଼ିଆରେ ପରାଜୟର ସ୍ବାଦ ଚଖାଇସାରିଛି ଭାରତ । ପାକ ବିପକ୍ଷ ମ୍ୟାଚରେ ଭାରତ ସହଜ ବିଜୟ ହାସଲ କରିଛି । ପାକକୁ ୭ ୱିକେଟରେ ପରାସ୍ତ କରିଛି ଟିମ୍ ଇଣ୍ଡିଆ । ଆଉ ପରାସ୍ତ କରିବା ପରେ ଯାହା ଘଟିଥିଲା ଏହାକୁ ହିଏ ନେଇ ଏବେ ସବୁଆଡ଼େ ଚର୍ଚ୍ଚା ।

ମ୍ୟାଚରେ ବିଜୟ ହାସଲ କରିବା ପରେ, ସୂର୍ଯ୍ୟକୁମାର ଯାଦବ ଏବଂ ତାଙ୍କ ପୂରା ଟିମ୍ ସିଧା ଡ୍ରେସିଂ ରୁମକୁ ଯାଇଥିଲେ । ହେଲେ ପାକିସ୍ତାନ ପ୍ଲେୟର୍ସ ପାରମ୍ପରିକ ଭାବେ ହାତ ମିଳାଇବାକୁ ଅନାଇ ରହିଥିଲେ । ପାକ୍ ଟିମ୍ ସହ ହାତ ମିଳାଇବା ତ ଦୂରର କଥା ସେମାନଙ୍କ ମୁହଁକୁ ବି ଅନାଇନଥିଲେ ଭାରତୀୟ ଖେଳାଳି । ଯାହାକୁ ନେଇ ପ୍ରତିକ୍ରିୟାଶୀଳ ହୋଇଛନ୍ତି ପାକର ପୂର୍ବତନ ଖଳାଳି ସୋଏବ୍ ଅଖତର । ସେ କହିଛନ୍ତି "ମୁଁ ନିର୍ବାକ୍, ନିରାଶ । ମୁଁ ଜାଣିପାରୁନି କଣ କହିବି। କ୍ରିକେଟକୁ ନେଇ ରାଜନୀତି କରନାହିଁ । ମୁଁ ବହୁତ କିଛି କହି ପାରିବି । ଝଗଡ଼ା ସବୁଠି ହୁଏ, ତୁମ ଘରେ ମଧ୍ୟ ହେଉଛି, ଏହାକୁ ଭୁଲିଯାଅ ଓ ଆଗକୁ ବଢ଼"..

ତେବେ ଅଖତରଙ୍କ ଏ ବୟାନ ପରେ ଭାରତୀୟମାନେ ମଧ୍ୟ ଦୃଢ଼ ଜବାବ ରଖିଛନ୍ତି । ଘର କଳି ଏବଂ ଆତଙ୍କୀ ହମଲା ମଧ୍ୟରେ କି ପାର୍ଥକ୍ୟ ଥାଏ ତାହା ଅଖତରଙ୍କୁ ଜଣାଇଛନ୍ତି ଭାରତୀୟ ୟୁଜର୍ସ । ଏହାଛଡ଼ା କିଛି ୟୁଜର୍ସ ଲେଖିଛନ୍ତି ଘର ମଧ୍ଯର କଳି ଓ ଦେଶର ନାଗରିକଙ୍କ ଉପରେ ଆଟାକ୍ କରି ଜୀବନ ନେବା ସମାନ ନୁହେଁ । ଭାରତୀୟ ଟିମ ଯାହା ବି କରିଛନ୍ତି ଉଚିତ୍ କରିଛନ୍ତି । ଆତଙ୍କବାଦୀଙ୍କୁ ପ୍ରଶୟ ଦେଉଥିବା ରାଷ୍ଟ୍ର ସହ ଭାରତ ହାତ ନ ମିଳାଇବା ଉଚିତ ।

ପହଲଗାମ ଆତଙ୍କୀ ହମଲା, ଅପରେସନ ସିନ୍ଦୂର ପରେ ଭାରତ-ପାକ୍ ମ୍ୟାଚ୍ ନ ଖେଳାଯାଉ ଏହା ସମସ୍ତେ ଚାହୁଁଥିଲେ । ଭାରତରେ ମ୍ୟାଚକୁ ବୟକଟ୍ ଟ୍ରେଣ୍ଡ୍ ବି ଦେଖିବାକୁ ମିଳିଥିଲା । ପାକ୍ ବିପକ୍ଷ ଏହି ମ୍ୟାଚରେ ଟିକେଟ୍ ବିକ୍ରିରେ ବି ମାନ୍ଦାବସ୍ଥା ଦେଖିବାକୁ ମିଳିଥିଲା । ଆଉ ଏତେ ସବୁ ମଧ୍ୟରେ ଭାରତୀୟ ଖେଳାଳିଙ୍କ ପାକିସ୍ତାନ ଉପରେ ବିଜୟ ଦେଶରେ ଖୁସିର ମାହୋଲ ଆଣିଦେଇଛି ।