Earthquake / ଇଣ୍ଡୋନେସିଆରେ ୫.୨ ତୀବ୍ରତାର ଭୂକମ୍ପ, ଭାରତ ଓ ମିଆଁମାରରେ ମଧ୍ୟ ଝଟକା

ଭାରତ, ଇଣ୍ଡୋନେସିଆ ଓ ମିଆଁମାରରେ ରାତିଠାରୁ ଆଜି ସକାଳ ପର୍ଯ୍ୟନ୍ତ ଏକାଧିକ ସ୍ଥାନରେ ଭୂକମ୍ପର ଝଟକା ଅନୁଭୂତ ହୋଇଛି । ଜାତୀୟ ଭୂକମ୍ପ ବିଜ୍ଞାନ କେନ୍ଦ୍ର (NCS) ଏହି ଭୂକମ୍ପଗୁଡ଼ିକୁ ନିଶ୍ଚିତ କରିଛି । ତେବେ ଏପର୍ଯ୍ୟନ୍ତ କୌଣସି ଦେଶରେ ଜୀବନହାନି କିମ୍ବା ବଡ଼ଧରଣର ସମ୍ପତ୍ତି କ୍ଷୟକ୍ଷତି ହୋଇଥିବା ଖବର ମିଳିନାହିଁ ।

NCSର ସୂଚନା ଅନୁଯାୟୀ, ଇଣ୍ଡୋନେସିଆରେ ଆଜି ସକାଳ ୫ଟା ୦୭ ମିନିଟରେ ୫.୨ ତୀବ୍ରତାର ଭୂକମ୍ପ ଅନୁଭୂତ ହୋଇଥିଲା । ଭୂପୃଷ୍ଠଠାରୁ ପ୍ରାୟ ୧୦ କିଲୋମିଟର ଗଭୀରତାରେ ଏହାର କେନ୍ଦ୍ରସ୍ଥଳ ରହିଥିଲା । ଭୂକମ୍ପର ଝଟକା ଅନୁଭବ ହେବା ପରେ ଇଣ୍ଡୋନେସିଆର ଅନେକ ଲୋକ ଭୟରେ ଘରୁ ବାହାରକୁ ଚାଲିଆସିଥିଲେ । କିଛି ଲୋକ ଅନେକ ସମୟ ଧରି ରାସ୍ତାରେ ରହିଥିବା ଜଣାପଡ଼ିଛି । ସରକାର ପକ୍ଷରୁ ରିଲିଫ୍ ଓ ଉଦ୍ଧାରକାରୀ ଦଳକୁ ପ୍ରଭାବିତ ଅଞ୍ଚଳରେ ମୁତୟନ କରାଯାଇଛି ।

ଏହା ପୂର୍ବରୁ ମିଆଁମାରରେ ରାତି ୧୧ଟା ୪୨ ମିନିଟରେ ୪.୬ ତୀବ୍ରତାର ଭୂକମ୍ପ ହୋଇଥିଲା । ଭାରତର ମଧ୍ୟ ଏକାଧିକ ଅଞ୍ଚଳରେ ଭୂକମ୍ପ ଝଟକା ଅନୁଭୂତ ହୋଇଛି । ତ୍ରିପୁରାର ଧଲାଇରେ ରାତି ୧୨ଟା ୫୭ ମିନିଟରେ ୩.୮ ତୀବ୍ରତାର ଭୂକମ୍ପ ହୋଇଥିବା ବେଳେ ଏହାର କେନ୍ଦ୍ର ୩୦ କିଲୋମିଟର ଗଭୀରରେ ଥିଲା । ସେହିପରି ମଧ୍ୟପ୍ରଦେଶର ନରସିଂହପୁରରେ ରାତି ୧ଟା ୧୬ ମିନିଟରେ ୨.୫ ତୀବ୍ରତାର ଭୂକମ୍ପ ରେକର୍ଡ ହୋଇଛି ।

ଭୂକମ୍ପ ସମୟରେ କ’ଣ କରିବେ ?
ବିଶେଷଜ୍ଞଙ୍କ ଅନୁଯାୟୀ, ଭୂକମ୍ପ ସମୟରେ ଭୟଭୀତ ନହୋଇ ସତର୍କ ରହିବା ଆବଶ୍ୟକ । ଘର କିମ୍ବା ଅଫିସ୍ ଭିତରେ ଥିଲେ ମଜବୁତ ଟେବୁଲ୍ କିମ୍ବା ଫର୍ନିଚର ତଳେ ଆଶ୍ରୟ ନେଇ ମୁଣ୍ଡ ଓ ବେକକୁ ହାତରେ ସୁରକ୍ଷିତ ରଖିବା ଉଚିତ । ଝରକା, କାଚ ଓ ଭାରୀ ସାମଗ୍ରୀଠାରୁ ଦୂରେ ରହିବା ସହ ଲିଫ୍ଟ ବ୍ୟବହାର ନକରିବାକୁ ପରାମର୍ଶ ଦିଆଯାଇଛି ।

ବାହାରେ ଥିଲେ କୋଠାବାଡ଼ି, ଗଛ, ବିଦ୍ୟୁତ୍ ଖୁଣ୍ଟ ଓ ତାରଠାରୁ ଦୂରେ ରହିବା ଦରକାର । ଗାଡ଼ି ଚଳାଉଥିବା ସମୟରେ ଭୂକମ୍ପ ହେଲେ ସୁରକ୍ଷିତ ସ୍ଥାନରେ ଗାଡ଼ି ଅଟକାଇ ଝଟକା ଶେଷ ହେବା ପର୍ଯ୍ୟନ୍ତ ଗାଡ଼ି ଭିତରେ ରହିବା ଉଚିତ । ଏଥିସହ ଗୁଜବକୁ ବିଶ୍ୱାସ ନକରି କେବଳ ସରକାରୀ ସୂଚନା ଉପରେ ଭରସା କରିବାକୁ ବିଶେଷଜ୍ଞମାନେ ପରାମର୍ଶ ଦେଇଛନ୍ତି ।