ଯୁଦ୍ଧବିରତି ପରେ ଜୋରଦାର ଆକ୍ରମଣ । ଦୋହଲିଗଲା ଗାଜା । ଜାନୁଆରୀ ୧୯ରୁ ଆରମ୍ଭ ହୋଇଥିବା ଯୁଦ୍ଧବିରତି ପରେ ପୁଣି ଥରେ ଆକ୍ରମଣ ଶାଣିତ କରିଛି ଇସ୍ରାଏଲ୍ । ଗାଜା ପଟ୍ଟିରେ ହମାସକୁ ଟାର୍ଗେଟ୍ କରା ଯାଉଥିବା କହିଛି ଇସ୍ରାଏଲ୍ ଡିଫେନ୍ସ ଫୋର୍ସ । ଇସ୍ରାଏଲ୍‌ର ଏୟାର ଷ୍ଟ୍ରାଇକ୍‌ରେ ପ୍ରାୟ ୬୬ ଜଣଙ୍କ ମୃତ୍ୟୁ ହୋଇଥିବା ଜଣାପଡ଼ିଛି ।

ଇସ୍ରାଏଲ୍‌ର ଆକ୍ରମଣ ଭିତରେ ଗାଜାରେ ଉଦ୍ଧାର ଓ ରିଲିଫ୍ କାର୍ଯ୍ୟ ଜାରି ରହିଛି । ପବିତ୍ର ରମଦାନ ସମୟରେ ଏଭଳି ଆକ୍ରମଣ ହୋଇଛି । ଗାଜା ପଟ୍ଟିର ଏକାଧିକ ସ୍ଥାନରେ ଆକ୍ରମଣ ହୋଇଥିବା ବେଳେ ୧୫୦ରୁ ଅଧିକ ଲୋକ ଆହତ ହୋଇଥିବା ଜଣାପଡ଼ିଛି । ଆକ୍ରମଣ ନେଇ ଇସ୍ରାଏଲ୍ ସେନା ପକ୍ଷରୁ ଏକ୍ସରେ ପୋଷ୍ଟ କରାଯାଇଛି । ଯେଉଁଥିରେ କୁହାଯାଇଛି, ଗାଜା ପଟ୍ଟିରେ ଥିବା ହମାସ ଆତଙ୍କବାଦୀଙ୍କୁ ଟାର୍ଗେଟ୍ କରାଯାଉଛି ।

ଏହା ପୂର୍ବରୁ ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁଙ୍କ କାର୍ଯ୍ୟାଳଯ ପକ୍ଷରୁ ଏୟାର ଷ୍ଟ୍ରାଇକ୍ ପାଇଁ ନିର୍ଦ୍ଦେଶ ଦିଆ ଯାଇଥିଲା । ଯୁଦ୍ଧବିରତି ସମୟରେ ହମାସ ଏକାଧିକ ପଣବନ୍ଦୀଙ୍କୁ ଛାଡ଼ି ନଥିଲା । ଏପରିକି ଆମେରିକା ରାଷ୍ଟ୍ରପତିଙ୍କ ମଧ୍ୟସ୍ଥତାରେ ଦିଆ ଯାଇଥିବା ଏକାଧିକ ପ୍ରସ୍ତାବକୁ ଗ୍ରହଣ କରି ନଥିଲା ହମାସ୍ । ଏହା ପରେ ଇସ୍ରାଏଲ୍ ଆକ୍ରମଣକୁ ଶାଣିତ କରିଛି ।

ଆଇଡିଏଫ୍ କହିଛି, ହମାସ୍ ବିରୋଧରେ ଆକ୍ରମଣକୁ ଆହୁରି ଜୋରଦାର କରାଯିବ । ନେତନ୍ୟାହୁ କହିଛନ୍ତି, ଯୁଦ୍ଧବିରତି ଉଲ୍ଲଂଘନ ଓ ଚୁକ୍ତି ବଦଳାଇବା ଲାଗି ହମାସ୍ ସମ୍ପୂର୍ଣ୍ଣ ଭାବେ ଦାୟୀ । ସେପଟେ ଗାଜା ଉପରେ ଏୟାର ଷ୍ଟ୍ରାଇକ୍ ପୂର୍ବରୁ ଆମେରିକା ସହ ଇସ୍ରାଏଲ୍ ଆଲୋଚନା କରିଥିବା ସୂଚନା ଦେଇଛନ୍ତି ହ୍ଵାଇଟ୍ ହାଉସ୍‌ର ଜଣେ ମୁଖପାତ୍ର ।

ଇସ୍ରାଏଲ୍-ହମାସ୍ ମଧ୍ୟରେ ଜାନୁଆରୀ ୧୯ରୁ ଆରମ୍ଭ ହୋଇଥିଲା ଯୁଦ୍ଧବିରତି । ଯେଉଁଥିରେ ହମାସ୍ ୩୩ ଇସ୍ରାଏଲ୍ ନାଗରିକଙ୍କ ସହ ୫ ଜଣ ଥାଇ ନାଗରିକଙ୍କୁ ମୁକ୍ତ କରିଥିଲା । ପ୍ରତି ବଦଳରେ ୨୦୦୦ ପାଲେଷ୍ଟାଇନ୍ ବନ୍ଦୀଙ୍କୁ ମୁକ୍ତ କରିଥିଲା ଇସ୍ରାଏଲ୍ । ଏବେ ହମାସ୍ କବଳରେ ୫୯ ଜଣ ପଣବନ୍ଦୀ ଥିବା ଇସ୍ରାଏଲ୍ କହୁଛି ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV