ଅର୍ଗସ ବ୍ୟୁରୋ:  ମଧ୍ୟ ପ୍ରାଚ୍ୟରେ ଜାରି ରହିଥିବା ଯୁଦ୍ଧ ଭୂମିରୁ ସାମ୍ନାକୁ ଆସିଛି ଛାତି ଥରାଇଦେଲା ଭଳି ତଥ୍ୟ । ଗାଜାର ସବୁଠୁ ବଡ଼ ଶରଣାର୍ଥୀ ଶିବିରରେ ହୋଇଛି ଘନ ଘନ ରକେଟ ମାଡ଼ । ଶତାଧିକ ଜୀବନ ହାରିଥିବା ବେଳେ ଅନେକ ଗୁରୁତର ଆହତ ହୋଇଥିବା ଅନ୍ତର୍ଜାତୀୟ ଗଣମାଧ୍ୟମରେ ରିପୋର୍ଟ ପ୍ରକାଶ ପାଇଛି । ତେବେ ଏହି ଆକ୍ରମଣରେ 50ରୁ ଉର୍ଦ୍ଧ୍ବ ଆତଙ୍କବାଦୀ ନିପାତ ହୋଇଥିବା ଦାବି କରିଛି ଇସ୍ରାଏଲି ଡିଫେନ୍ସ ଫୋର୍ସ । 

ଏହି ଏୟାର ଷ୍ଟ୍ରାଇକରେ ଅକ୍ଟୋବର 7ର ଇସ୍ରାଏଲ ଆଟାକ ସହ ଲିଙ୍କ ଥିବା ହମାସ କମାଣ୍ଡରଙ୍କ ମଧ୍ୟ ମୃତ୍ୟୁ ହୋଇଥିବା ସୂଚନା ଦେଇଛି ଇସ୍ରାଏଲି ସେନା । ଏହି ଘଟଣାରେ ହମାସ ପ୍ରତିଶୋଧ ପରାୟଣ ହୋଇଛି । ହାମାସର ସାମରିକ ୱିଙ୍ଗ୍ ଏଜେଡାଇନ୍ ଅଲ-କାସମ ବ୍ରିଗେଡ୍ସ ପରୋକ୍ଷରେ ଇସ୍ରାଏଲି ସେନାକୁ ଚେତାବନୀ ଦେଇଛି । କୌଣସି ବିଧିବଦ୍ଧ ବିବୃତି ଜାରି କରିନଥିଲେ ମଧ୍ୟ ଗାଜାକୁ ଇସ୍ରାଏଲ୍ ସୈନ୍ୟବାହିନୀଙ୍କ ପାଇଁ କବରସ୍ଥାନରେ ପରିଣତ କରିବାକୁ ଚେତାବନୀ ଦେଇଛି ଅଲ-କାସମ ବ୍ରିଗେଡ୍ସ । 

ଗାଜାର ସ୍ବାସ୍ଥ୍ୟ ମନ୍ତ୍ରାଳୟ ଯୁଦ୍ଧରେ ମୃତ୍ୟୁ ସଂଖ୍ୟା ନେଇ ରିପୋର୍ଟ ଜାରି କରିବାର କିଛି ଘଣ୍ଟା ପରେ ଏହି ଆକ୍ରମଣ କରାଯାଇଛି । ରିପୋର୍ଟ ଅନୁଯାୟୀ ଗାଜାରେ ମୃତ୍ୟୁ ସଂଖ୍ୟା 8 ହଜାର 525 ଛୁଇଁଛି । ଯେଉଁଥିରେ 3 ହଜାର 452 ଶିଶୁଙ୍କ ସମେତ 2 ହଜାର 187 ମହିଳା ଜୀବନ ହାରିଛନ୍ତି । ଏ ସବୁ ଭିତରେ ଆସନ୍ତା ଶୁକ୍ରବାର ପୁଣିଥିରେ ଇସ୍ରାଏଲ ଗସ୍ତରେ ଯାଉଛନ୍ତି ଆମେରିକାର ସେକ୍ରେଟାରୀ ଅଫ୍ ଷ୍ଟେଟ୍ ଆଣ୍ଟୋନି ବ୍ଲିଙ୍କେନ୍ । ଇସ୍ରାଏଲ ଅଧିକାରୀଙ୍କ ସହ ଯୁଦ୍ଧ ରୋକିବା ନେଇ ଆଲୋଚନା କରିପାରନ୍ତି ବୋଲି ଅନ୍ତର୍ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି ।

ବିଦେଶ ଖବର ଆହୁରି ପଢନ୍ତୁ