କାଳିଆ ସାଆନ୍ତ ଡାକିଲେ 'ଓ' କରନ୍ତି । ଏ କଥା ଖାଲି ଶୁଣା କଥା ନୁହେଁ ଅଙ୍ଗେ ନିଭା କଥା । ସତରେ ତାକୁ ଡାକିଲେ ସେ 'ଓ' କରେ । ନିଜକୁ ସମର୍ପି ଦେଲେ ଯେତେ ବଡ ବିପତ୍ତି ଆସୁ ନା କାହିଁ ସେ ଉଦ୍ଧାର କରିନିଏ । ସେମିତି ଜଣେ ଫରାସୀ ଭକ୍ତ..ଯିଏ ବିପତ୍ତି ସମୟରେ ମହାପ୍ରଭୁଙ୍କୁ ଡାକିଲେ...ଆଉ ଆମ ଜଗା ଓ କଲା । ବିପତ୍ତି ଦୂରେଇ ଗଲା । ସତରେ ସେ ଲୀଳାମୟଙ୍କ ଏମିତି ଅନେକ କାହାଣୀ... ତା' ମଧ୍ୟରୁ ଇଏ ଗୋଟିଏ..ଆସନ୍ତୁ ଜାଣିବା...

1745-16 ମସିହାର କଥା । ଜାହାଜଟିଏ ଫ୍ରାନ୍ସରୁ ବାହାରି ଭାଜରତର ପୁଡୁଚେରୀ ଅଭିମୁଖେ ଯାତ୍ରା କରୁଥାଏ। ଜାହାଜର କ୍ୟାପଟେନ ଥାଆନ୍ତି ଆଲବକ ବିଟ ସାହେବ । ଜାହାଜରେ ସେ ଏକ ବିରାଟ ଘଣ୍ଟି ନେଇ ଯାଉଥିଲେ । ପୁଡୁଚେରୀ ସ୍ଥିତ ଏକ ଗୀର୍ଜାକୁ । ହେଲେ ଜାହାଜରେ ଏମିତି କିଛି ଘଟିଲା ସେ ଘଣ୍ଟିକୁ ସେ ମହାପ୍ରଭୁଙ୍କୁ ସମର୍ପି ଦେଲେ ।

ଫ୍ରାନ୍ସରୁ ପୁଡୁଚେରୀ ଯାଉଥିବା ଜାହାଜରେ ଅନେକ ଫରାସୀ ଯାତ୍ରୀ ଥାଆନ୍ତି । ତା ଭିତରେ ଜଣେ ମାତ୍ର ଓଡିଆ ଯାତ୍ରା କରୁଥାଆନ୍ତି । ସମୁଦ୍ରର ଲହଡି ଭାଙ୍ଗି ଆଗକୁ ଆଗକୁ ମାଡି ଚାଲିଥାଏ ଜାହାଜ । ଦେଖାଗଲା ଜାହାଜ ଆଡକୁ ବିଶାଳ ଝଡବତାସ ରାକ୍ଷସ ଭଳି ମାଡି ଆସୁଛି । ମାଡି ଆସୁଥିବା ଝଡର ରୂପ ଦେଖି ଲାଗୁଥିଲା, ଯେମିତି ନିମିଷକେ ଜାହାଜ ଧ୍ୱଂସ ପାଇଯିବ । ଯାତ୍ରୀମାନେ ଆର୍ତ୍ତ ଚିତ୍କାର କଲେ । ମୃତ୍ୟୁକୁ ପାଖରୁ ଦେକି ସମସ୍ତେ ଥର ହର । ହେଲେ ଏ ବ୍ୟସ୍ତ ଭିତରେ ଜଣେ ଓଡିଆ ଲୋକ ଥିଲେ । ଯିଏ ଝଡକୁ ସାମନାରେ ଦେଖି ମଧ୍ୟ ଶାନ୍ତ ଥିଲେ ..ନିରନ୍ତର ମହାପ୍ରଭୁଙ୍କୁ ପ୍ରାର୍ଥନା କରୁଥିଲେ । ଏହା ଦେଖି କ୍ୟାପଟେନ୍ ବିଟ୍ ସାହେବ ଆଶ୍ଚର୍ଯ୍ୟ ହେଲେ । ପଚାରିଲେ ସମସ୍ତେ ଏଠି ଡରରେ ଥରୁଛନ୍ତି..ଆପଣ କେମିତି ଏତେ ଶାନ୍ତ କଣ ଆପଣଙ୍କୁ ମୃତ୍ୟୁକୁ ଭୟ ନାହିଁ।

ଏହାସହ ପଢ଼ନ୍ତୁ: IMD ର ବଡ଼ ଆଲର୍ଟ: ଦିଲ୍ଲୀରୁ ବିହାର ପର୍ଯ୍ୟନ୍ତ ଝଡ଼-ବର୍ଷା, ୬୦ କିମି ବେଗରେ ବହିବ ପବନ

ଏହା ଶୁଣି ଓଡିଆ ଲୋକ ଜଣଙ୍କ କହିଲେ ମୋ ନାଁ କୁଳଶେଖର ସୌଦାଗର । ଘର ପୁରୀ । ଆଉ ମୋ ପ୍ରଭୁ ହେଉଛନ୍ତି କାଳିଆ ସାଆନ୍ତ । ତାଙ୍କୁ ମୁଁ ମୋ ନିଜକୁ ସମର୍ପି ଦେଇଛି । ଆପଣ ବି ଭକ୍ତିରେ ଆପଣଙ୍କ ଭାଷାରେ ପ୍ରଭୁଙ୍କ ନିକଟରେ ନିଜର ନିବେଦନ କରନ୍ତୁ । ମହାପ୍ରଭୁ ନିଶ୍ଚୟ ଯାତ୍ରୀଙ୍କ ସୁରକ୍ଷା କରିବେ । ଏହା ଶୁଣି କ୍ୟାପଟେନ୍ ମହାପ୍ରଭୁଙ୍କୁ ଡାକିଲେ...ସତକୁ ସତ କିଛିଟା କ୍ଷଣରେ ସବୁ ପରିବର୍ତ୍ତନ ହେଇଗଲା । ଝଡ ଆପେ ଆପେ ଶାନ୍ତ ପଡିଗଲା । ଏସବୁ ଆଖି ଆଗରେ ଦେଖି କ୍ୟାପଟେନଙ୍କର ଆଶ୍ଚର୍ଯ୍ୟର ସୀମା ନଥିଲା । କହିଲେ ମୁଁ ସେହି ଠାକୁରଙ୍କୁ ଦେଖିବି । ଯାହାର ମୁଁ ପ୍ରାର୍ଥନା ଏବେ କଲି ।

ସେ ତା' ପରେ ପୁରୀ ଆସିଲେ । ପତିତପାବନଙ୍କୁ ଦର୍ଶନ କଲେ । ପୁଡୁଚେରୀ ଗୀର୍ଜାକୁ ନେଇ ଯାଉଥିବା ବଡ ଘଣ୍ଟିକୁ ମହାପ୍ରଭୁଙ୍କ ଉଦ୍ଦେଶ୍ୟରେ ଅର୍ପଣ କରିଦେଲେ । ଆଉ ସେବେଠୁ ନୀଳାଦ୍ରୀ ସଂଗ୍ରହାଳୟ ପ୍ରବେଶ ପଥରେ ବାମ ପାର୍ଶ୍ୱରେ ଘଣ୍ଟିଟି ଶୋଭା ପାଉଛି । ବିପତ୍ତି ବେଳେ ମହାପ୍ରଭୁ କେମିତି ସାହା ହୁଅନ୍ତି...ଏହା ତାହାର ଗୋଟେ ଉଦାହରଣ ।