ହତ୍ୟା ଅଭିଯୁକ୍ତ, ଜେଲ୍‌ରେ କାଟିଲେ ୪ ଦଶନ୍ଧି । ଶେଷ ଯାଏଁ ଭଉଣୀ ଲଢ଼ିଲେ, ପ୍ରମାଣ ଜୁଟାଇ ଭାଇକୁ ନିର୍ଦ୍ଦୋଷରେ ମୁକୁଳାଇଲେ । ପ୍ରମାଣ ମିଳିଲା, ହତ୍ୟା ସହ ନାହିଁ ୪୭ ବର୍ଷ ଧରି ଜେଲ୍‌ରେ ଥିବା ବ୍ୟକ୍ତିଙ୍କ ସମ୍ପର୍କ । ଜେଲ୍‌ରେ ନିଜ ଜୀବନ ବିତାଇଥିବା ସେହି ବ୍ୟକ୍ତିଙ୍କୁ ଏବେ ସରକାର ୧୨ କୋଟି ଟଙ୍କା କ୍ଷତିପୂରଣ ଦେବେ । ଏଭଳି ଘଟଣା ଘଟିଛି ଜାପାନରେ ।

ହତ୍ୟାର ମିଛ ଅଭିଯୋଗରେ ୮୯ ବର୍ଷୀୟ ଇୱାଓ ହାକାମାଦା ଜେଲ୍‌ରେ ୪୭ ବର୍ଷ ରହିବା ପରେ ମୁକୁଳିଛନ୍ତି । ଜାପାନ ସରକାର ତାଙ୍କୁ କ୍ଷତିପୂରଣ ବାବଦକୁ ୧୨ କୋଟି ଟଙ୍କା ଦେବାକୁ ନିଷ୍ପତ୍ତି ନେଇଛନ୍ତି । ସୂଚନା ଅନୁସାରେ, ୧୯୬୬ ମସିହାରେ ତାଙ୍କ ବସ୍‌ଙ୍କ ସହ ପତ୍ନୀ ଓ ୨ ଛୁଆଙ୍କୁ ହତ୍ୟା ସହ ଘରେ ନିଆଁ ଲଗାଇ ୨୦୦, ୦୦୦ ୟେନ (ଜାପାନୀ ମୁଦ୍ରା) ଚୋରି ନେଇ ହାକାମାଦାଙ୍କ ନାଁରେ ଅଭିଯୋଗ ହୋଇଥିଲା ।

ଆଉ ୪ ଜଣଙ୍କୁ ହତ୍ୟା ଓ ଚୋରି ଅଭିଯୋଗରେ ପୋଲିସ ହାକାମାଦାଙ୍କୁ ୧୯୬୮ରେ ଗିରଫ କରି ନେଇଥିଲା । ଆଉ ସେବେଠୁ ୨୦୧୪ ପର୍ଯ୍ୟନ୍ତ ଜେଲ୍‌ରେ ଅର୍ଦ୍ଧାଧିକ ଜୀବନ ବିତାଇଥିଲେ ହାକାମାଦା । ଗତବର୍ଷ ସେପ୍ଟେମ୍ବରରେ ଜାପାନର ଏକ କୋର୍ଟ ହାକାମାଦାଙ୍କୁ ସମସ୍ତ ମାମଲାରେ ନିର୍ଦ୍ଦୋଷରେ ଖଲାସ କରିଥିଲେ ।

ପ୍ରମାଣ ଦେଇ ଖଲାସ କଲେ ଭଉଣୀ

ହାକାମାଦାଙ୍କ ଭଉଣୀ ହିଦେକୋ ଭାଇଙ୍କୁ ନିର୍ଦ୍ଦୋଷ ସାବ୍ୟସ୍ତ ଲାଗି ଅନେକ ବର୍ଷ ଧରି ପରିଶ୍ରମ କରିଥିଲେ । ଆଉ ଭାଇ ପାଇଁ ଭଉଣୀ କରିଥିବା ବର୍ଷ ବର୍ଷର ପରିଶ୍ରମ ସାର୍ଥକ ହୋଇଛି । ଭଉଣୀ ଯୋଗାଡ଼ କରିଥିବା ପ୍ରମାଣ ଆଧାରରେ କୋର୍ଟ ୨୦୧୪ରେ ହାକାମାଦାଙ୍କୁ ଜେଲ୍‌ରୁ ମୁକ୍ତ କରିଥିଲେ । ଆଉ ଗତବର୍ଷ ନିର୍ଦ୍ଦୋଷ ସାବ୍ୟସ୍ତ କରିବା ସହ ୧୨ କୋଟି ଟଙ୍କା କ୍ଷତିପୂରଣ ଦେବାକୁ ଘୋଷଣା କରିଛନ୍ତି ।

ହିଦେକୋ କହିଛନ୍ତି, ମୁଁ ୫୭ ବର୍ଷ ଧରି ଏହି ଦିନର ଅପେକ୍ଷାରେ ରହିଥିଲି, ଆଜି ସେହି ଦିନ ଶେଷରେ ଆସିଛି । ମୋ କାନ୍ଧରୁ ଏକ ବଡ଼ ବୋଝ ହାଲ୍‌କା ହୋଇଛି । ହାକାମାଦାଙ୍କୁ ଗିରଫ ପରେ ସେ ସମସ୍ତ ଅଭିଯୋଗକୁ ଅସ୍ଵୀକାର କରିଥିଲେ । କିନ୍ତୁ ପରେ ସମସ୍ତ ଅଭିଯୋଗକୁ ମାନି ନେଇଥିଲେ ।

ଆଉ କୋର୍ଟରେ ଶୁଣାଣି ବେଳେ ଜଣାପଡ଼ିଥିଲା ତାଙ୍କୁ ମାଡ଼ ମାରି ଦୋଷ ସ୍ଵୀକାର କରିବାକୁ ବାଧ୍ୟ କରାଯାଇଥିଲା । ଏପରିକି ପୀଡ଼ିତଙ୍କ କପଡ଼ା ଓ ହାକାମାଦାଙ୍କ ଡିଏନ୍ଏ ମେଳ ଖାଇ ନଥିବା ବେଳେ ମିଛ ପ୍ରମାଣ ଯୋଗାଡ଼ କରାଯାଇଥିଲା । ଆଉ ଏବେ ହାକାମାଦା ମୁକ୍ତ ହୋଇଛନ୍ତି । ଏହା ଜାପାନର ସବୁଠୁ ଲମ୍ବା ଓ ପ୍ରସିଦ୍ଧ ଆଇନ୍ ମାମଲା ମଧ୍ୟରୁ ଅନ୍ୟତମ । ଏଥିସହ ସେ ବିଶ୍ଵର ସବୁଠୁ ଅଧିକ ସମୟ ଧରି ଜେଲ୍‌ରେ ହତ୍ୟା ଅଭିଯୁକ୍ତ ଭାବେ ରହିବାରେ ରେକର୍ଡ କରିଛନ୍ତି ।