ଜାପାନର ଇତିହାସରେ ପ୍ରଥମ। ପ୍ରଧାନମନ୍ତ୍ରୀ ଗାଦିରେ ବସିଲେ ଜଣେ ମହିଳା। ଜାପାନର ଆଇରନ ଲେଡି ଭାବେ ଜଣାଶୁଣା ସାନାଏ ତାକାଇଚିଙ୍କୁ ଜାପାନ ସଂସଦ ପକ୍ଷରୁ ପ୍ରଧାନମନ୍ତ୍ରୀ ଭାବେ ଚୟନ କରାଯାଇଛି। ଲିବରେଶନ ଡେମୋକ୍ରାଟିକ୍ ପାର୍ଟିର ମୁଖ୍ୟ ସାନାଏ ତାକାଇଚି ଏବେ ଶିଗେରୁ ଇଶିବାଙ୍କ ସ୍ଥାନ ନେବେ। ଆଜି ସଂଧ୍ୟାରେ ସାନାଏ ତାକାଇଚି ଜାପାନର ପ୍ରଥମ ମହିଳା ପ୍ରଧାନମନ୍ତ୍ରୀ ଭାବେ ଶପଥ ନେବେ। ନିର୍ବାଚନରେ ଡେମୋକ୍ରାଟିକ୍ ପାର୍ଟିର ପ୍ରାର୍ଥୀ ​​ସାନାଏ ତାକାଇଚି ପୂର୍ବତନ ପ୍ରଧାନମନ୍ତ୍ରୀ ଜୁନିଚିରୋ କୋଇଜୁମିଙ୍କ ପୁଅ ସିଞ୍ଜିରୋ କୋଇଜୁମିଙ୍କୁ ପରାସ୍ତ କରିଥିଲେ।

ତାକାଇଚି ପୂର୍ବରୁ ଜାପାନର ରାଜନୈତିକ ବ୍ୟବସ୍ଥାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି। ସେ ପୂର୍ବତନ ଆଭ୍ୟନ୍ତରୀଣ ବ୍ୟାପାର ମନ୍ତ୍ରୀ ଥିଲେ ଏବଂ ଦେଶର ରାଜନୀତିରେ ଜଣେ ରକ୍ଷଣଶୀଳ ଜାତୀୟତାବାଦୀ ନେତା ଭାବରେ ଜଣାଶୁଣା। ସେ ଏବେ LDPର ବର୍ତ୍ତମାନର ପ୍ରଧାନମନ୍ତ୍ରୀ ଶିଗେରୁ ଇଶିବାଙ୍କୁ ବଦଳାଇ ସରକାରର ମଙ୍ଗ ଧରିପାରିବେ। ରାଜନୈତିକ ବିଶ୍ଳେଷକମାନେ କହିଛନ୍ତି ଯେ ତାକାଇଚିଙ୍କ ନେତୃତ୍ୱ ଜାପାନ ରାଜନୀତିରେ କେବଳ ଲିଙ୍ଗ ସନ୍ତୁଳନର ପ୍ରତୀକ ହେବ ନାହିଁ, ବରଂ ଦେଶର ବୈଦେଶିକ ନୀତି ଏବଂ ଆଭ୍ୟନ୍ତରୀଣ ଦିଗରେ ଏକ ନୂତନ ଅଧ୍ୟାୟ ମଧ୍ୟ ସୃଷ୍ଟି କରିବ।

ସାନାଏ ତାକାଇଚିଙ୍କ ସବୁଠାରୁ ବଡ଼ ଶକ୍ତି ହେଉଛି ତାଙ୍କର ଆନ୍ତର୍ଜାତୀୟ ବୁଝାମଣା ଏବଂ ଆମେରିକା ସହିତ ଗଭୀର ସମ୍ପର୍କ। ସେ ତାଙ୍କ କ୍ୟାରିୟରର ପ୍ରାରମ୍ଭରେ ଆମେରିକାରେ କାର୍ଯ୍ୟ କରିଥିଲେ। ଦୀର୍ଘ ସମୟ ଧରି ଦୁଇ ଦେଶ ମଧ୍ୟରେ ସମ୍ପର୍କକୁ ନିକଟରୁ ନିରୀକ୍ଷଣ କରିଛନ୍ତି। ତାକାଇଚି କହିଛନ୍ତି ଯେ ସେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହିତ ଏକ ଦୃଢ଼ ବ୍ୟକ୍ତିଗତ ସମ୍ପର୍କ ଆମ ପାଇଁ ସୁଯୋଗ। କାରଣ ତାଙ୍କର ନୀତି "ଜାପାନ ଫାଷ୍ଟ" ଉପରେ କେନ୍ଦ୍ରିତ, ଯାହା ଟ୍ରମ୍ପଙ୍କ "ଆମେରିକା ଫାଷ୍ଟ" ସହିତ ସମନ୍ୱୟ ରଖେ।

ତାକାଇଚିଙ୍କ ଆକଳନ ଜାପାନ ଏହାର ସାମରିକ ଏବଂ ଅର୍ଥନୈତିକ ନୀତିରେ ଆତ୍ମନିର୍ଭରଶୀଳତା ବୃଦ୍ଧି କରିବା ଉଚିତ । ସେ ବିଶ୍ୱାସ କରନ୍ତି ଯେ ଜାପାନ ତାର ଆଞ୍ଚଳିକ ଏବଂ ବିଶ୍ୱ ଭୂମିକାକୁ ଦୃଢ଼ ଭାବରେ ପ୍ରତିଷ୍ଠା କରିବା ଉଚିତ। ରାଜନୈତିକ ବିଶେଷଜ୍ଞଙ୍କ ଅନୁଯାୟୀ, ତାକାଇଚିଙ୍କ ଏହି ନୀତି ଆମେରିକା ସହିତ ସମ୍ପର୍କକୁ ଗଭୀର କରିପାରେ, କିନ୍ତୁ ଏହା ପଡ଼ୋଶୀ ଦେଶମାନଙ୍କ ସହିତ ସମ୍ପର୍କ ସନ୍ତୁଳନ କରିବାରେ ତାଙ୍କର ସବୁଠାରୁ ବଡ଼ ଚ୍ୟାଲେଞ୍ଜ ସୃଷ୍ଟି କରିବ।

ସାନାଏ ତାକାଇଚି ତାଙ୍କର ରକ୍ଷଣଶୀଳ ଦୃଷ୍ଟିକୋଣ ଏବଂ ଦ୍ୱିତୀୟ ବିଶ୍ୱଯୁଦ୍ଧର ଐତିହ୍ୟ ସହିତ ଜଡିତ ପ୍ରସଙ୍ଗ ଉପରେ ତାଙ୍କର ଆକ୍ରମଣାତ୍ମକ ମନୋଭାବ ପାଇଁ ଜଣାଶୁଣା। ସେ ଜାପାନର ଯୁଦ୍ଧ ନାୟକମାନଙ୍କ ସ୍ମୃତିରେ ଉତ୍ସର୍ଗୀକୃତ ସ୍ଥଳ ୟାସୁକୁନି ଟେମ୍ପଲ ପରିଦର୍ଶନ କରିବାକୁ ବାରମ୍ବାର ଜିଦ୍ ଧରିଛନ୍ତି। କିନ୍ତୁ ଏହାକୁ ଚୀନ୍ ଏବଂ ଦକ୍ଷିଣ କୋରିଆ ଭଳି ଦେଶରେ ଯୁଦ୍ଧ ଅପରାଧୀଙ୍କୁ ସମ୍ମାନିତ କରିବାର ଏକ ପ୍ରକାର ଭାବରେ ଦେଖାଯାଏ। ତାଙ୍କର ଏହି ମତ ଯୋଗୁଁ ଜାପାନର ପଡ଼ୋଶୀ ଦେଶ ଚୀନ୍ ଏବଂ ଦକ୍ଷିଣ କୋରିଆ ସହିତ ସମ୍ପର୍କରେ ଉତ୍ତେଜନା ବୃଦ୍ଧି ପାଇବାର ଆଶଙ୍କା ରହିଛି। ବିଶେଷଜ୍ଞମାନେ କହିଛନ୍ତି ଯେ ପ୍ରଧାନମନ୍ତ୍ରୀ ହେବା ପରେ, ତାକାଇଚିଙ୍କୁ ଆନ୍ତର୍ଜାତୀୟ ସନ୍ତୁଳନ ବଜାୟ ରଖିବା ପାଇଁ ତାଙ୍କ ମତରେ କିଛି ନମନୀୟତା ଦେଖାଇବାକୁ ପଡିବ, ନଚେତ୍ ଏହା ଆଞ୍ଚଳିକ ସମ୍ପର୍କରେ ପ୍ରଭାବ ପକାଇପାରେ।
 
ଅଧିକ ପଢ଼ନ୍ତୁ ବିଦେଶ ଖବର...