ମାସକ ପାଇଁ ଟ୍ରମ୍ପ ଟାଳିଲେ ଟାରିଫ୍ ନିଷ୍ପତ୍ତି, ମେକ୍ସିକୋ ପରେ କାନାଡ଼ା ଆଶ୍ଵସ୍ତ

ଅର୍ଗସ ବ୍ୟୁରୋ: ଟ୍ରମ୍ପଙ୍କ ଟାରିଫ୍ ୱାରରେ ବ୍ରେକ୍ । ମେକ୍ସିକୋ ପରେ କାନାଡ଼ାକୁ ମିଳିଲା ମାସେ ମହଲତ । କାନାଡ଼ା, ମେକ୍ସିକୋ ଉପରେ ୨୫ ପ୍ରତିଶତ ଟାରିଫ୍ ଲଗାଇ ହଇଚଇ ସୃଷ୍ଟି କରିଥିବା ଟ୍ରମ୍ପ ଏବେ ପଛଘୁଞ୍ଚା ଦେଇଛନ୍ତି । ମେକ୍ସିକୋ ପରେ କାନାଡ଼ାକୁ ବି ୩୦ ଦିନର ଆଶ୍ଵସ୍ତି ଦେଇଛି ଆମେରିକା ।

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ଫୋନ୍ ଯୋଗେ କଥା ହେଲା ପରେ କାନାଡ଼ା ପ୍ରଧାନମନ୍ତ୍ରୀ ଜଷ୍ଟିନ୍ ଟ୍ରୁଡୋ କହିଛନ୍ତି, ଏବେ ପାଇଁ ଆମେରିକା ଟାରିଫ୍ ନିଷ୍ପତ୍ତିକୁ ଟାଳି ଦେଇଛି । ଶନିବାର ଟ୍ରମ୍ପ, କାନାଡ଼ା ଉପରେ ୨୫ ପ୍ରତିଶତ ଟାରିଫ୍ ଲଗାଇଥିଲେ । ଯାହା ଫଳରେ ବିଶ୍ଵ ବଜାରରେ ଅସ୍ଥିରତା ସୃଷ୍ଟି ହୋଇଥିଲା ।

ଜଷ୍ଟିନ୍ ଟ୍ରୁଡୋ କହିଛନ୍ତି, ପ୍ରାୟ ୩୦ ଦିନ ପାଇଁ ଟାରିଫ୍ ରୋକିବାକୁ ଆମେରିକା ସହମତ ହୋଇଛି । କାରଣ ଟ୍ରମ୍ପ ଉଠାଇଥିବା ସୀମା ସମ୍ପର୍କିତ ସମସ୍ୟା ଉପରେ ଅଧିକ ସହଯୋଗ ପାଇଁ ଅଟ୍ଟାୱା ପ୍ରତିଶ୍ରୁତି ଦେଇଛି । ସୀମା ସୁରକ୍ଷା ପ୍ରୟାସକୁ ବଢ଼ାଇବା ଲାଗି ସହମତି ପ୍ରକାଶ କରିଛନ୍ତି ଟ୍ରୁଡୋ ।

ଶନିବାର ଡୋନାଲ୍ଡ ଟ୍ରମ୍ପ, ଅବୈଧ ପ୍ରବେଶ ଓ ମାଦକ ଦ୍ରବ୍ୟ ଚାଲାଣକୁ ନେଇ ରାଷ୍ଟ୍ରୀୟ ସୁରକ୍ଷା ଉପରେ ଚିନ୍ତାବ୍ୟକ୍ତ କରିଥିଲେ । କାନାଡ଼ା, ମେକ୍ସିକୋରୁ ହେଉଥିବା ଅଧିକାଂଶ ଆମଦାନୀ ଉପରେ ୨୫ ପ୍ରତିଶତ ଓ ଚୀନ ଉପରେ ୧୦ ପ୍ରତିଶତ ଟାରିଫ୍ ଲଗାଇବାକୁ ନିର୍ଦ୍ଦେଶ ଦେଇଥିଲେ । ଏହି ଟାରିଫ୍ ମଙ୍ଗଳବାର ରାତିରୁ ଲାଗୁ ହୋଇଥାଆନ୍ତା । ଟ୍ରମ୍ପଙ୍କ ନିଷ୍ପତ୍ତି ପରେ କାନାଡ଼ା ଓ ମେକ୍ସିକୋ ବି ଟାରିଫ୍ ଲଗାଇବେ ବୋଲି କହିଥିଲେ ।

କାନାଡ଼ା ପୂର୍ବରୁ ମେକ୍ସିକୋ ରାଷ୍ଟ୍ରପତି ଟ୍ରମ୍ପଙ୍କ ସହ ଆଲୋଚନା କରିଥିଲେ । ଆଲୋଚନା ପରେ ମେକ୍ସିକୋ ଉପରେ ଲଗାଇଥିବା ଟାରିଫ୍‌କୁ ମାସେ ଟାଳି ଥିଲା ଆମେରିକା । ମେକ୍ସିକୋ ରାଷ୍ଟ୍ରପତି ସିନବାମ କହିଥିଲେ, ଡ୍ରଗ୍ସ ଚାଲାଣ ରୋକିବା ଲାଗି ମେକ୍ସିକୋ, ଆମେରିକା ସୀମାରେ ତୁରନ୍ତ ୧୦ ହଜାର ନ୍ୟାସନାଲ ଗାର୍ଡ ମୁତୟନ କରିବ ।