ବିଚିତ୍ର ନୀତି, ଅଜବ ଚିନ୍ତାଧାରା ପାଇଁ ସବୁବେଳେ ଚର୍ଚ୍ଚିତ ଏକଛତ୍ରବାଦୀ ଶାସକ କିମ୍ ଜଙ୍ଗ୍ ଉନ୍ । ଚୀନ୍ ଗସ୍ତରେ ଥିବାବେଳେ ବିଭିନ୍ନ ରାଷ୍ଟ୍ରମୁଖ୍ୟଙ୍କ ସହିତ ବେଜିଂରେ ଚୀନ୍ ସାମରିକ ପରେଡ୍ ରେ ଯୋଗ ଦେଇଥିଲେ । ଏହି ସମୟରେ ସେ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ ଦ୍ୱିପାକ୍ଷିକ ବୈଠକ ମଧ୍ୟ କରିଥିଲେ । ଆଶ୍ଚର୍ଯ୍ୟଜନକ କଥା ହେଉଛି ଯେ ଏହି ବୈଠକ ପରେ ଉତ୍ତର କୋରିଆର ସୁରକ୍ଷା କର୍ମୀମାନେ କିମ୍ ଜଙ୍ଗ ଉନ୍ ଦ୍ୱାରା ସ୍ପର୍ଶ କରାଯାଇଥିବା ପ୍ରତ୍ୟେକ ଜିନିଷକୁ ସଫା କରୁଥିବାର ଦେଖିବାକୁ ମିଳିଛି । କିମ୍ ଜଙ୍ଗ ଉନ୍ ଙ୍କ ଅଙ୍ଗରକ୍ଷୀମାନେ ଚେୟାର ଏବଂ ଟେବୁଲରେ ଲାଗିଥିବା ତାଙ୍କର ଡିଏନଏ ବାହାର କରିବାକୁ ଚେଷ୍ଟା କରୁଥିଲେ ।

ଯେତେବେଳେ ଚୀନ୍ ରାଜଧାନୀ ବେଜିଂରେ ଏକ ବିଶାଳ ସାମରିକ ପରେଡ୍ ପରେ କିମ୍ ଜଙ୍ଗ ଉନ୍ ଏବଂ ସି ଜିନପିଙ୍ଗଙ୍କ ମଧ୍ୟରେ କଥାବାର୍ତ୍ତା ହୋଇଥିଲା । ଏହାପରେ ଏହି ଭିଡିଓ ଏବେ ସୋସିଆଲ ମିଡିଆରେ ଘୂରି ବୁଲୁଛି । ଏହି ବୈଠକକୁ ଚୀନ୍ ଶକ୍ତିର ଏକ କୂଟନୈତିକ ପ୍ରଦର୍ଶନ ଭାବରେ ଦେଖାଯାଉଛି । ଟେଲିଗ୍ରାମରେ ପୋଷ୍ଟ ହୋଇଥିବା ଫୁଟେଜରେ, ବୈଠକ ଶେଷ ହେବା ମାତ୍ରେ କିମ୍ ଙ୍କ ଦୁଇ ସହଯୋଗୀ ଦ୍ରୁତ ଗତିରେ ସଫେଇ କାର୍ଯ୍ୟ କରୁଥିବା ଦେଖାଯାଉଛି । ଜଣେ କର୍ମଚାରୀ କିମ୍ ବସିଥିବା ଚେୟାରର ପଛ ପାର୍ଶ୍ୱକୁ ସତର୍କତାର ସହ ସଫା କରୁଥିବା ବେଳେ ଅନ୍ୟ ଜଣେ ଫରେନ୍ସିକ ବିଶେଷଜ୍ଞ ତାଙ୍କ ପାନୀୟ ଗ୍ଲାସ୍ ଏକ ଟ୍ରେ କୁ ପୋଛୁଥିବାର ଦେଖିବାକୁ ମିଳିଥିଲା ।

ଡିଏନଏର ପ୍ରମାଣ ହାସଲ ଦ୍ୱାରା ବିଦେଶୀ ଶକ୍ତି ଏହାର ଅପବ୍ୟବହାର କରିବା ଆଶଙ୍କା କରି ଏଭଳି ପଦକ୍ଷେପ ନିଆଯାଇଥିବା ଚର୍ଚ୍ଚା ହେଉଛି । ଆଉ ଏହି ଘଟଣା ଉତ୍ତର କୋରିଆର ଅତ୍ୟଧିକ ଗୋପନୀୟତାକୁ ପ୍ରତିଫଳିତ କରୁଛି । ଉତ୍ତର କୋରିଆର ଏହି ଅତ୍ୟଧିକ ସନ୍ଦେହଜନକ ମନୋଭାବ ଏବେ ଚର୍ଚ୍ଚାର ବିଷୟ ପାଲଟିଛି ।

ସେପଟେ ପ୍ରଥମ ଥର ପାଇଁ ଦେଶ ବାହାରକୁ ଯାତ୍ରା କରିଛନ୍ତି କିମ୍ ଙ୍କ ଝିଅ । ଯେତେବେଳେ ଟ୍ରେନରୁ କିମ୍ ଓହ୍ଲାଇଥିଲେ ସେତେବେଳେ ଜଣେ ଝିଅ ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲା । ସେହି ଝିଅଟି ହେଉଛି କିମ୍ ଜଙ୍ଗ ଉନ୍ ଙ୍କ ଝିଅ କିମ୍ ଜୁ ଏ । ଜୁ ପ୍ରଥମ ଥର ପାଇଁ ତାଙ୍କ ପିତାଙ୍କ ସହିତ ଦେଶ ବାହାରକୁ ଆସିଥିବାର ଦେଖିବାକୁ ମିଳିଛି । ବିଶ୍ୱାସ କରାଯାଏ ଯେ ଜୁ ତାଙ୍କ ପିତାଙ୍କ ସମ୍ଭାବ୍ୟ ଉତ୍ତରାଧିକାରୀ । ଜୁ ଏ ଙ୍କ ବିଷୟରେ ବିଶେଷ କିଛି ତଥ୍ୟ ସାର୍ବଜନୀନ କରାଯାଇନଥିବାବେଳେ କେବଳ ଏତିକି ଜଣାପଡିଛି ଯେ ତାଙ୍କ ବୟସ 18 ବର୍ଷରୁ କମ୍ । କିମ୍ ଜୁ ଏ ହେଉଛନ୍ତି ଉତ୍ତର କୋରିଆ ନେତାଙ୍କ ଏକମାତ୍ର ସନ୍ତାନ । ଯାହାକୁ ସେ କେବଳ ଦେଶକୁ ନୁହେଁ ବରଂ ବିଶ୍ୱକୁ ମଧ୍ୟ ପରିଚିତ କରାଉଛନ୍ତି।

ଜୁ ଏଙ୍କ ବିଷୟରେ ଏହା ମଧ୍ୟ କୁହାଯାଏ ଯେ ତାଙ୍କୁ ଅନେକ ଲୋକଙ୍କ ସହିତ ମିଶିବାକୁ ଅନୁମତି ଦିଆଯାଇନାହିଁ । ସେ କୌଣସି ସ୍କୁଲକୁ ମଧ୍ୟ ଯାଇନାହାଁନ୍ତି । ଉତ୍ତର କୋରିଆର ରାଜଧାନୀ ପୋଙ୍ଗୟାଙ୍ଗରେ ଥିବା ସ୍ୱତନ୍ତ୍ର ଶିକ୍ଷକଙ୍କ ଏକ ଟିମ୍ ଜୁ ଏଙ୍କ ଘରକୁ ଆସି ତାଙ୍କୁ ଶିକ୍ଷା ଦେଇଛନ୍ତି । ଏହା ବ୍ୟତୀତ ତାଙ୍କୁ ୧୦ ବର୍ଷ ବୟସ ପର୍ଯ୍ୟନ୍ତ ଘରେ ହର୍ସ ରାଇଡିଂ ଏବଂ ପହଁରିବା ତାଲିମ ମଧ୍ୟ ଦିଆଯାଇଥିଲା ।