ମୁସଲମାନ ବହୁଳ ରାଷ୍ଟ୍ର ଇଣ୍ଡୋନେସିଆରେ ସନାତନ ସଂସ୍କୃତିର ଛାପ । ଏହି ଧର୍ମ... ବିଶ୍ୱ ଭାତୃତ୍ବର ଭାବ ଶିଖାଇଥାଏ। ସନାତନ ଧର୍ମ ବିଶ୍ୱର ଏକ ପ୍ରାଚୀନ ଧର୍ମ । ଭାରତରେ ହିନ୍ଦୁ ଦେବାଦେବୀଙ୍କୁ ନେଇ ଅନେକ ଅପମାନଜନକ ମନ୍ତବ୍ୟ ଦେଉଥିବା ବେଳେ ମୁସଲିମ ରାଷ୍ଟ୍ର ହୋଇଥିଲେ ସୁଦ୍ଧା ଇଣ୍ଡୋନେସିଆରେ ହିନ୍ଦୁ ଧର୍ମକୁ ସମ୍ମାନ ଦେବା ସହ ହିନ୍ଦୁ ଧର୍ମର ପରମ୍ପରା ଓ ସଂସ୍କୃତି ଏଠାରେ ଅଧିକ ପ୍ରତିଫଳିତ ହୋଇଥାଏ ।

ଏ ଦେଶର ନୋଟରେ ବିଘ୍ନରାଜ ଗଣେଶଙ୍କ ଫଟୋ ଦେଖ‌ିବାକୁ ମିଳେ। କେବଳ ଗଣେଶଙ୍କ ଫଟୋ ନୁହଁ ଇଣ୍ଡୋନେସିଆର ନୋଟରେ ଦେବୀ ପାର୍ବତୀ, ଭଗବାନ ଶ୍ରୀରାମ ଓ ଅନେକ ହିନ୍ଦୁ ଦେବତାଙ୍କ ଫଟୋ ରହି ଆସିଛି। ଦେଶର ପ୍ରମୁଖ ସପିଙ୍ଗ ମଲର ନାମ ରାମାୟଣ ପ୍ଲାଜା। ଏହି ଦେଶର ଅଧିକାଂଶ ମାଲବାହୀ ଏବଂ ଯାତ୍ରୀବାହୀ ଜାଜାହାଜର ନାଁ ମହାଭାରତର ଚରିତ୍ର ଦ୍ରୋପଦୀ, ନକୁଳ, ସହଦେବ, ଯୁଧୃଷ୍ଠିର ଓ ଅର୍ଜୁନଙ୍କ ନାମରେ ନାମିତ ।

କେବଳ ଇଣ୍ଡୋନେସିଆର ନୋଟ୍‌ରେ ନୁହେଁ ଏ ଦେଶର ବିମାନ ସେବାରେ ମଧ୍ୟ ହିନ୍ଦୁତ୍ବର ଛାପ ରହିଛି । ଇଣ୍ଡୋନେସିଆର ଏୟାରଲାଇନ୍ସ ନାମ ଗରୁଡ଼ ଏୟାରଲାଇନ୍ସ । ଏହି ଏୟାରଲାଇନ୍ସର ବିମାନ ଗୁଡ଼ିକରେ ବ୍ୟବହୃତ ଲୋଗୋରେ ଗରୁଡ଼ ଚିହ୍ନ ରହିଛି। ଏହାଛଡ଼ା ଘରୋଇ ବିମାନ ସେବାର ନାଁ ଜଟାୟୁ ଏୟାରଲାଇନ୍ସ। ଏହା ବ୍ୟତୀତ ଇଣ୍ଡୋନେସିଆ ଏୟାରପୋର୍ଟରେ ହିନ୍ଦୁ ଦେବାଦେବୀଙ୍କ ମୂର୍ତ୍ତି ସବୁ ଦେଖିବାକୁ ମିଳେ ।

ଇଣ୍ଡୋନେସିଆର ଗସ୍ତି ନାଗୁର ରାୟ ଇଣ୍ଟରନ୍ୟାସନାଲ ଏଆରପୋର୍ଟରେ ହିନ୍ଦୁ ଦେବାଦେବୀଙ୍କ ପ୍ରତିମୂର୍ତ୍ତି ଶୋଭା ପାଉଛି । ଏହି ଏୟାରପୋର୍ଟ ମଧ୍ୟ ଜଣେ ହିନ୍ଦୁଙ୍କ ନାଁରେ ହିଁ ହୋଇଛି । ଗସ୍ତି ନାଗୁର ରାୟ ଇଣ୍ଡୋନେସିଆରେ ହିଁ ଜନ୍ମ ହୋଇଥିଲେ। ତା’ପରେ ସେନାରେ ଯୋଗଦେଇ କର୍ଣ୍ଣେଲ ହୋଇଥିଲେ । ସେ ହିନ୍ଦୁ ଧର୍ମର ଥିଲେ କିନ୍ତୁ ଇଣ୍ଡୋନେସିଆକୁ ଡଚ୍ ଦଖଲରୁ ମୁକ୍ତ କରିବାରେ ପ୍ରମୁଖ ଭୂମିକା ଗ୍ରହଣ କରିଥିଲେ। ଇଣ୍ଡୋନେସିଆର ଜଣେ ସାହସୀ ଯୋଦ୍ଧା ଭାବରେ ତାଙ୍କ ନାମ ଦେଶର ଇତିହାସରେ ଲିପିବଦ୍ଧ । ଦେଶରେ ତାଙ୍କ ନାମରେ ଅନେକ ପ୍ରତିମୂର୍ତ୍ତି ଅଛି ଏବଂ ଡାକ ଷ୍ଟାମ୍ପ ମଧ୍ୟ ଜାରି କରାଯାଇଛି।

ଗସ୍ତି ନାଗୁର ରାୟ ଏୟାରପୋର୍ଟରେ ବିରାଜମାନ ଅଛନ୍ତି ଅଗ୍ରପୂଜ୍ୟ ଗଣେଷ ଓ ତାଙ୍କ ବାହାନ ମୂଷିକ । ଏଠାକୁ ଆସୁଥିବା ପ୍ରତ୍ୟେକ ପର୍ଯ୍ୟଟକଙ୍କ ପାଇଁ ଏହା ଆକର୍ଷଣର କେନ୍ଦ୍ର । ସେହିପରି ବାଲି ବିମାନ ବନ୍ଦରରେ ସ୍ଥାପିତ ହୋଇଛି ସୁବାହୁଙ୍କ ପ୍ରତିମୂର୍ତ୍ତି । ରାମାୟଣରେ ସୁବାହୁଙ୍କ ବିଷୟରେ ଉଲ୍ଲେଖ ଅଛି । ସେ ତାଡକା ଏବଂ ସୁଣ୍ଡଙ୍କର ପୁତ୍ର ଥିଲେ। ସେ ମାରିଚଙ୍କ ଭାଇ ଏବଂ ଲଙ୍କାର ରାଜା ରାବଣଙ୍କ ଭଣଜା ଥିଲେ । ସେ ଜଣେ ରାକ୍ଷସ ଥିଲେ । ରାମାୟଣ ଅନୁଯାୟୀ, ବିଶ୍ୱାମିତ୍ରଙ୍କ ଯଜ୍ଞକୁ ସୁରକ୍ଷା ଦେବା ବେଳେ ପ୍ରଭୁ ଶ୍ରୀରାମ ସୁବାହୁଙ୍କୁ ହତ୍ୟା କରିଥିଲେ।

ଏହା ବ୍ୟତୀତ ବାଲି ବିମାନବନ୍ଦରରେ ଭଗବାନ ବିଷ୍ଣୁ ଏବଂ ଗରୁଡ଼ଙ୍କ ପ୍ରତିମୂର୍ତ୍ତି ସ୍ଥାପନ କରାଯାଇଛି। ଇଣ୍ଡୋନେସିଆରେ ଭଗବାନ ବିଷ୍ଣୁଙ୍କର ବହୁତ ମାନ୍ୟତା । ସେଠାରେ ତାଙ୍କର ଅନେକ ମନ୍ଦିର ଅଛି । ସୂଚନା ଅନୁସାରେ ୧୦-୧୧ ଶତାବ୍ଦୀ ପର୍ଯ୍ୟନ୍ତ ଇଣ୍ଡୋନେସିଆରେ ହିନ୍ଦୁ ସଂଖ୍ୟାଗରିଷ୍ଠ ରାଷ୍ଟ୍ର ଥିଲା ଏବଂ ରାଜାମାନେ ମଧ୍ୟ ହିନ୍ଦୁ ଥିଲେ । କିନ୍ତୁ ସମୟ କ୍ରମେ ଧର୍ମ ପରିବର୍ତ୍ତନ ପରେ ଏହି ଦେଶରେ ମୁସଲମାନଙ୍କ ସଂଖ୍ୟା ବଢ଼ି ବଢ଼ି ଚାଲିଥିଲା । ବର୍ତ୍ତମାନ ଇଣ୍ଡୋନେସିଆ ହେଉଛି ବିଶ୍ୱର ସର୍ବବୃହତ ମୁସଲମାନ ଦେଶ, ଏହାର ଜନସଂଖ୍ୟା ୨୭ କୋଟିରୁ ଅଧିକ । ଏଥିରେ ୮୭.୨ ପ୍ରତିଶତ ଜନସଂଖ୍ୟା ମୁସଲମାନ, ହିନ୍ଦୁମାନେ ମାତ୍ର ୧.୭ ପ୍ରତିଶତ ଅଛନ୍ତି।

Argus News | argus news | Odisha Latest News, Breaking News, Trending News, Live TV