ଆଜି ସକାଳେ ମଣିପୁରରେ ୫.୨ ତୀବ୍ରତାର ଭୂମିକମ୍ପ ଅନୁଭୂତ ହୋଇଛି । ମଣିପୁର ସହିତ, ନାଗାଲାଣ୍ଡ, ଆସାମ ଏବଂ ମେଘାଳୟରେ ମଧ୍ୟ ଭୂମିକମ୍ପ ଅନୁଭୂତ ହୋଇଛି । ଜାତୀୟ ଭୂକମ୍ପ ବିଜ୍ଞାନ କେନ୍ଦ୍ର (NCS) ଅନୁଯାୟୀ, ଭୂମିକମ୍ପର ଗଭୀରତା ୬୨ କିଲୋମିଟର ଥିଲା । ଏହି ଭୂମିକମ୍ପ ଯୋଗୁଁ କୌଣସି ବଡ଼ ଜୀବନ କିମ୍ବା ସମ୍ପତ୍ତି କ୍ଷତି ହେବାର ତୁରନ୍ତ କୌଣସି ଖବର ନାହିଁ ।

ଜାତୀୟ ଭୂକମ୍ପ ବିଜ୍ଞାନ କେନ୍ଦ୍ର (NCS) ଅନୁଯାୟୀ, ମଙ୍ଗଳବାର ପ୍ରତ୍ୟୁଷରେ ମଣିପୁରରେ ୩.୨ ତୀବ୍ରତାର ଭୂମିକମ୍ପ ହୋଇଥିଲା । ଏହି ଭୂମିକମ୍ପ ୨୧ ଏପ୍ରିଲରେ ଭାରତୀୟ ସମୟ ସକାଳ ୫:୫୯:୩୩ ରେ ହୋଇଥିଲା ଏବଂ ଏହାର କେନ୍ଦ୍ରସ୍ଥଳ କାମଜୋଙ୍ଗରେ ଅବସ୍ଥିତ ଥିଲା । ପ୍ରତ୍ୟୁଷରେ ଭୂମିକମ୍ପରେ ଭୟଭୀତ ହୋଇ ଲୋକମାନେ ଘରୁ ବାହାରକୁ ଦୌଡ଼ିବାକୁ ଲାଗିଲେ ।

ସେହିପରି ସୋମବାର (ଅପ୍ରେଲ ୨୦) ଶକ୍ତିଶାଳୀ ଭୂକମ୍ପ ଝଟକାରେ କମ୍ପି ଉଠିଥିଲା ଉତ୍ତର ଜାପାନ ଉପକୂଳ। ଭୂକମ୍ପ ଝଟକା ଅନୁଭୂତ ହୋଇସାରିବା ପରେ ଜାପାନ ପାଣିପାଗ ସଂସ୍ଥା ଦେଶର ଉତ୍ତର ଭାଗରେ ସୁନାମୀ ଆସିବା ନେଇ ପୂର୍ବାନୁମାନ କରିଥିଲା । ସ୍ଥାନୀୟ ସମୟ ଅନୁସାରେ ଅପରାହ୍ନ ପ୍ରାୟ ୪:୫୩ ବେଳେ ଉତ୍ତର ଜାପାନର ସାନରିକୁ ଉପକୂଳରେ ଏକ ଜୋରଦାର ଭୂକମ୍ପ ଝଟକା ଅନୁଭୂତ ହୋଇଥିଲା ।

ରିକ୍ଟର ସ୍କେଲ୍ ରେ ଏହାର ତୀବ୍ରତା ୭.୪ ରହିଥିଲା। ଜାପାନୀ ପାଣିପାଗ ସଂସ୍ଥା କହିଛି ଯେ ଏହି ଭୂକମ୍ପର କେନ୍ଦ୍ରସ୍ଥଳ ସମୁଦ୍ର ପତ୍ତନ ଠାରୁ ପ୍ରାୟ ୧୦ କିଲୋମିଟର (୬ ମାଇଲ) ଗଭୀରତାରେ ରହିଥିଲା ।  ଭୂମିକମ୍ପ ପରେ ୮୦ ସେଣ୍ଟିମିଟର ଉଚ୍ଚତାର (୩୧ ଇଞ୍ଚ) ସୁନାମି ତରଙ୍ଗ ସ୍ଥାନୀୟ ଏକ ବନ୍ଦରରେ ଆସି ମାଡ଼ ହୋଇଥିବାର ଖବର ଆସିଛି। ଭୂକମ୍ପ ପରେ ପାଣିପାଗ ବିଭାଗ ଚେତାବନୀ ଜାରି କରିଥିଲା ​​ଯେ ଖୁବ୍ ଶୀଘ୍ର ପ୍ରାୟ ୩ ମିଟର (୧୦ ଫୁଟ) ଉଚ୍ଚତା ପର୍ଯ୍ୟନ୍ତ ସୁନାମି ଆସିପାରେ ।

ସୁନାମୀ କାରଣରୁ ହୋଇପାରେ କ୍ଷୟକ୍ଷତି
ସୋମବାର ଅନୁଭୂତ ହୋଇଥିବା ଭୂମିକମ୍ପ ଝଟକା ଏତେ ଶକ୍ତିଶାଳୀ ଥିଲା ଯେ ପ୍ରାୟ ଶହ ଶହ କିଲୋମିଟର ଦୂରରେ ରହିଥିବା ବଡ଼ ବଡ଼ କୋଠା ମଧ୍ୟ ଦୋହଲି ଉଠିଥିଲା । ଏପରିକି ରାଜଧାନୀ ଟୋକିଓ ସହର ମଧ୍ୟ ଭୂକମ୍ପ ତାଣ୍ଡବରୁ ରକ୍ଷା ପାଇନଥିଲା ।  ଦେଶର ପାଣିପାଗ ସଂସ୍ଥା (Japan Meteorological Agency) ପୂର୍ବନୁମାନ କରିଥିଲ ଯେ ସୁନାମୀ ତରଙ୍ଗ ଯଥାଶୀଘ୍ର ଦେଶର ଉତ୍ତର ଉପକୂଳରେ ପହଞ୍ଚିପାରେ । ଏଥିରେ କୁହାଯାଇଥିଲେ ତୁରନ୍ତ ଉପକୂଳ ଏବଂ ନଦୀକୂଳିଆ ଅଞ୍ଚଳକୁ ଖାଲି କରି ସେଠାକାର ଲୋକଙ୍କୁ ନିରାପଦ ସ୍ଥାନକୁ ସ୍ଥାନାନ୍ତର କରାଯାଉ ।