ମାର୍କ ଜୁକରବର୍ଗଙ୍କୁ ଫାଶି ଦେଇଥାନ୍ତା ପାକିସ୍ତାନ । ଶୁଣାଇ ଥାଆନ୍ତା ମୃତ୍ୟୁଦଣ୍ଡ । ଏକ ସାକ୍ଷାତକାରରେ ଏଭଳି ଚାଞ୍ଚଲ୍ୟକର ଖୁଲାସା କରିଛନ୍ତି ଫେସବୁକ୍ ସହ-ସଂସ୍ଥାପକ । ମେଟା ସିଇଓ ମାର୍କ ଜୁରକବର୍ଗ କହିଛନ୍ତି, ତାଙ୍କୁ କୁଆଡ଼େ ପାକିସ୍ତାନ ଶୁଣାଇ ଥାଆନ୍ତା ମୃତ୍ୟୁଦଣ୍ଡ । କୌଣସି ଫେସବୁକ୍ ବ୍ୟବହାର ପ୍ରୋଫେଟ୍ ମହମ୍ମଦଙ୍କ ଫଟୋ ପୋଷ୍ଟ କରିଥିଲେ, ଯାହାକୁ ନେଇ ଜୁକରବର୍ଗଙ୍କ ବିରୋଧରେ ମକଦ୍ଦମା ରୁଜୁ କରିଥିଲା ପାକିସ୍ତାନ ।

ଏକ ସାକ୍ଷାତକାରରେ ଜୁକରବର୍ଗ କହିଛନ୍ତି, ଈଶାନିନ୍ଦା ଉଲ୍ଲଂଘନ ପାଇଁ ତାଙ୍କୁ ବ୍ୟକ୍ତିଗତ ଭାବେ ଦାୟୀ କରିବାକୁ ପାକିସ୍ତାନ ସରକାରଙ୍କୁ ନିବେଦନ କରାଯାଇଥିଲା । ତେବେ ପାକିସ୍ତାନ ଯିବା ଲାଗି ତାଙ୍କର କୌଣସି ଇଚ୍ଛା ନଥିବାରୁ ଜୁକରବର୍ଗ ଚିନ୍ତିତ ନଥିଲେ ବୋଲି କହିଛନ୍ତି । ତେବେ ଏହି ଘଟଣା କେଉଁ ବର୍ଷ ଘଟିଥିଲା ସେ ନେଇ କହି ନାହାନ୍ତି ଜୁକରବର୍ଗ ।

ମେଟା (ଫେସବୁକ୍‌ର ମୂଳ କମ୍ପାନୀ) ଓ ପାକିସ୍ତାନ ସରକାରଙ୍କ ମଧ୍ୟରେ ଆଇନ୍ ଲଢ଼େଇ ଜାରି ରହିଥିବା ବେଳେ ଜୁକରବର୍ଗଙ୍କ ଏଭଳି ଖୁଲାସା ମାହୋଲକୁ ଆହୁରି ସରଗରମ କରିଛି । ପାକିସ୍ତାନର ଅଭିଯୋଗ, ଫେସବୁକ୍‌ ଅନୁମତି ଦେଉଥିବା କଣ୍ଟେଣ୍ଟ ଦେଶର ଈଶାନିନ୍ଦା ଆଇନ୍‌ର ଉଲ୍ଲଂଘନ କରୁଛି ।

ଜୁକରବର୍ଗଙ୍କ କହିବା କଥା, ଦୁନିଆର ଅନେକ ସ୍ଥାନରେ କହିବାର ସ୍ଵାଧିନତା ଆମର ମୂଲ୍ୟ ଠାରୁ ବହୁତ ଅଲଗା ଅଟେ । ସେ ଭଳି ଦେଶ ଚାହାଁନ୍ତି କି ଆମେ ସେହି ଜିନିଷ ଉପରେ କାମ କରୁ ଓ ସେଠାରେ ସେ ସବୁ ପ୍ରତିବନ୍ଧକ ବା ମାନ୍ୟ ନୁହେଁ କହି କାର୍ଯ୍ୟାନୁଷ୍ଠାନ ନେବେ ।

ଦୁନିଆରେ ପାକିସ୍ତାନର ଈଶାନିନ୍ଦା ଆଇନ୍ (ଧାର୍ମିକ ଆଇନ୍) ହେଉଛି ସବୁଠୁ ଶକ୍ତିଶାଳୀ । ପାକିସ୍ତାନରେ କୁରାନର ଅପମାନ କଲେ ଆଜୀବନ ଜେଲରୁ ନେଇ ମୃତ୍ୟୁଦଣ୍ଡ ଦିଆଯାଇ ଥାଏ । ତେବେ ଏହି ଆଇନ୍‌ରେ ମୃତ୍ୟୁଦଣ୍ଡାଦେଶ ହୋଇଥିଲେ ବି ଏଯାଏଁ ପାକିସ୍ତାନ କାହାକୁ ଫାଶି ଦେଇ ନାହିଁ ।

ପାକିସ୍ତାନର ଗଣମାଧ୍ୟମ ଅନୁଯାୟୀ, ୧୯୯୦ ପରଠାରୁ ଏବେ ସୁଦ୍ଧା ୮୦ରୁ ଅଧିକ ଲୋକଙ୍କୁ ଲୋକେ ଈଶାନିନ୍ଦା ଆଇନ୍‌ର ଉଲ୍ଲଂଘନ ଅଭିଯୋଗରେ ହତ୍ୟା କରିଛନ୍ତି । ଅନେକ ସ୍ଥାନରେ କୁରାନର ଅପମାନ ନେଇ ଗୁଜବ ମାତ୍ରେ ମଧ୍ୟ ଭୟଙ୍କର ହିଂସା ହୋଇଥିବା ବେଳେ ଅନେକ ଜୀବନ ଯାଇଛି ।

Argus News | argus news | Odisha Latest News, Breaking News, Trending News, Live TV