Argus News - ଲେବାନନ ଉପରେ ଇସ୍ରାଏଲର ଆକ୍ରମଣ ପରେ ପୁଣି ବଢିଲା ଟେନସନ୍

ଯୁଦ୍ଧ ଉପରେ ଲାଗିଛି ବ୍ରେକ୍... ହେଲେ ହିଜବୁଲ୍ଲା ଉପରେ ହେଉଛି ଘନଘନ ଆକ୍ରମଣ । ଇସ୍ରାଏଲ ଆକ୍ରମଣରେ ହିଜବୁଲ୍ଲା ମୁଖ୍ୟଙ୍କ ବ୍ୟକ୍ତିଗତ ସଚିବ ଅଲି ୟୁସୁଫ୍ ହର୍ଶି ନିପାତ ହୋଇଛି । ସେପଟେ ଆମେରିକା ଓ ଇରାନ ମଧ୍ୟରେ ସିଜ୍ ଫାୟାର ହୋଇଥିବା ବେଳେ ଇରାନକୁ ଘେରି ରହିଛି ଆମେରିକା ସେନା । ଚୁକ୍ତି ଉଲ୍ଲଂଘନ ହେଲେ ଉଭୟ ପକ୍ଷ ଆକ୍ରମଣ ପାଇଁ ସଜବାଜ ହେଉଥିବା ବେଳେ ଶନିବାର ହୋଇପାରେ ପିସ୍ ଟକ୍ । ଟେନସନ୍ ଭିତରେ କିନ୍ତୁ ହର୍ମୁଜ ଅତିକ୍ରମ କରି ସୁରକ୍ଷିତ ଭାରତରେ ପହଞ୍ଚିଛି LPG ବୋଝେଇ ଟ୍ୟାଙ୍କର ‘ଗ୍ରୀନ୍ ଆଶା’ ।

ଦୁଇ ସପ୍ତାହର ସିଜ ଫାୟାରେ ନେଇ ଉଭୟ ପକ୍ଷ ରାଜି, ତଥାପି ବର୍ଷୁଛି ରକେଟ ଓ ମିସାଇଲ । ଇସ୍ରାଏଲ୍ ପକ୍ଷରୁ ଲେବାନନର ବୈରୁତରେ କରାଯାଇଥିବା ଏୟାରଷ୍ଟ୍ରାଇକରେ ହିଜବୁଲ୍ଲା ମୁଖ୍ୟ ନଇମ କାସିମଙ୍କ ପୁତୁରା ତଥା ବ୍ୟକ୍ତିଗତ ସଚିବ ଅଲି ୟୁସୁଫ୍ ହର୍ଶି ନିହତ ହୋଇଥିବା ଦାବି କରାଯାଇଛି । ଆକ୍ରମଣରେ ବୈରୁତରେ ହୋଇଛି ବ୍ୟାପକ କ୍ଷୟକ୍ଷତି । ଏଥିରେ ଅତି କମରେ ୨୫୦ ଜଣଙ୍କର ମୃତ୍ୟୁ ହୋଇଥିବା ବେଳେ ଶତାଧିକ ଆହତ ହୋଇଛନ୍ତି ।

ଟ୍ରମ୍ପ କହିଛନ୍ତି ହିଜବୁଲ୍ଲା କାରଣରୁ ଲେବାନନକୁ ଏହି ଶାନ୍ତି ଚୁକ୍ତିରେ ସାମିଲ କରାଯାଇ ନାହିଁ। କେବଳ ସେତିକି ନୁହେଁ ସଂପୂର୍ଣ୍ଣ ଚୁକ୍ତି ପାଳନ ନହେଲେ ପୁଣି ଆକ୍ରମଣ ହେବ ବୋଲି ଚେତାବନୀ ଦେଇଛନ୍ତି ଟ୍ରମ୍ପ । ଇରାନ ସୀମା ପାଖରେ ଆମେରିକାର ସମସ୍ତ ଯୁଦ୍ଧ ଜାହାଜ, ବିମାନ ଏବଂ ସାମରିକ ବାହିନୀ ମୁତୟନ ଅଛନ୍ତି । ଏହାସହ ଯୁଦ୍ଧରେ ଇରାନ ଉପରେ ସଂପୂର୍ଣ୍ଣ ବିଜୟ ହାସଲ କରିଥିବା ଦାବି କରିଛନ୍ତି ଟ୍ରମ୍ପ । ସେପଟେ ଲେବାନନ ଉପରେ ଇସ୍ରାଏଲର ଆକ୍ରମଣ ପରେ 'ଷ୍ଟ୍ରେଟ୍ ଅଫ୍ ହର୍ମୁଜ' ବନ୍ଦ କରିବାକୁ ଚେତାବନୀ ଦେଇଛି ଇରାନ ।

ଦୁଇ ସପ୍ତାହର ସିଜ ଫାୟାର ଭିତରେ ଟ୍ରମ୍ପଙ୍କ ପାଖରେ ରହିଛି ତିନିଟି ବିକଳ୍ପ । ପ୍ରଥମ ହେଲା ଶାନ୍ତି ଚୁକ୍ତି କରି ଯୁଦ୍ଧ ବନ୍ଦ କରିବା, ଦ୍ବିତୀୟ ହେଉଛି କୁଟନୀତି ଉପରେ ଭରସା ଓ ତୃତୀୟ ଅଯଥା ଆକ୍ରମଣ ବନ୍ଦ ନେଇ ଇସ୍ରାଏଲକୁ ରୋକିବା । ସେପଟେ ହର୍ମୁଜ ପ୍ରଣାଳୀରେ ଚଳାଚଳ କରୁଥିବା ଜାହାଜର ଟୋଲ ଆଦାୟ ପାଇଁ ଯୋଜନା କରୁଛି ଇରାନ । ଟୋଲ ଦେୟ ଇରାନ କ୍ରିପ୍ଟୋ କରେନ୍ସି କିମ୍ବା ଚାଇନିଜ୍ ୟୁଆନ୍ ମାଧ୍ୟମରେ ଆଦାୟ କରିପାରେ ।

ମଧ୍ୟପ୍ରାଚ୍ୟ ଉତ୍ତେଜନା ଭିତରେ ଷ୍ଟ୍ରେଟ୍ ଅଫ ହର୍ମୁଜ ଅତିକ୍ରମ କରି ମୁମ୍ବାଇର ଜେଏନ୍‌ପିଏ ବନ୍ଦରରେ ପହଞ୍ଚିଛି ଭାରତୀୟ ଏଲ୍‌ପିଜି ଜାହାଜ ‘ଗ୍ରୀନ୍ ଆଶା’ । ଏହି ଜାହାଜରେ ୧୫ ହଜାର ୪୦୦ ଟନ୍ ଏଲ୍‌ପିଜି ରହିଛି । ଆସନ୍ତା ଶନିବାର ଶାନ୍ତି ଚୁକ୍ତ ଉପରେ ଇରାନ ଓ ଆମେରିକା ମଧ୍ୟରେ ଆଲୋଚନା ହେବାର ଅଛି । ଏହି ବୈଠକରେ ଆମେରିକା ପକ୍ଷରୁ ଉପରାଷ୍ଟ୍ରପତି ଜେଡି ଭାନ୍ସ ଯୋଗଦେଇପାରନ୍ତି ।