Videos
|
International

Philippines Visit / ଆଜିଠୁ ମୋଦିଙ୍କ ଦୁଇଦିନିଆ ଫିଲିପାଇନ୍ସ ଗସ୍ତ, ଆସିଆନ୍ ଓ ଇଷ୍ଟ ଏସିଆ ସମ୍ମିଳନୀରେ ହେବେ ସାମିଲ

Rashmita Mishra
Browse all articles by Rashmita Mishra
·45 mins ago·2 min read
ଆଜିଠୁ ମୋଦିଙ୍କ ଦୁଇଦିନିଆ ଫିଲିପାଇନ୍ସ ଗସ୍ତ, ଆସିଆନ୍ ଓ ଇଷ୍ଟ ଏସିଆ ସମ୍ମିଳନୀରେ ହେବେ ସାମିଲ
Philippines Visit

Key Points

ଆଜିଠୁ ମୋଦିଙ୍କ ଦୁଇଦିନିଆ ଫିଲିପାଇନ୍ସ ଗସ୍ତ
ମାନିଲାରେ ପହଞ୍ଚିବେ ପ୍ରଧାନମନ୍ତ୍ରୀ ମୋଦି
ଆସିଆନ୍‌ ଶିଖର ସମ୍ମିଳନୀରେ ଯୋଗଦେବେ ମୋଦି 

ଆଜିଠୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦୁଇଦିନିଆ ଫିଲିପାଇନ୍ସ ଗସ୍ତ ଆରମ୍ଭ ହେଉଛି । ନଭେମ୍ବର ୧୬ ଓ ୧୭ ତାରିଖରେ ସେ ଫିଲିପାଇନ୍ସର ରାଜଧାନୀ ମାନିଲା ଗସ୍ତ କରିବେ । ଫିଲିପାଇନ୍ସର ରାଷ୍ଟ୍ରପତି ଫର୍ଡିନାଣ୍ଡ ଆର୍. ମାର୍କୋସ ଜୁନିୟରଙ୍କ ନିମନ୍ତ୍ରଣ କ୍ରମେ ମୋଦି ଏହି ଗସ୍ତ କରୁଛନ୍ତି । ଏହି ଗସ୍ତ ସମୟରେ ସେ ୨୩ତମ ଆସିଆନ୍-ଭାରତ ଶିଖର ସମ୍ମିଳନୀ ଏବଂ ୨୧ତମ ଇଷ୍ଟ ଏସିଆ ସମ୍ମିଳନୀରେ ଯୋଗଦେବେ ।

ନଭେମ୍ବର ୧୭ ତାରିଖରେ ଫିଲିପାଇନ୍ସର ଅଧ୍ୟକ୍ଷତାରେ ଏହି ଦୁଇଟି ଗୁରୁତ୍ୱପୂର୍ଣ୍ଣ ସମ୍ମିଳନୀ ଅନୁଷ୍ଠିତ ହେବ । ଭାରତର ଆକ୍ଟ ଇଷ୍ଟ ନୀତିକୁ ଆହୁରି ମଜଭୁତ କରିବା ସହ ଇଣ୍ଡୋ-ପାସିଫିକ୍ ଅଞ୍ଚଳରେ ରଣନୈତିକ ସହଯୋଗ ବୃଦ୍ଧି କରିବା ଏହି ଗସ୍ତର ମୁଖ୍ୟ ଉଦ୍ଦେଶ୍ୟ ରହିଛି ।

ଭାରତ-ଆସିଆନ୍ ସମ୍ପର୍କ ଉପରେ ହେବ ଆଲୋଚନା
ଆସିଆନ୍-ଭାରତ ଶିଖର ସମ୍ମିଳନୀରେ ଭାରତ ଓ ଆସିଆନ୍ ଦେଶଗୁଡ଼ିକ ମଧ୍ୟରେ ଥିବା ରଣନୈତିକ ସହଭାଗିତାର ଅଗ୍ରଗତି ସମୀକ୍ଷା କରାଯିବ । ଏହା ସହିତ ୨୦୨୬ରୁ ୨୦୩୦ ପର୍ଯ୍ୟନ୍ତ ରହିଥିବା କାର୍ଯ୍ୟଯୋଜନା ଏବଂ ଭବିଷ୍ୟତରେ ଦୁଇ ପକ୍ଷ ମଧ୍ୟରେ ସହଯୋଗର ବିଭିନ୍ନ ଦିଗ ଉପରେ ଆଲୋଚନା ହେବ । ବାଣିଜ୍ୟ, ଅର୍ଥନୀତି, ସୁରକ୍ଷା ଓ ଆଞ୍ଚଳିକ ସହଯୋଗ ଭଳି କ୍ଷେତ୍ରରେ ସମ୍ପର୍କକୁ ଆଗକୁ ବଢ଼ାଇବା ଉପରେ ଗୁରୁତ୍ୱ ରହିବ ।

ଇଣ୍ଡୋ-ପାସିଫିକ୍ ଅଞ୍ଚଳ ଉପରେ ନଜର
୨୧ତମ ଇଷ୍ଟ ଏସିଆ ସମ୍ମିଳନୀରେ ଆଞ୍ଚଳିକ ଓ ବିଶ୍ୱସ୍ତରର ବିଭିନ୍ନ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ଆଲୋଚନା ହେବ। ଇଣ୍ଡୋ-ପାସିଫିକ୍ ଅଞ୍ଚଳରେ ଶାନ୍ତି, ସ୍ଥିରତା ଓ ସୁରକ୍ଷା ବଜାୟ ରଖିବା ସହ ବିଭିନ୍ନ ଦେଶ ମଧ୍ୟରେ ସହଯୋଗ ବୃଦ୍ଧି ଉପରେ ମଧ୍ୟ ଗୁରୁତ୍ୱ ଦିଆଯିବ ।

୨୦୨୬କୁ ସାମୁଦ୍ରିକ ସହଯୋଗ ବର୍ଷ
ଭାରତ ଓ ଆସିଆନ୍ ପକ୍ଷରୁ ୨୦୨୬କୁ ସାମୁଦ୍ରିକ ସହଯୋଗ ବର୍ଷ ଭାବେ ପାଳନ କରାଯାଉଛି । ଏହା ଦୁଇ ପକ୍ଷ ମଧ୍ୟରେ ସାମୁଦ୍ରିକ ସୁରକ୍ଷା ଓ ସହଯୋଗକୁ ନୂଆ ଦିଗ ଦେବାରେ ସହାୟକ ହେବ ।

ଅନ୍ୟପଟେ, ୨୦୨୭ରେ ଭାରତ ଓ ଆସିଆନ୍ ମଧ୍ୟରେ ଆଲୋଚନାଭିତ୍ତିକ ସମ୍ପର୍କକୁ ୩୫ ବର୍ଷ ପୂରଣ ହେବ । ଏହା ସହିତ ବ୍ୟାପକ ରଣନୈତିକ ସହଭାଗିତାର ୫ ବର୍ଷ ମଧ୍ୟ ପୂରଣ ହେବ। ତେଣୁ ମୋଦିଙ୍କ ଏହି ଫିଲିପାଇନ୍ସ ଗସ୍ତ ଭାରତ ଓ ଦକ୍ଷିଣ-ପୂର୍ବ ଏସିଆ ଦେଶଗୁଡ଼ିକ ମଧ୍ୟରେ ସମ୍ପର୍କକୁ ଆହୁରି ସୁଦୃଢ଼ କରିବା ଦିଗରେ ବେଶ୍ ଗୁରୁତ୍ୱପୂର୍ଣ୍ଣ ।

Argus News App

📱 Get Argus News App

✨
📰 60 Word News🎬 Argus Podcast📺 Live TV and Breaking News🔔 Free Notification Alerts
Download Free: