ନେପାଳରୁ ହଟିଛି କର୍ଫ୍ୟୁ । ଖୋଲୁଛି ଦୋକାନ ବଜାର ମାର୍କେଟ, ସର୍ପିଂ ମଲ୍ । ଅନ୍ତରୀଣ ସରକାର ଗଠନ ହେବା ପରେ, ସୁରକ୍ଷା ବାହିନୀ ପରିସ୍ଥିତିକୁ ଦୃଷ୍ଟିରେ ରଖି ଏକାଧିକ ବଡ଼ ନିଷ୍ପତ୍ତି ନେଇଛି । ମାର୍ଚ୍ଚ ୫ରେ ହେବ ନେପାଳ ନିର୍ବାଚନ । କାଠମାଉଣ୍ଡୁ ଘାଟିରୁ ଆରମ୍ଭ କରି ଅନ୍ୟ ଅଞ୍ଚଳରେ ଜୀବନ ଧୀରେ ଧୀରେ ସାମାନ୍ୟ ହେଉଛି । ପ୍ରମୁଖ ସରକାରୀ ବିଲିଡିଂର ମରାମତି ମଧ୍ୟ ଆରମ୍ଭ ହୋଇଛି । ଗତକାଲି ପୂର୍ବତନ ମୁଖ୍ୟ ବିଚାରପତି ସୁଶୀଳା କାର୍କି ଅନ୍ତରୀଣ ସରକାରର ଦାୟିତ୍ୱ ଗ୍ରହଣ କରିଛନ୍ତି । ନେପାଳ ପୋଲିସ ସୂଚନା ଅନୁସାରେ ନେପାଳ ଜେନ-ଜି ଆନ୍ଦୋଳନରେ ମୃତ୍ୟୁ ସଂଖ୍ୟା ୫୧ ରହିଛି ।

ଏହାମଧ୍ୟରେ ୨୧ ଜଣ ବିକ୍ଷୋଭକାରୀ , ୯ ଜଣ କଏଦୀ, ୩ ଜଣ ପୋଲିସ କର୍ମଚାରୀ ଏବଂ ୧୮ ଜଣ ସାଧାରଣ ନାଗରିକ ସାମିଲ ଅଛନ୍ତି । ନେପାଳ ପୋଲିସ ସାରା ଦେଶରେ ହିଂସା, ପୋଡ଼ାଜଳା ଏବଂ ଲୁଟପାଟ ଘଟଣା ସମ୍ପର୍କରେ ଜନସାଧାରଣଙ୍କୁ ସହଯୋଗ ପାଇଁ ନିବେଦନ କରିଛି । 9 ତାରିଖରେ ପ୍ରଧାନମନ୍ତ୍ରୀ କେପି ଶର୍ମା ଓଲିଙ୍କ ଇସ୍ତଫା ପରେ ମଧ୍ୟ ହିଂସା ଥମି ନଥିଲା । ପ୍ରଦର୍ଶନକାରୀମାନେ ସଂସଦ ଭବନ, ରାଷ୍ଟ୍ରପତିଙ୍କ କାର୍ଯ୍ୟାଳୟ, ପ୍ରଧାନମନ୍ତ୍ରୀଙ୍କ ବାସଭବନ, ସରକାରୀ କାର୍ଯ୍ୟାଳୟ, ରାଜନୈତିକ ଦଳର କାର୍ଯ୍ୟାଳୟ ଏବଂ ବରିଷ୍ଠ ନେତାଙ୍କ ଘରେ ନିଆଁ ଲଗାଇ ଦେଇଥିଲେ ।