ସୁଶୀଳା କାର୍କି ଅନ୍ତରୀଣ ପ୍ରଧାନମନ୍ତ୍ରୀ। ଭଙ୍ଗ ହେଲା ନେପାଳ ସଂସଦ, ସୁଶୀଳା କାର୍କି ହେବେ ଅନ୍ତରୀଣ ପ୍ରଧାନମନ୍ତ୍ରୀ । ପୂର୍ବତନ ପ୍ରଧାନ ବିଚାରପତି ସୁଶୀଳା ଅନ୍ତରୀଣ ପ୍ରଧାନମନ୍ତ୍ରୀ ଭାବେ ନେବେ ଶପଥ । ରାତି ୮ଟା ୩୦ ମିନିଟରେ ନେବେ ଶପଥ । ଓଲି ସରକାରର ପତନ ପରେ ସେନା ନିୟନ୍ତ୍ରଣରେ ରହିଛି ଶାସନ। ଗତ କିଛି ଦିନ ଧରି ନେପାଳର ପରିସ୍ଥିତି ଭଲ ନାହିଁ। 

ଆତଙ୍କ, ଅସ୍ଥିରତା ଓ ଉତ୍ତେଜନା ଭିତରେ ଦ୍ଵନ୍ଦ୍ଵ ହଟିଛି । ସାରା ରାତି ବୈଠକ ପରେ ନେପାଳର ଅନ୍ତରୀଣ ପ୍ରଧାନମନ୍ତ୍ରୀ ନାଁକୁ ନେଇ ହୋଇଛି ସହମତି । ନେପାଳର ସେନା ପ୍ରମୁଖ ଓ ରାଷ୍ଟ୍ରପତି ସୁଶୀଳା କାର୍କୀ ଙ୍କ ନାଁକୁ ଅନ୍ତରୀଣ ପ୍ରଧାନମନ୍ତ୍ରୀ ପଦ ପାଇଁ ଅନୁମୋଦନ କରିଛନ୍ତି । ନେପାଳ ସୁପ୍ରିମକୋର୍ଟର ପୂର୍ବତନ ମୁଖ୍ୟ ବିଚାରପତି ସୁଶୀଳା ନିର୍ବାଚନ ପର୍ଯ୍ୟନ୍ତ ଦେଶର ଅନ୍ତରୀଣ ପ୍ରଧାନମନ୍ତ୍ରୀ ଭାବେ କାର୍ଯ୍ୟଭାର ତୁଲାଇବେ । ଅନ୍ତରୀଣ ସରକାର ଗଠନରେ ସମସ୍ତଙ୍କ ସହମତି ପାଇଁ ବିଳମ୍ବିତ ରାତିରେ ନେପାଳ ରାଷ୍ଟ୍ରପତି, ସେନା ମୁଖ୍ୟ ଓ ସୁଶୀଳା କାର୍କୀଙ୍କୁ ନେଇ କାଠମାଣ୍ଡୁରେ ରାତି ସାରା ଗୁରୁତ୍ଵପୂର୍ଣ୍ଣ ବୈଠକ ଚାଲିଥିଲା ।