ତିକ୍ତତା ଓ ସୁରକ୍ଷା ଦୃଷ୍ଟିରୁ ଭାରତୀୟ କ୍ରିକେଟ୍ ଦଳ ଚାମ୍ପିଅନ୍ସ ଟ୍ରଫି ଖେଳିବାକୁ ପଡ଼ୋଶୀ ପାକିସ୍ତାନକୁ ଯାଇ ନାହିଁ । ଭାରତୀୟ ଦଳ ତାର ସମସ୍ତ ମ୍ୟାଚ୍ ଦୁବାଇରେ ଖେଳୁଛି । ହେଲେ ଅନ୍ୟ ୬ଟି ଦଳ ପାକିସ୍ତାନରେ ଟୁର୍ଣ୍ଣାମେଣ୍ଟ ଖେଳୁଛନ୍ତି । ପାକିସ୍ତାନରେ ଚାମ୍ପିଅନ୍ସ ଟ୍ରଫି ଚାଲିଥିବା ବେଳେ ଆତଙ୍କୀ ଆକ୍ରମଣ ନେଇ ଗୁଇନ୍ଦା ସୂଚନା ମିଳିଛି । ପାକିସ୍ତାନର ଗୁଇନ୍ଦା ସଂସ୍ଥା (PIB) ଆଲର୍ଟ ଜାରି କରିଛି ।

ଆଇସିସି ଚାମ୍ପିଅନ୍ସଟ୍ରଫି ପାଇଁ ପାକିସ୍ତାନ ଆସିଥିବା ବିଦେଶୀଙ୍କୁ ଟାର୍ଗେଟ୍ ପାଇଁ ଷଡ଼ଯନ୍ତ୍ର କରୁଛି ଇସଲାମିକ ଷ୍ଟେଟ ଖୁରାସାନ ପ୍ରାନ୍ତ (ISKP) । ପିଆଇବି ଅନୁସାରେ, ବିଦେଶୀ ନାଗରିକଙ୍କୁ ଅପହରଣ କରିବା ଲାଗି ଆତଙ୍କବାଦୀ ଷଡ଼ଯନ୍ତ୍ର କରୁଛନ୍ତି । ଆଉ ଏହି ଖବର ଆସିବା ପରେ ଚାମ୍ପିଅନ୍ସ ଟ୍ରଫି ଦେଖିବାକୁ ପାକିସ୍ତାନ ଯାଇଥିବା ବିଦେଶୀଙ୍କ ସୁରକ୍ଷା ନେଇ ପ୍ରଶ୍ନ ଉଠିଛି ।

ସୂଚନା ଅନୁସାରେ, ଆଇଏସ୍‌କେପି ଆତଙ୍କୀ ସହର ଉପକଣ୍ଠରେ ଭଡ଼ା ଘରେ ନେବାକୁ ଯୋଜନା କରୁଛନ୍ତି । ଯେଉଁଠି ସିସିଟିଭି ନଥିବ । ଏପରିକି ଉକ୍ତ ସ୍ଥାନକୁ କେବଳ ରିକ୍ସା ଓ ବାଇକ୍‌ ଯୋଗେ ଯାଇ ହେବ । ଏଭଳି ସ୍ଥାନର ସନ୍ଧାନ କରୁଛନ୍ତି ଆତଙ୍କବାଦୀ ।

ଆହୁରି ଜଣାପଡ଼ିଛି ବିଦେଶୀଙ୍କୁ ଅପହରଣ କରିବା ଓ ଅପହୃତଙ୍କୁ ରାତିରେ ଭଡ଼ା ଘରକୁ ନେଇ ପାଇଁ ଆତଙ୍କୀ କରିଛନ୍ତି ଯୋଜନା । ବନ୍ଦର, ବିମାନବନ୍ଦର, କାର୍ଯ୍ୟାଳୟ ଓ ହୋଟେଲରୁ ବିଦେଶୀ ନାଗରିକ ବିଶେଷକରି ଚୀନ ଏବଂ ଅରବ ଦେଶର ଲୋକଙ୍କୁ ଅପହରଣ ପାଇଁ ଯୋଜନା କରିଛନ୍ତି ।

ପାକିସ୍ତାନର ଗୁଇନ୍ଦା ଆଲର୍ଟ ଭିତରେ ଆଫଗାନିସ୍ତାନର ଜେନରାଲ୍ ଡାଇରେକ୍ଟର ଅଫ୍ ଇଣ୍ଟେଲିଜେନ୍ସ ମଧ୍ୟ ଚେତାବନୀ ଜାରି କରିଛନ୍ତି । ଆଫଗାନିସ୍ତାନର ପ୍ରମୁଖ ସ୍ଥାନରେ ଆଇଏସ୍‌କେପି ଆକ୍ରମଣ ଆଶଙ୍କା କରିବା ସହ ସୁରକ୍ଷା ବ୍ୟବସ୍ଥାକୁ ବଢ଼ାଇ ଦିଯାଇଛି ।

ସୁରକ୍ଷା ଦୃଷ୍ଟିରୁ ପୂର୍ବରୁ ହିଁ ଭାରତ, ପାକିସ୍ତାନରେ ଚାମ୍ପିଅନ୍ସ ଟ୍ରଫିର କୌଣସି ମ୍ୟାଚ୍ ଖେଳୁ ନାହିଁ । ହାଇବ୍ରିଡ୍‌ ମଡେଲରେ ଭାରତ ଦୁବାଇରେ ମ୍ୟାଚ୍ ଖେଳୁଥିବା ବେଳେ ଆତଙ୍କୀ ଆକ୍ରମଣ ନେଇ ଗୁଇନ୍ଦା ସୂଚନା ଓ ବିଦେଶୀ ନାଗରିକଙ୍କ ଅପହରଣ ପାଇଁ ଷଡ଼ଯନ୍ତ୍ର ପୁଣି ପାକିସ୍ତାନ ଉପରେ ପ୍ରଶ୍ନ ଉଠାଇଛି ।

Argus News | argus news | Odisha Latest News, Breaking News, Trending News, Live TV