ନୂଆଦିଲ୍ଲୀ: ଛାନିଆ ପାକିସ୍ତାନ, ଥରହର ଆତଙ୍କବାଦୀ । ଅପରେସନ୍ ସିନ୍ଦୂର ପରେ ଦୋହଲି ଯାଇଛି ପାକିସ୍ତାନୀ ଆତଙ୍କବାଦୀଙ୍କ ମେରୁଦଣ୍ଡ । ବଡ଼ କ୍ଷତି ପରେ ପାକିସ୍ତାନ ଅଧିକୃତ ପିଓକେ (PoK) ଛାଡ଼ି ନୂଆ ଆଡ୍ଡାରେ ଆତଙ୍କୀ ସଂଗଠନ ନିର୍ମାଣ ଆରମ୍ଭ କରିଛନ୍ତି । ଜୈଶ୍ ଏ ମହମ୍ମଦ ଓ ହିଜବୁଲ୍ ମୁଜାହିଦ୍ଦିନ ଭଳି ସଂଗଠନ ଏବେ ପାକିସ୍ତାନର ଖୈବର ପଖତୁନଖ୍ଵାରେ ନୂଆ ଆଡ୍ଡା ନିର୍ମାଣ କରୁଛନ୍ତି ।

ଜମ୍ମୁ-କାଶ୍ମୀର ପହଲଗାମ ଆତଙ୍କବାଦୀ ଆକ୍ରମଣର ଜବାବରେ ଭାରତ ଅପରେସନ୍ ସିନ୍ଦୂର ଆରମ୍ଭ କରିଥିଲା । ଯେଉଁଥିରେ ବଡ଼ କ୍ଷତି ସହିଥିଲା ପାକିସ୍ତାନ । ପିଓକେରେ ଥିବା ୯ଟି ଆତଙ୍କବାଦୀ କେନ୍ଦ୍ରକୁ ଧ୍ଵସ୍ତ ବିଧ୍ଵସ୍ତ କରି ଦେଇଥିଲା ଭାରତୀୟ ସେନା । ଆଉ ପରେ ଏବେ ପାକିସ୍ତାନର ଆତଙ୍କୀ ସଂଗଠନ ନୂଆ ସ୍ଥାନକୁ ସ୍ଥାନାନ୍ତରଣ ହେଉଛନ୍ତି ।

କୁହାଯାଉଛି, ପିଓକେ ଠାରୁ ଆତଙ୍କୀଙ୍କ ଲାଗି ଅଧିକ ସୁରକ୍ଷିତ ହେଉଛି ଖୈବର ପଖତୁନଖ୍ଵା । ଭାରତର ଆକ୍ରମଣ ପରେ ଆତଙ୍କୀ ସଂଗଠନକୁ ଲାଗୁଛି ପିଓକେ ଏବେ ସୁରକ୍ଷିତ ନୁହେଁ । ଯେତେବେଳେ କି ଭୌଗଳିକ ସ୍ଥିତି ଦୃଷ୍ଟିରୁ ଖୈବର ପଖତୁନଖ୍ଵା ଆଫଗାନ ସୀମା ନିକଟରେ ରହିଛି ।

ସୂଚନା ଅନୁସାରେ, ବିଭିନ୍ନ ଆତଙ୍କବାଦୀ ସଂଗଠନ ଏଭଳି ନିଷ୍ପତ୍ତି ସେନା ରହିଛି । ନିକଟରେ ପୋଲିସ ସୁରକ୍ଷାରେ ଜୈଶ ଏ ମହମ୍ମଦର ଉତ୍ସବ ପାଳନ କରାଯାଇଥିଲା । ଜମିୟନ ଉଲେମା-ଏ-ଇସଲାମ ଭଳି ରାଜନୈତିକ-ଧାର୍ମିକ ସଂଗଠନଙ୍କ ଭାଗିଦାରୀ ବି ଏଥିରେ ରହିଥିବା ଅଭିଯୋଗ ହେଉଛି ।

ପାକିସ୍ତାନର ବିଭିନ୍ନ ଆତଙ୍କବାଦୀ ସଂଗଠନ ଖୈବର ପଖତୁନଖ୍ଵାରେ କାୟା ବିସ୍ତାର କରୁଛନ୍ତି । ୨୦୨୫ ସେପ୍ଟେମ୍ବର ୧୪ ଭାରତ-ପାକିସ୍ତାନ ମ୍ୟାଚ୍‌ ଆରମ୍ଭର ଠିକ୍ ପୂର୍ବରୁ କିମନସେହରା ଜିଲ୍ଲାର ଗଢି ହବିବୁଲ୍ଲାହରେ ଏକ ସାର୍ବଜନୀନ ଅଭିଯାନ ହୋଇଥିଲା । ଦେବବନ୍ଦୀ ଧାର୍ମିକ ସଭା ନାଁରେ ଲୋକଙ୍କୁ ଭର୍ତ୍ତି କରାଯାଇଥିଲା ।

ଯେଉଁଥିରେ ଜୈଶ୍‌ର ସଦସ୍ୟ ଏମ୍୪ ରାଇଫଲ୍ ସହ ପୋଲିସ ଫୋର୍ସ ନଜର ଆସିଥିଲେ । ଜୈଶର ସାର୍ବଜନୀନ ରାଲିକୁ ପୋଲିସ ଯୋଗାଇ ଦେଇଥିଲା ସଶସ୍ତ୍ର ସୁରକ୍ଷା । ଯେଉଁଥିରେ ମୌଲାନା ମସୁଦ ଅଜହର ୩୦ ମିନିଟ୍‌ରୁ ଅଧିକ ସମୟ ଧରି ଭାଷଣ ଦେଇଥିଲା । ଆଉ ଭାଷଣରେ ସେ ଓସାମା ବିନ ଲାଦେନର ଗୁଣଗାନ କରିଥିଲା ।

ଆଉ ସଭାରେ ଉପସ୍ଥିତ ଲୋକଙ୍କୁ ସେ କହିଥିଲା, ଖୈବର ପଖତୁନଖ୍ଵା ଆତଙ୍କବାଦୀଙ୍କ ଲାଗି କିଭଳି ସୁରକ୍ଷିତ ଅଟେ । ଆଉ ଏହା ବତାଇବା ପାଇଁ ସେ କନ୍ଦାହାର ବିମାନ ଅପହରଣ କଥାକୁ ଅବତାରଣା କରିଥିଲା । କହିଥିଲା, ବିମାନ ହାଇଜାତ୍ ପରେ ମସୁଜ ଅଜହର ଭାରତର ତିହାର ଜେଲ୍‌ରୁ ପାକିସ୍ତାନ ଫେରି ଖୈବର ପଖତୁନଖ୍ଵାର ବାଲାକୋଟରେ ମୁଖ୍ୟାଳୟ କରିଥିଲେ ।