ବାଂଲାଦେଶର ରାଜଧାନୀ ଢାକାରେ ଅଚାନକ ଖସିଲା ଏୟାରକ୍ରାଫ୍ଟ । ବିମାନଟି କମ୍ ଉଚ୍ଚତାରେ ଉଡୁଥିବା ବେଳେ ହଠାତ୍ ତଳକୁ ଖସିବା ଆରମ୍ଭ କରିଥିଲା । ନଡିଆ ଗଛରେ ପିଟି ହେବା ପରେ ବିମାନଟି ଅତ୍ୟନ୍ତ ବିପଜ୍ଜନକ ଭାବେ ଉତ୍ତରାର ମାଇଲଷ୍ଟୋନ୍ କଲେଜ ଉପରେ ଖସି ପଡିଥିଲା । ଚାହୁଁ ଚାହଁ ବିମାନଟି ହୁ ହୁ ଜଳିବାରେ ଲାଗିଥିଲା । ଆଉ ନିଆଁର ଫସି ଯାଇଥିଲେ କଲେଜରେ ପଢୁଥିବା ଛାତ୍ରଛାତ୍ରୀ । ଆଖି ପିଛୁଳାକେ ଜ୍ବଳନ୍ତ ଅଗ୍ନି ପିଣ୍ଡୁଳାରେ ପରିଣତ ହୋଇଥିଲା କଲେଜ କ୍ୟାମ୍ପସ । ନିଆଁର ତାତି ଏତେ ଅଧିକ ଥିଲା ଯେ, ସେମାନଙ୍କୁ ଉଦ୍ଧାର କରିବା ସ୍ଥାନୀୟ ଲୋକଙ୍କ ପାଇଁ କାଠିକର ପାଠ ହୋଇଯାଇଥିଲା । ସମସ୍ତେ ନିର୍ବାକ ହୋଇ ନିଆଁର କରାଳରୂପକୁ ଦେଖୁଥିଲେ ।

ଘଟଣାସ୍ଥଳରେ ଅଗ୍ନିଶମ ବାହିନୀ ପହଞ୍ଚିବା ପରେ ଉଦ୍ଧାରକାର୍ଯ୍ୟ ତ୍ବରାନ୍ବିତ ହୋଇଥିଲା । କିନ୍ତୁ ସେତେବେଳକୁ ବହୁତ ବିଳମ୍ବ ହୋଇଥିଲା । ବର୍ତ୍ତମାନ ସୁଦ୍ଧା ୧୬ଜଣ ଛାତ୍ରଛାତ୍ରୀଙ୍କ ମୃତ୍ୟୁ ହୋଇଥିବା ବେଳେ ଦୁଇଜଣ ଅଧ୍ୟାପକଙ୍କ ମୃତଦେହ ଉଦ୍ଧାର କରାଯାଇଛି । ଛାତ୍ରଛାତ୍ରୀଙ୍କ ମୃତଦେହ ଉଦ୍ଧାର ପରେ ଘଟଣାସ୍ଥଳରେ ଶୋକାକୁଳ ପରିବେଶ ସୃଷ୍ଟି ହୋଇଥିଲା । ଉପସ୍ଥିତ ପ୍ରତ୍ୟକ୍ଷଦର୍ଶୀମାନେ ନିଜକୁ ସମ୍ଭାଳି ପାରି ନଥିଲେ । ୧୦୦ରୁ ଅଧିକ ଛାତ୍ରଛାତ୍ରୀଙ୍କୁ ମେଡିକାଲରେ ଭର୍ତ୍ତି କରାଯାଇଛି । ପାଇଲଟଙ୍କ ଅର୍ଦ୍ଧ ଦଗ୍ଦ ମୃତଦେହ ଉଦ୍ଧାର ହୋଇଛି । ବାଂଲାଦେଶ ଏୟାରଫୋର୍ସ ପକ୍ଷରୁ ଦୁର୍ଘଟଣାର ତଦନ୍ତ ପାଇଁ ନିର୍ଦ୍ଦେଶ ଦିଆଯାଇଛି ।

ସ୍ଥାନୀୟ ସମୟ ଅପରାହ୍ନ ୧ଟା ୬ ମିନିଟ୍ । ବାଂଲାଦେଶ ବାୟୁସେନାର F 7 ଟ୍ରେନିଂ ଏୟାର କ୍ରାଫ୍ଟ ଉଡାଣ ଭରିଥିଲା । କିନ୍ତୁ ମାତ୍ର ୨୪ ମିନିଟ ପରେ ବିମାନର ଗତିରେ ଦ୍ରୁତ ପରିବର୍ତ୍ତନ ଦେଖାଦେଇଥିଲା । ଚାହୁଁଚାହଁ ବିମାନଟି ତଳକୁ ଖସି ପ୍ରଥମେ ଏକ ନଡିଆ ଗଛରେ ପିଟି ହୋଇଥିଲା । ପରେ ନିକଟରେ ଥିବା ଏକ କଲେଜ କ୍ୟାମ୍ପସ ଉପରେ ପଡିଥିଲା । ସେଠାରେ ଦୁଇ ହଜାରରୁ ଅଧିକ ଛାତ୍ରଛାତ୍ରୀ ଅଧ୍ୟୟନ କରୁଥିଲେ । ଚୀନ ନିର୍ମିତ ଏହି ଅତ୍ୟାଧୁନିକ ବିମାନ F 7 ଦୁର୍ଘଟଣାକୁ ନେଇ ଗଭୀର ଶୋକ ପ୍ରକାଶ କରିଛନ୍ତି ବାଂଲାଦେଶର କାମଚଳା ସରକାରର ମୁଖ୍ୟ ମହମ୍ମଦ ୟୁନୁସ । ଏଥିସହ ଦିନକ ପାଇଁ ବାଂଲାଦେଶରେ ରାଷ୍ଟ୍ରୀୟଶୋକ ଘୋଷଣା କରାଯାଇଛି ।