ଅର୍ଗସ ବ୍ୟୁରୋ: ଋଷିଆ ଗସ୍ତ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ୨୨ ତାରିଖରୁ ସେ ଋଷିଆ ଗସ୍ତରେ ଯିବେ । ଏହି ଗସ୍ତ ସମୟରେ ବ୍ରିକ୍ସ ସମ୍ମିଳନୀରେ ସେ ଯୋଗ ଦେବାର କାର୍ଯ୍ୟକ୍ରମ ରହିଛି । ପୂର୍ବରୁ ବି ମୋଦିଙ୍କୁ ନିମନ୍ତ୍ରଣ ଦେଇଥିଲେ ପୁଟିନ୍‌ । ଆଉ ପୁଟିନଙ୍କ ନିମନ୍ତ୍ରଣ ରକ୍ଷା କରିଛନ୍ତି ମୋଦି । ଏହି ଗସ୍ତ ସମୟରେ ଉଭୟ ନେତାଙ୍କ ମଧ୍ୟରେ ଦ୍ଵିପାକ୍ଷିକ ଆଲୋଚନା ହେବ ବୋଲି କୁହାଯାଉଛି ।

ଏଥର ଋଷିଆ ବ୍ରିକ୍ସ ସମ୍ମିଳନୀର ଆୟୋଜନ କରୁଛି । ଏହି ସମ୍ମିଳନୀ ବେଶ ଗୁରୁତ୍ଵପୂର୍ଣ୍ଣ ମଧ୍ୟ । ସେଇଥି ଲାଗି ତ ମୋଦି ୨୨ରୁ ଗସ୍ତ କରିବେ ଋଷିଆ । ବୈଦେଶିକ ବ୍ୟାପାର ମନ୍ତ୍ରଣାଳୟ ପକ୍ଷରୁ ଏନେଇ ସୂଚନା ଦିଆଯିବା ସହିତ ଜାରି ହୋଇଥିବା ବିବୃତିରେ କୁହାଯାଇଛି ଯେ ମୋଦୀଙ୍କ ରୁଷ୍ ଗସ୍ତ ସମୟରେ ପ୍ରଧାନମନ୍ତ୍ରୀ ବ୍ରିକ୍ସ ସଦସ୍ୟ ରାଷ୍ଟ୍ରଗୁଡ଼ିକର ପ୍ରତିପକ୍ଷ ଏବଂ ଆମନ୍ତ୍ରିତ ନେତାଙ୍କ ସହ କାଜାନରେ ଦ୍ୱିପାକ୍ଷିକ ବୈଠକ କରିବେ । ଏଥର ବ୍ରିକ୍ସ ଶିଖର ସମ୍ମିଳନୀର ବିଷୟବସ୍ତୁ ରହିଛି ‘ବିଶ୍ୱ ବିକାଶ ଓ ନିରାପତ୍ତା ପାଇଁ ବହୁପକ୍ଷବାଦକୁ ସୁଦୃଢ଼ କରିବା’।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପରେ ଏବେ ପୁରା ବିଶ୍ଵର ନଜର । ଯେହେତୁ ୟୁକ୍ରେନ ଓ ଋଷିଆ ମଧ୍ୟରେ ଲାଗି ରହିଥିବା ଯୁଦ୍ଧ ବଢିବାରେ ଲାଗିଛି । ତେଣୁ ମୋଦି ମଧ୍ୟସ୍ଥତା କରୁ ବୋଲି ଚାହୁଁଥିଲେ ୟୁକ୍ରେନ୍‌ ରାଷ୍ଟ୍ରପତି ଜେଲେନସ୍କି । ଏମିତିକି ଦୁଇ ଦୁଇଥର ମୋଦିଙ୍କ ସହ ସାକ୍ଷାତ କରିଥିଲେ । ମୋଦି ବି ୟୁକ୍ରେନ୍‌ ଗସ୍ତ କରିଥିଲେ । ତେଣୁ ବ୍ରିକ୍ସ ସମ୍ମିଳନୀରେ ଦ୍ଵିପାକ୍ଷିକ ଆଲୋଚନା ବେଳେ ମୋଦି ଯଦ୍ଧ ପ୍ରସଙ୍ଗରେ ଆଲୋଚନା କରିବେ କି ନାହିଁ ସେନେଇ ବି ଚର୍ଚ୍ଚା ଚାଲିଛି । ସୂଚନା ଅନୁସାରେ, ଜୁଲାଇରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ରୁଷ୍‌ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ମଧ୍ୟରେ ହୋଇଥିବା ବୈଠକ ପରେ ଅକ୍ଟୋବରରେ ଦୁଇ ନେତାଙ୍କ ମଧ୍ୟରେ ଦ୍ୱିପାକ୍ଷିକ ଆଲୋଚନା ପୁଣି ଥରେ ହେବାକୁ ଯାଉଛି । ବ୍ରିକ୍ସ ଶିଖର ସମ୍ମିଳନୀରେ ଯୋଗ ଦେବାକୁ ଆସୁଥିବା ଚୀନ୍‌ ରାଷ୍ଟ୍ରପତି ସି ଜିନପିଙ୍ଗଙ୍କ ସହ ମଧ୍ୟ ପ୍ରଧାନମନ୍ତ୍ରୀ ମୋଦି ଆଲୋଚନା କରିବାର ବି ସମ୍ଭାବନା ରହିଛି ।

ଭାରତ-ଋଷିଆ ସମ୍ପର୍କ କେମିତି ତାହା ପୁରା ବିଶ୍ଵ ଜାଣିଛି । ପ୍ରତି ମୁହୂର୍ତ୍ତରେ, ପ୍ରତି କ୍ଷେତ୍ରରେ ଭାରତ-ଋଷିଆ ଏକତ୍ରିତ ହୋଇ କାମ କରନ୍ତି । ସେଇଥିଲ ଲାଗି ତ ଭାରତର ଜାତୀୟ ସୁରକ୍ଷା ଉପଦେଷ୍ଟା ଅଜିତ ଡୋଭାଲଙ୍କ ସହ ଆଲୋଚନା କରିବା ବେଳେ ମୋଦିଙ୍କ ସହ ମୁଁ କଥାବାର୍ତ୍ତା ହେବାକୁ ଚାହୁଁଥିବା କହିଥିଲେ ପୁଟିନ୍‌ । ଋଷର ରାଷ୍ଟ୍ରପତି ଭ୍ଲାଦିମିର ପୁଟିନ ଋଷିଆର ସେଣ୍ଟ ପିଟର୍ସବର୍ଗର କୋଷ୍ଟାଣ୍ଟିନୋଭସ୍କି ପ୍ୟାଲେସରେ ଭାରତର ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲଙ୍କ ସହ ଗୁରୁତ୍ଵପୂର୍ଣ୍ଣ ବୈଠକ କରିଥିଲେ । ବୈଠକରେ ପୁଟିନ କହିଥିଲେ, ଆମେ କାଜାନରେ ପ୍ରଧାନମନ୍ତ୍ରୀ ମୋଦୀଙ୍କୁ ଅପେକ୍ଷା କରିଛୁ । ଅକ୍ଟୋବର ୨୨ ରେ କାଜାନରେ ଏକ ଦ୍ୱିପାକ୍ଷିକ ବୈଠକ ଆୟୋଜନ କରିବାକୁ ମୁଁ ପ୍ରସ୍ତାବ ଦେଇଛି । ତେଣୁ ଅପେକ୍ଷା କରିଛୁ କେବେ ମୋଦି ଆସିବେ ଏବଂ ଦ୍ଵିପାକ୍ଷିକ ଆଲୋଚନା ହେବ । ଆଉ ଏବେ ବନ୍ଧୁ ରାଷ୍ଟ୍ରର କଥା ରଖି ଗସ୍ତ କରୁଥିବାରୁ ଚର୍ଚ୍ଚା ଜୋର ଧରିଛି ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV