ଅର୍ଗସ ବ୍ୟୁରୋ: ଇତିହାସ ରଚିଲା ଭାରତୀୟ ମହାକାଶ ଗବେଷଣା ସଂସ୍ଥା । ଆନ୍ଧ୍ରପ୍ରଦେଶର ଶ୍ରୀହରିକୋଟା ସ୍ଥିତ ସତୀଶ ଧାୱନ ମହାକାଶ କେନ୍ଦ୍ରରୁ ୟୁରୋପୀୟ ସ୍ପେସ ଏଜେନ୍ସିର ପ୍ରୋବା-୩ ସାଟେଲାଇଟର ସଫଳ ଉତକ୍ଷେପଣ ହୋଇଛି। ମହାକାଶଯାନ PSLV-C59 ରକେଟ ସାହାଯ୍ୟରେ ESAର ଗୁରୁତ୍ବପୂର୍ଣ୍ଣ ସାଟେଲାଇଟ ପ୍ରୋବା-୩ ଲଞ୍ଚ୍ କରିବାରେ ସଫଳ ହୋଇଛି ଇସ୍ରୋ । ଏହା ଅଧୀନରେ ଦୁଇଟି ଛୋଟ ଉପଗ୍ରହ ଏକତ୍ର ଉତକ୍ଷେପଣ କରାଯାଇଛି । ଦୁଇ ଉପଗ୍ରହ ପୃଥିବୀର କକ୍ଷପଥରେ ପହଞ୍ଚିବା ପରେ ପରସ୍ପର ସହିତ ସମ୍ପର୍କ ବଜାୟ ରଖିବା ସହ ସୂର୍ଯ୍ୟଙ୍କ ରହସ୍ୟ ସମାଧାନ ପାଇଁ କାର୍ଯ୍ୟ ଆରମ୍ଭ କରିଛନ୍ତି। ଗୁରୁବାର ଅପରାହ୍ନ ୪ ଟା ୪ ମିନିଟରେ ସଫଳ ଲଞ୍ଚ କରି ନୂଆ ମାଇଲଷ୍ଟୋନ ଛୁଇଁଛି ଇସ୍ରୋ । ଇସ୍ରୋ ପକ୍ଷରୁ ବୁଧବାର ମିଶନ ଲଞ୍ଚ ତାରିଖ ଧାର୍ଯ୍ୟ ହୋଇଥିଲା । ଲଞ୍ଚ ସମୟ ଅପରାହ୍ନ 4ଟା 12ରେ ମହାକାଶଯାନରେ ତ୍ରୁଟି ଦେଖାଦେବାରୁ ମିଶନକୁ ସ୍ଥଗିତ ରଖାଯାଇଥିଲା ।  

ପ୍ରୋବା-୩ ୟୁରୋପୀୟ ସ୍ପେସ୍ ଏଜେନ୍ସିର ଇନ୍-ଅର୍ବିଟ୍ ପ୍ରଦର୍ଶନ ମିଶନ୍ । ଏହି ସାଟେଲାଇଟ ସ୍ଥିର ସଂରଚନା ବଜାୟ ରଖି ମହାକାଶରେ ଘୁରି ବୁଲିବେ । ନ୍ୟୁ ସ୍ପେସ୍ ଇଣ୍ଡିଆ ଲିମିଟେଡ୍ ବା NSIL, ESA ଉପଗ୍ରହକୁ ଆଲେପଟିକାଲ୍ କକ୍ଷପଥରେ ପହଞ୍ଚାଇବାକୁ ଲକ୍ଷ୍ୟ ରଖିଛି । ଆଦିତ୍ୟ ଏଲ ୱାନ ମିଶନ ପରି ଏହି ସାଟେଲାଇଟ ମାଧ୍ୟମରେ ସୂର୍ଯ୍ୟଙ୍କ ବାହ୍ୟ ଆସ୍ତରଣ ସମ୍ପର୍କରେ ସୂଚନା ସଂଗ୍ରହ କରିବ ।

ପ୍ରୋବା-୩ ଉପଗ୍ରହ ନିର୍ମାଣରେ ଇଟାଲୀ, ସ୍ପେନ୍, ବେଲଜିୟମ, ସ୍ୱିଜରଲ୍ୟାଣ୍ଡ ଏବଂ ପୋଲାଣ୍ଡ ଭଳି ଦେଶ ସହଯୋଗ କରିଛନ୍ତି। ପ୍ରୋବା-୩ ସୂର୍ଯ୍ୟଙ୍କ ଆଭ୍ୟନ୍ତରୀଣ ପରିବେଶର ଚିତ୍ର ଉଠାଇବାରେ ସଫଳ ହେବ ବୋଲି ISRO ପକ୍ଷରୁ କୁହାଯାଇଛି । ଏହି ମିଶନରେ ବାୟୁମଣ୍ଡଳର ସର୍ବୋଚ୍ଚ ସ୍ତରରେ ସୂର୍ଯ୍ୟଙ୍କ ପ୍ରଭାବ, ସୂର୍ଯ୍ୟ ଉତ୍ତାପ, ସୌର ଝଡ ଆଦି ଗୁରୁତ୍ବପୂର୍ଣ୍ଣ ତଥ୍ୟ ସଂଗ୍ରହ କରାଯିବ । ଯାହା ଉଚ୍ଚସ୍ତରୀୟ ଗବେଷଣାକୁ ସାହାଯ୍ୟ କରିବା ସହ ପାଣିପାଗ ସମ୍ବନ୍ଧରେ ଆଗୁଆ ସୂଚନା ପ୍ରଦାନ କରିପାରିବ ।