Airport Attack / ସାଉଦି ଆରବର କିଙ୍ଗ ଫାହଦ ବିମାନବନ୍ଦରରେ ବଡ଼ ଆକ୍ରମଣ

ସାଉଦି ଆରବର ପୂର୍ବାଞ୍ଚଳ ଦମ୍ମାମସ୍ଥିତ କିଙ୍ଗ ଫାହଦ ଆନ୍ତର୍ଜାତୀୟ ବିମାନବନ୍ଦର ଉପରେ ବଡ଼ ଧରଣର ଆକ୍ରମଣ ହୋଇଥିବା ଖବର ସାମ୍ନାକୁ ଆସିଛି । ଏହି ଆକ୍ରମଣରେ ଜଣେ ବ୍ୟକ୍ତିଙ୍କ ମୃ*ତ୍ୟୁ ହୋଇଥିବାବେଳେ ଅନ୍ୟ ୮ ଜଣ ଆହତ ହୋଇଛନ୍ତି । ବୁଧବାର ସନ୍ଧ୍ୟାରେ ଏହି ଆକ୍ରମଣ ହୋଇଥିବା ନେଇ ଗୁରୁବାର ସକାଳେ ସାଉଦି ସିଭିଲ୍ ଏଭିଏସନ୍ ଅଥରିଟି ପକ୍ଷରୁ ସୂଚନା ଦିଆଯାଇଛି ।

ଆକ୍ରମଣ ଯୋଗୁଁ ବିମାନବନ୍ଦରର କିଛି ଅଂଶରେ ବ୍ୟାପକ କ୍ଷୟକ୍ଷତି ହୋଇଛି । ସୁରକ୍ଷା ଦୃଷ୍ଟିରୁ ବିମାନବନ୍ଦରରୁ ବିମାନ ଚଳାଚଳ ବାତିଲ କରାଯିବା ସହ କେତେକ ବିମାନକୁ ଅନ୍ୟ ବିମାନବନ୍ଦରକୁ ଡାଇଭର୍ଟ କରାଯାଇଥିବା ସୂଚନା ମିଳିଛି । ଅନ୍ତର୍ଜାତୀୟ ଫ୍ଲାଇଟ୍ ଟ୍ରାକିଂ ସେବା ଫ୍ଲାଇଟ୍ ରାଡାର୍ ୨୪ ମଧ୍ୟ ଏ ସମ୍ପର୍କରେ ସୂଚନା ଦେଇଛି ।

ପୂର୍ବରୁ ସାଉଦି ଆରବକୁ ଲକ୍ଷ୍ୟ କରି ହୁତି ବିଦ୍ରୋହୀମାନେ କ୍ଷେପଣାସ୍ତ୍ର ଓ ଡ୍ରୋନ୍ ଆକ୍ରମଣ କରିଥିବାରୁ ଏହି ଘଟଣା ପଛରେ ସେମାନଙ୍କ ହାତ ଥାଇପାରେ ବୋଲି ଅନୁମାନ କରାଯାଉଛି । ତେବେ ଆକ୍ରମଣର ପ୍ରକୃତ କାରଣ ଏବଂ ଏଥିରେ କେଉଁ ଗୋଷ୍ଠୀର ସମ୍ପୃକ୍ତି ରହିଛି, ତାହା ଏଯାଏଁ ସ୍ପଷ୍ଟ ହୋଇନାହିଁ । ସାଉଦି ମିଳିତ ସେନା ପୂର୍ବାଞ୍ଚଳରେ ଚାରିଟି ଡ୍ରୋନ୍ ଆକ୍ରମଣକୁ ପଣ୍ଡ କରିଥିବା ମଧ୍ୟ ଜଣାପଡ଼ିଛି ।

ଅନ୍ୟପଟେ, ମଧ୍ୟପ୍ରାଚ୍ୟରେ ବଢ଼ୁଥିବା ଉତ୍ତେଜନାକୁ ନେଇ ଆମେରିକା ସରକାର ସତର୍କତାମୂଳକ ପଦକ୍ଷେପ ନେଇଛନ୍ତି । ସାଉଦି ଆରବ ସମେତ ସଂଯୁକ୍ତ ଆରବ ଏମିରେଟ୍ସ, ଜୋର୍ଡାନ, କାତାର ଓ ବାହାରିନରେ ଅବସ୍ଥାପିତ ଆମେରିକୀୟ ଦୂତାବାସ କର୍ମଚାରୀଙ୍କ ପରିବାରବର୍ଗଙ୍କୁ ସେହି ଦେଶ ଛାଡ଼ିବାକୁ ନିର୍ଦ୍ଦେଶ ଦିଆଯାଇଛି । ଏହି ଘଟଣା ମଧ୍ୟପ୍ରାଚ୍ୟର ସୁରକ୍ଷା ପରିସ୍ଥିତିକୁ ଆହୁରି ଜଟିଳ କରିଛି । ଘଟଣାର ଅଧିକ ତଦନ୍ତ ଜାରି ରହିଛି ।