ଶୁକ୍ରବାର ଠାରୁ ଜଙ୍ଗଲ ଜଳୁଛି, ୯୦୦୦ ଦମକଳ ବାହିନୀର ପ୍ରୟାସ ସତ୍ତ୍ଵେ ଆୟତ୍ତକୁ ଆସୁନି ନିଆଁ
ନିଆଁ ଲାଗିଛି, ଗୋଟିଏ ପରେ ଗୋଟିଏ ଜଙ୍ଗଲକୁ ବ୍ୟାପୁଛି । ଶୁକ୍ରବାର ଠାରୁ ଲାଗିଥିବା ନିଆଁ ବ୍ୟାପି ଚାଲିଥିବା ବେଳେ ୨୪ ଜଣଙ୍କ ଜୀବନ ନେଲାଣି । ୨୦୦ରୁ ଅଧିକ ଭିତ୍ତିଭୂମି ନଷ୍ଟ ହୋଇ ଯାଇଥିବା ବେଳେ ଜଳି ଯାଇଛି ଏକ ପୁରାତନ ବୁଦ୍ଧ ମନ୍ଦିର । ଦକ୍ଷିଣ କୋରିଆରେ ପ୍ରାୟ ୨୩ ହଜାର ୩୩୦ ଏକର ଜଙ୍ଗଲ ଜଳୁଛି । ଏହି ବନାଗ୍ନିକୁ ଦକ୍ଷିଣ କୋରିଆର ସବୁଠୁ ବିନାଶକାରୀ ନିଆଁ କୁହା ଯାଉଛି ।
ଜଙ୍ଗଲ ନିଆଁରେ ୨୪ ଜଣଙ୍କ ଜୀବନ ଯାଇଥିବା ବେଳେ ସେଥିରେ ଜଣେ ହେଲିକପ୍ଟର ପାଇଲଟ, ୪ ଜଣ ଅଗ୍ନିଶମ ଓ ସରକାରୀ କର୍ମଚାରୀ ଅଛନ୍ତି । ନିଆଁ ଲିଭାଇବା ବେଲେ ଦକ୍ଷିଣ ପୂର୍ବ ସହର ୟୁସେଙ୍ଗରେ ହେଲିକପ୍ଟର କ୍ରାସ୍ ହୋଇଥିବା ଜଣାପଡ଼ିଛି । ତେବେ ସେଥିରେ ପାଇଲଟଙ୍କ ବ୍ୟତୀତ ଅନ୍ୟ କୌଣସି ସଦସ୍ୟ ନଥିଲେ ।
ଅଗ୍ନିକାଣ୍ଡ ଯୋଗୁଁ ଏକାଧିକ ଘର ସହ କାରଖାନା ମଧ୍ୟ ଜଳି ଯାଇଛି । ୨୭ ହଜାରରୁ ଅଧିକ ଲୋକଙ୍କୁ ଅନ୍ୟତ୍ର ସ୍ଥାନାନ୍ତର କରାଯାଇଛି । ନିଆଁ ଆୟତ୍ତ ପାଇଁ ୯ ହଜାରରୁ ଅଧିକ ଦମକଳ ବାହିନୀ ପ୍ରୟାସ ଜାରି ରଖିଛନ୍ତି । ୧୩୦ଟି ହେଲିକପ୍ଟର ବି ଆକାଶ ମାର୍ଗରୁ ପାଣି ସିଞ୍ଚନ କରୁଥିବା ବେଳେ ଜୋର୍ ପବନ ବହିବାରୁ ଅପରେସନ୍କୁ ବନ୍ଦ କରିବାକୁ ପଡ଼ିଛି ।
ଗୌଉନସାରେ ଥିବା ଏକ ପ୍ରାଚୀନ ବୁଦ୍ଧ ମନ୍ଦିର ସମ୍ପୂର୍ଣ୍ଣ ନଷ୍ଟ ହୋଇ ଯାଇଛି ଜଙ୍ଗଲ ନିଆଁରେ । ଏହି ମନ୍ଦିରଟି ସପ୍ତମ ଶତାବ୍ଦୀର ହୋଇଥିବା ବେଳେ ମନ୍ଦିରରେ ଥିବା ୩୦ଟି ଭିତ୍ତିଭୂମି ନଷ୍ଟ ହୋଇ ଯାଇଛି । ମୁଖ୍ୟ ବୁଦ୍ଧ ମୂର୍ତ୍ତିକୁ ଅନ୍ୟତ୍ର ସ୍ଥାନାନ୍ତର କରାଯାଇଛି ।
