Argus News - ମହାକାଶରେ ଥାଇ ତାଜୁବ ମହାକାଶ ବିଜ୍ଞାନୀ: ପୃଥିବୀ ଆଗରେ ଶହ ଶହ ଖାଲ

ଯୁଆଡ଼େ ଦେଖ ସିଆଡ଼େ ଖାଲି ବିରାଟ ବିରାଟ ଖାଲ ହିଁ ଖାଲ । ଆଉ ବିରାଟ ଖାଲ ଆଗରେ ଘୁରୁଛି ପୃଥିବୀ । ଖାଲି ଖାଲ ନୁହେଁ । ବିରାଟ ବିରାଟ ପାହାଡ଼ ପର୍ବତ ମଧ୍ୟ ରହିଛି । ରାତି ହେଲେ ପ୍ରବଳ ଥଣ୍ଡା । ଆଉ ଏମିତି ଦୃଶ୍ୟକୁ ଦେଖି ଆଶ୍ଚର୍ଯ୍ୟ ହୋଇ ଯାଇଛନ୍ତି ମହାକାଶ ବିଜ୍ଞାନୀ ମାନେ । ମହାକାଶ ବିଜ୍ଞାନ କ୍ଷେତ୍ରରେ ପୁଣି ଥରେ ଇତିହାସ ରଚିଛି ନାସା । ଦୀର୍ଘ ୫୦ ବର୍ଷର ଅପେକ୍ଷା ପରେ ଚନ୍ଦ୍ର ଅଭିମୁଖେ ଯାତ୍ରା କରିଛି 'ଆର୍ଟେମିସ-୨' ମିଶନ । ଆଉ ଏହି ଯାତ୍ରା ସମୟରେ ଚନ୍ଦ୍ରର ଏଭଳି କିଛି ଚିତ୍ର ସାମ୍ନାକୁ ଆସିଛି, ଯାହାକୁ ଦେଖିଲେ ଆପଣ ଆଶ୍ଚର୍ଯ୍ୟ ହୋଇଯିବେ ।

ବିରାଟ ଖାଲ ଆଗରେ ଛୋଟ ହୋଇ ଦେଖା ଯାଉଛି ପୃଥିବୀ । ଏମିତି ଲାଗୁଛି ଯେମିତି ଖାଲରେ ପୃଥିବୀ ପୋତି ହୋଇଯିବ। ଏଭଳି ଦୃଶ୍ୟ ଏବେ ସୋସିଆଲ ମିଡିଆରେ ଚହଳ ପକାଇଛି । ଏପ୍ରିଲ ୧, ୨୦୨୬ରେ ଫ୍ଲୋରିଡାର କେନେଡି ସ୍ପେସ୍ ସେଣ୍ଟରରୁ ସଫଳତାର ସହ ଉତକ୍ଷେପଣ ହୋଇଥିଲା ଆର୍ଟେମିସ-୨ । ଏହି ମିଶନରେ ୪ ଜଣ ମହାକାଶଚାରୀ ଚନ୍ଦ୍ରର ଚାରିପଟେ ବୁଲି ପୁଣି ପୃଥିବୀକୁ ଫେରିବେ। ତେବେ ବର୍ତ୍ତମାନ ନାସା ପକ୍ଷରୁ ଚନ୍ଦ୍ରର କିଛି ଅତି ନିକଟରୁ ନିଆଯାଇଥିବା ଫଟୋ ସେୟାର କରାଯାଇଛି

ଏହି ଫଟୋଗୁଡ଼ିକରେ ଚନ୍ଦ୍ରର ସେହି ଖାଲ ଖମା ରୂପ ସ୍ପଷ୍ଟ ଭାବେ ଦେଖିବାକୁ ମିଳୁଛି । ବଡ଼ ବଡ଼ ପାହାଡ଼, ଗଭୀର ଗାତ ଏବଂ ଧୂସର ରଙ୍ଗର ପଥୁରିଆ ଅଞ୍ଚଳ ଦର୍ଶାଉଛି ଯେ, ଚନ୍ଦ୍ରର ଦକ୍ଷିଣ ମେରୁ ଏବଂ ଅନ୍ୟାନ୍ୟ ଅଞ୍ଚଳ କେତେ ଜଟିଳ ଏବଂ ବିପଦଜନକ । ସେହି ଅନ୍ଧକାର ସ୍ଥାନର ମଧ୍ୟ ଫଟୋ ନିଆଯାଇଛି ଯେଉଁଠାରେ ଇସ୍ରୋର ମଙ୍ଗଯାନ ଗାୟବ ହୋଇଯାଇଥିଲା । ମହାକାଶଚାରୀମାନେ ଓରିଅନ୍ ମହାକାଶଯାନ ମଧ୍ୟରୁ ଏହି ଦୃଶ୍ୟକୁ ଦେଖି ଅତ୍ୟନ୍ତ ଭାବବିହ୍ୱଳ ହୋଇପଡ଼ିଛନ୍ତି ।

କମାଣ୍ଡର ରୀଡ୍ ୱାଇଜମ୍ୟାନ୍, ଭିକ୍ଟର ଗ୍ଲୋଭର, ଖ୍ରୀଷ୍ଟିନା କୋଚ୍ ଏବଂ ଜେରେମି ହାନସେନ୍ ଏହି ମିଶନରେ ଯାଇଛନ୍ତି । ଏହା ୧୯୭୨ ମସିହା ପରେ ପ୍ରଥମ କ୍ରୁ ମିଶନ ଯାହା ମଣିଷକୁ ପୃଥିବୀର କକ୍ଷପଥ ବାହାରକୁ ନେଇଯାଇଛି ।