ଆମେରିକାର ଆକ୍ରମଣ ପରେ ଇରାନର ପ୍ରତିଶୋଧ । ଇସ୍ରାଏଲର ବିଭିନ୍ନ ସହର ଉପରେ ୧୫ରୁ ଅଧିକ କ୍ଷେପଣାସ୍ତ୍ର ଆକ୍ରମଣ । ଆମେରିକାର ନାଁ ନନେଇ କଡ଼ା ଜବାବ ଦେବାକୁ ଇରାନ ସୁପ୍ରିମ ଲିଡରଙ୍କ ଧମକ । ଆମେରିକା ପରେ ଯୁଦ୍ଧରେ ଋଷିଆର ଏଣ୍ଟ୍ରି ନେଇ ବଢ଼ିଲା ଆଶଙ୍କା । ପୁଟିନଙ୍କୁ ଭେଟିଲେ ଇରାନର ବୈଦେଶିକ ମନ୍ତ୍ରୀ । ସେପଟେ ଯୁଦ୍ଧ ନେଇ ଆଜି ପୁଣି ବିବୃତି ରଖିବେ ଆମେରିକା ରାଷ୍ଟ୍ରପତି ।

ଭୟଙ୍କର ବିସ୍ଫୋରଣ। କେଇ ମୁହୂର୍ତ୍ତରେ ଛାରଖାର ହୋଇଗଲା ଇରାନର ୩ ମୁଖ୍ୟ ଆଣବିକ କେନ୍ଦ୍ର । ଇସ୍ରାଏଲ-ଇରାନ ଯୁଦ୍ଧରେ ଆମେରିକାର ଏଣ୍ଟ୍ରି ପରେ ଏବେ ଏନେଇ ସାରା ବିଶ୍ବରେ ଆତଙ୍କ । ସେପଟେ ପାଲଟା ଜବାବ ଦେଇ ଇସ୍ରାଏଲ୍ ଉପରେ ଆଜି ବଡ଼ ଆକ୍ରମଣ କରିଛି ଇରାନ। ଇସ୍ରାଏଲର ବିଭିନ୍ନ ସହର ଉପରେ ୧୫ରୁ ଅଧିକ କ୍ଷେପଣାସ୍ତ୍ର ମାଡ଼ କରିଛି । ଏଥିରୁ ସବୁଠାରୁ ଭୟଙ୍କର ଆକ୍ରମଣ ହୋଇଛି ଇସ୍ରାଏଲର ଅନ୍ୟତମ ବଡ଼ ସହର ଜେରୁଜେଲମ ଉପରେ । ଯେଉଁଠି ବାଲାଷ୍ଟିକ୍ ମିସାଇଲ ମାଡ଼ ହୋଇଛି। ଏଥିରେ ଶତାଧିକ ଲୋକ ଆହତ ହୋଇଥିବା ସୂଚନା ମିଳିଛି । ଇସ୍ରାଏଲ ରାଜଧାନୀ ତେଲ ଅଭିଭ ଉପରେ ଘାତକ ଖୋରମଶହର-୪ କ୍ଷେପଣାସ୍ତ୍ର ନିକ୍ଷେପ କରିଛି ଇରାନ।

ଏତିକି ନୁହେଁ ଆହୁରି ଭୟଙ୍କର ପ୍ରତିଶୋଧ ନେବାକୁ ଉଭୟ ଆମେରିକା ଓ ଇସ୍ରାଏଲକୁ ପରୋକ୍ଷ ଚେତାବନୀ ଦେଇଛନ୍ତି ଇରାନର ସୁପ୍ରିମ ଲିଡର ଖାମନେଇ । ଇରାନର ଅପରେସନ ପ୍ରମିଜ-୩, ମୋସାଦର ଚକ୍ରବ୍ୟୁହ ଓ IDFର ଘାତକ ଆକ୍ରମଣକୁ ରୋକିପାରିନଥିବା ବେଳେ ଯୁଦ୍ଧରେ ଆମେରିକାର ଏଣ୍ଟ୍ରି ବିଶ୍ବରେ ବଡ଼ ବିନାଶର ସୁତ୍ରପାତ କରିଥିବା କହିଛି ଜାତିସଂଘ । ଇରାନ ସମର୍ଥିତ ମିଲିସିଆ ଗୋଷ୍ଠୀ ଆମେରିକୀୟ ସାମରିକ ଘାଟି ଉପରେ ଆକ୍ରମଣ କରିପାରନ୍ତି ବୋଲି ଚେତାଇ ଦେଇଛି ଜାତିସଂଘ ସୁରକ୍ଷା ପରିଷଦ ।

ସେପଟେ ଇରାନ ଆମେରିକା ଉପରେ ଆକ୍ରମଣ କରିବାକୁ ଉଦ୍ୟମ କଲେ ପରିଣତି ଭୟଙ୍କର ହେବ ବୋଲି ଚେତାଇ ଦେଇଛନ୍ତି ଆମେରିକା ଉପରାଷ୍ଟ୍ରପତି ଜେ ଡି ଭାନ୍ସ ।

ଇସ୍ରାଏଲ୍-ଇରାନ୍ ଯୁଦ୍ଧରେ ଆମେରିକା ପରେ ଏବେ ଋଷିଆର ଏଣ୍ଟ୍ରି ନେଇ ବଢ଼ିଯାଇଛି ଆଶଙ୍କା । ସୋମବାର ମସ୍କୋରେ ରାଷ୍ଟ୍ରପତି ପୁଟିନଙ୍କୁ ଭେଟିଛନ୍ତି ଇରାନ ବୈଦେଶିକ ମନ୍ତ୍ରୀ ସଦୟ ଆବ୍ବାସ ଆରାଗଛି । ଆମେରିକା ଆକ୍ରମଣରେ ଇରାନର ୟୁରାନିୟମ ଉତ୍ପାଦନ ବିକଳ୍ପ ବନ୍ଦ ହୋଇଯାଇଛି । ସେପଟେ ଇରାନ ବିରୋଧରେ ଅପରେସନ ହାମାର ପରେ ଜାତୀୟ ସୁରକ୍ଷା ସମୀକ୍ଷା କରିବାକୁ ଯାଉଛନ୍ତି ଡୋନାଲ୍ଡ ଟ୍ରମ୍ପ । କୌଣସି ସ୍ଥିତିରେ ଇରାନକୁ ଆଣବିକ ଶକ୍ତି ସମ୍ପନ୍ନ ହେବାକୁ ଦିଆଯିବ ନାହିଁ ବୋଲି ଦିନକ ତଳେ ଚେତାବନୀ ଦେଇଥିଲେ ଟ୍ରମ୍ପ୍।

ଇସ୍ରାଏଲ ଆକ୍ରମଣରେ ଏବେ ସୁଦ୍ଧା ଇରାନରେ ୯୫୦ରୁ ଅଧିକ ଲୋକଙ୍କର ଜୀବନ ଗଲାଣି। ୩ ହଜାର ୪୫୦ରୁ ଅଧିକ ଆହତ ହୋଇଛନ୍ତି । ୧୯୭୯ ପରେ ଇରାନ ଉପରେ ସବୁଠୁ ବଡ଼ ଆକ୍ରମଣ କରିଛି ଇସ୍ରାଏଲ ।

Argus News | argus news | -Argusnews Home: Odisha Latest News, Breaking News, Trending News, Live TV and more