ପୁଣି ଥରେ ଟ୍ରମ୍ପଙ୍କ ଚେତାବନୀ। ହମାସକୁ ଦେଲେ କଡା ଜବାବ। ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ହମାସକୁ ଶାନ୍ତି ପ୍ରସ୍ତାବ ଗ୍ରହଣ କରିବା ପାଇଁ ଏକ ସମୟସୀମା ଦେଇଛନ୍ତି। ଟ୍ରମ୍ପ କହିଛନ୍ତି, ହମାସ ରବିବାର (ଅକ୍ଟୋବର ୫) ସନ୍ଧ୍ୟା ୬ଟା ଭିତରେ ଶାନ୍ତି ପ୍ରସ୍ତାବ ଗ୍ରହଣ କରିବାକୁ ସମୟ ଦିଆଯାଇଛି। ଯଦି ହମାସ ଏଥିରେ ରାଜି ନ ହୁଏ, ତେବେ ଏପରି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ଯାହା ବିଶ୍ୱ ପୂର୍ବରୁ କେବେ ଦେଖି ନ ଥିବ। ଆମେରିକାର ରାଷ୍ଟ୍ରପତି ଗାଜାର ସୁରକ୍ଷା ପାଇଁ ପାଲେଷ୍ଟାଇନୀ ଲୋକମାନଙ୍କୁ ଛାଡିବାକୁ ଅନୁରୋଧ କରିଥିଲେ। ସେ କହିଛନ୍ତି, ମୁଁ ସମସ୍ତ ନିରୀହ ପାଲେଷ୍ଟାଇନୀମାନଙ୍କୁ ଏହି ସମ୍ଭାବ୍ୟ ଘାତକ ଅଞ୍ଚଳ ଛାଡ଼ି ଗାଜାର ସୁରକ୍ଷିତ ଅଞ୍ଚଳକୁ ଚାଲିଯିବାକୁ ଅନୁରୋଧ କରୁଛି। ସେଠାରେ ସେମାନଙ୍କର ଭଲ ଯତ୍ନ ନିଆଯିବ। ହମାସକୁ ଶେଷ ସୁଯୋଗ ଦିଆଯିବ।

ଟ୍ରମ୍ପ କହିଛନ୍ତି, ମଧ୍ୟପ୍ରାଚ୍ୟ ଏବଂ ଏହାର ଆଖପାଖର ଦେଶଗୁଡ଼ିକ ଏହି ଅଞ୍ଚଳରେ ଶାନ୍ତି ପ୍ରତିଷ୍ଠା ପାଇଁ ଆମେରିକା ସହିତ ସହମତ ହୋଇଛନ୍ତି, ଯେଉଁଥିରେ ଇସ୍ରାଏଲ ମଧ୍ୟ ସ୍ବାକ୍ଷର କରିଛି। ଏହି ଚୁକ୍ତିନାମା ସମସ୍ତ ବାକି ଥିବା ହମାସ ଲଢ଼ୁଆଙ୍କ ଜୀବନକୁ ମଧ୍ୟ ରକ୍ଷା କରିବ। ସମଗ୍ର ବିଶ୍ୱ ଏହି ପ୍ରସ୍ତାବ ବିଷୟରେ ଜାଣେ, ଏବଂ ଏହା ସମସ୍ତଙ୍କ ପାଇଁ ଭଲ। କୌଣସି ପ୍ରକାରେ ମଧ୍ୟପ୍ରାଚ୍ୟରେ ଶାନ୍ତି ପ୍ରତିଷ୍ଠା ହେବ। ହିଂସା ଏବଂ ବିପୁଳ ଜୀବନହାନି ବନ୍ଦ ହେବ ବୋଲି ସେ କହିଛନ୍ତି।

ଟ୍ରମ୍ପ ସୋସିଆଲ ମିଡିଆରେ ପୋଷ୍ଟ କରି କହିଛନ୍ତି, ‘ହମାସ ବହୁ ବର୍ଷ ଧରି ମଧ୍ୟପ୍ରାଚ୍ୟରେ ଏକ ବିପଦ ହୋଇ ରହିଛି। ଅକ୍ଟୋବର ୭ରେ, ଏହା ଇସ୍ରାଏଲରେ ଏକ ନରସଂହାର କରିଥିଲା, ଯେଉଁଥିରେ ଶିଶୁ ଏବଂ ମହିଳା ସମେତ ଅନେକ ଲୋକଙ୍କୁ ହତ୍ୟା କରାଯାଇଥିଲା। ପ୍ରତିଶୋଧ ସ୍ବରୂପ, ୨୫୦୦୦ ହମାସ ସୈନିକଙ୍କୁ ହତ୍ୟା କରାଯାଇସାରିଛି। ବାକି ହମାସ ସଦସ୍ୟ ସେନା ଦ୍ୱାରା ଘେରି ରହିଛନ୍ତି। ସେମାନେ କେବଳ ମୋର ନିର୍ଦ୍ଦେଶ ପାଇଁ ଅପେକ୍ଷା କରିଛନ୍ତି। ତେବେ ଟ୍ରମ୍ପଙ୍କ ଏହି ଚେତାବନୀ ପରେ ଆଗକୁ ହମାସ କଣ ପଦକ୍ଷେପ ନେଉଛି ତାହା ଉପରେ ସମସ୍ତଙ୍କ ନଜର।

ଅଧିକ ପଢ଼ନ୍ତୁ ବିଦେଶ ଖବର: