Russia Internet Outage / ରୁଷର ଡିଜିଟାଲ୍ ଦୁନିଆରେ ହାହାକାର... ୟୁକ୍ରେନ୍ ଆକ୍ରମଣରେ ସବୁ ଠପ୍

ରୁଷ-ୟୁକ୍ରେନ ଯୁଦ୍ଧର ପ୍ରଭାବ ଏବେ ଡିଜିଟାଲ ଦୁନିଆରେ ମଧ୍ୟ ଦେଖିବାକୁ ମିଳିଛି । ରୁଷରେ ଗୁଗୁଲ୍‌ ସହ ତୁଳନା କରାଯାଉଥିବା ପ୍ରମୁଖ ଟେକ୍ କମ୍ପାନୀ ୟାଣ୍ଡେକ୍ସର ଡାଟା ସେଣ୍ଟର ଉପରେ ୟୁକ୍ରେନ ଆକ୍ରମଣ କରିଥିବା ନେଇ ଗଣମାଧ୍ୟମରେ ରିପୋର୍ଟ ପ୍ରକାଶ ପାଇଛି । ଏହାର ପ୍ରଭାବ ରୁଷର ଇଣ୍ଟରନେଟ୍ ଭିତ୍ତିଭୂମି ଏବଂ ବିଭିନ୍ନ ଡିଜିଟାଲ ସେବା ଉପରେ ପଡ଼ିଥିବା ଦାବି କରାଯାଉଛି । ବ୍ୟାଙ୍କିଂ ଆପ୍, ଟ୍ୟାକ୍ସି ବୁକିଂ, ଖାଦ୍ୟ ଡେଲିଭରି ଏବଂ ଡିଜିଟାଲ ଡୋର୍ ଲକ୍ ଭଳି ସେବା ବାଧାପ୍ରାପ୍ତ ହୋଇଥିବା ଖବର ଆସିଛି ।

ୟାଣ୍ଡେକ୍ସ ଡାଟା ସେଣ୍ଟର ଉପରେ ଆକ୍ରମଣ, ଲୋକେ ହନ୍ତସନ୍ତ
ରିପୋର୍ଟ ଅନୁଯାୟୀ, ୟାଣ୍ଡେକ୍ସର ଡାଟା ସେଣ୍ଟର ଉପରେ ହୋଇଥିବା ଆକ୍ରମଣକୁ ରୁଷ-ୟୁକ୍ରେନ ଯୁଦ୍ଧରେ ଡିଜିଟାଲ ଭିତ୍ତିଭୂମିକୁ ଟାର୍ଗେଟ୍ କରିବାର ଏକ ନୂଆ ପର୍ଯ୍ୟାୟ ଭାବେ ଦେଖାଯାଉଛି । ଏହା ଫଳରେ ସ୍ଥାନୀୟ ଲୋକଙ୍କୁ ନିଜର ଦୈନନ୍ଦିନ କାମ କରିବାରେ ସମସ୍ୟା ହେଉଛି ।

ଜଣେ ସୋସିଆଲ ମିଡିଆ ଇନ୍‌ଫ୍ଲୁଏନ୍ସରଙ୍କ କହିବା ଅନୁସାରେ, ଯେଉଁ ଦିନ ପ୍ରଥମ ଥର ପାଇଁ ଡିଜିଟାଲ ସେବା ବନ୍ଦ ହୋଇଥିଲା, ସେହି ଦିନ ତାଙ୍କ ବିଲ୍ ପୈଠ କରିବାର ଶେଷ ତାରିଖ ଥିଲା । କିଛି ଘଣ୍ଟା ମଧ୍ୟରେ ସେବା ସ୍ୱାଭାବିକ ହୋଇଯିବ ବୋଲି ସମସ୍ତେ ଆଶା କରିଥିଲେ । କିନ୍ତୁ ଅନେକ ସେବା ପୁଣି ଆରମ୍ଭ ହୋଇନଥିବାରୁ ଜରୁରୀ ବିଲ୍ ପୈଠ କରିବାରେ ମଧ୍ୟ ସମସ୍ୟା ହେଉଛି ।

ମାସର ଆରମ୍ଭରେ ହୋଇଥିଲା ଆକ୍ରମଣ
ରିପୋର୍ଟ ଅନୁସାରେ, ଚଳିତ ମାସର ଆରମ୍ଭରେ କିଛି ଦିନ ଧରି ଏହି ଆକ୍ରମଣ ହୋଇଥିଲା । ପ୍ରଥମେ ରୁଷ ୟୁକ୍ରେନର ଡାଟା ସେଣ୍ଟରଗୁଡ଼ିକୁ ଟାର୍ଗେଟ୍ କରିଥିବା ବେଳେ ପରେ ୟୁକ୍ରେନ ପକ୍ଷରୁ ରୁଷର ଡାଟା ସେଣ୍ଟରଗୁଡ଼ିକୁ ଟାର୍ଗେଟ୍ କରାଯାଇଥିବା ଦାବି କରାଯାଇଛି ।

କେଉଁ କେଉଁ ଡିଜିଟାଲ ସେବା ଉପରେ ପଡ଼ିଛି ପ୍ରଭାବ ?
ୟାଣ୍ଡେକ୍ସର ଡାଟା ସେଣ୍ଟରଗୁଡ଼ିକରେ କ୍ଷତି ହେବା ପରେ ରୁଷର ଅନେକ ଡିଜିଟାଲ ସେବା ପ୍ରଭାବିତ ହୋଇଥିବା ରିପୋର୍ଟରେ ଦାବି କରାଯାଇଛି ।
- ୟାଣ୍ଡେକ୍ସ ପେ (Yandex Pay): ଡିଜିଟାଲ ପେମେଣ୍ଟ ଏବଂ ଅର୍ଥ ସ୍ଥାନାନ୍ତର କରିବାରେ ସମସ୍ୟା ଦେଖାଦେଇଛି ।
- ୟାଣ୍ଡେକ୍ସ ଗୋ/ଟ୍ୟାକ୍ସି (Yandex Go/Taxi): ମୋବାଇଲ୍ ଆପ୍ ମାଧ୍ୟମରେ କ୍ୟାବ୍ କିମ୍ବା ଟ୍ୟାକ୍ସି ବୁକ୍ କରିବାରେ ବାଧା ସୃଷ୍ଟି ହୋଇଛି ।
- ଫୁଡ୍ ଡେଲିଭରି ଆପ୍: ଅନଲାଇନ୍‌ରେ ଖାଦ୍ୟ ଅର୍ଡର କରିବାକୁ ଲୋକଙ୍କୁ ଅସୁବିଧା ହେଉଛି।
- ୟାଣ୍ଡେକ୍ସ କ୍ଲାଉଡ୍ (Yandex Cloud): କ୍ଲାଉଡ୍‌ରେ ଫାଇଲ୍ ସଂରକ୍ଷଣ କରିବା ଏବଂ ଆବଶ୍ୟକ ସମୟରେ ସେଗୁଡ଼ିକୁ ଖୋଲିବାରେ ସମସ୍ୟା ହୋଇପାରେ ।
- ଡିଜିଟାଲ ଡୋର୍ ଲକ୍: କିଛି ଆପାର୍ଟମେଣ୍ଟରେ ଡିଜିଟାଲ ଲକ୍ ଏବଂ ଗେଟ୍ ସିଷ୍ଟମ୍ ଥିବାରୁ ସେବା ବନ୍ଦ ହେବା ପରେ ଲୋକଙ୍କୁ ଘର କିମ୍ବା ବିଲ୍ଡିଂ ଭିତରକୁ ପ୍ରବେଶ କରିବାରେ ସମସ୍ୟା ହେଉଥିବା ଦାବି କରାଯାଇଛି ।

୫ଟି ପ୍ରମୁଖ ଡାଟା ସେଣ୍ଟର ମଧ୍ୟରୁ ୩ଟି କ୍ଷତିଗ୍ରସ୍ତ ହୋଇଥିବା ଦାବି
ରିପୋର୍ଟରେ କୁହାଯାଇଛି ଯେ ଅକ୍ଟୋବର ୮ ତାରିଖ ସୁଦ୍ଧା ୟୁକ୍ରେନର ଆକ୍ରମଣରେ ୟାଣ୍ଡେକ୍ସର ୫ଟି ପ୍ରମୁଖ ଡାଟା ସେଣ୍ଟର ମଧ୍ୟରୁ ୩ଟି କ୍ଷତିଗ୍ରସ୍ତ ହୋଇଥିଲା । ତେବେ ଏହି କ୍ଷୟକ୍ଷତିର ସଠିକ୍ ପରିମାଣ ଏବଂ ସମସ୍ତ ସେବା କେବେ ସ୍ୱାଭାବିକ ହେବ, ସେନେଇ ସ୍ୱତନ୍ତ୍ର ଭାବେ ଯାଞ୍ଚ କରିବା ଆବଶ୍ୟକ । ୟାଣ୍ଡେକ୍ସ ରୁଷର ଏକ ବଡ଼ ଟେକ୍ନୋଲୋଜି କମ୍ପାନୀ। ସର୍ଚ୍ଚ ଇଞ୍ଜିନ୍‌ଠାରୁ ଆରମ୍ଭ କରି ଅନଲାଇନ୍ ପେମେଣ୍ଟ, ଟ୍ୟାକ୍ସି ବୁକିଂ ଏବଂ କ୍ଲାଉଡ୍ ସେବା ପର୍ଯ୍ୟନ୍ତ ଏହାର ବିଭିନ୍ନ ସେବା ଲୋକଙ୍କ ଦୈନନ୍ଦିନ ଜୀବନର ଅଂଶ ପାଲଟିଛି ।

ଡିଜିଟାଲ ଭିତ୍ତିଭୂମି ଉପରେ ନିର୍ଭରଶୀଳତା ଚିନ୍ତା ବଢ଼ାଇଲା
ରୁଷରେ ଅନେକ ଡିଜିଟାଲ ପ୍ଲାଟଫର୍ମ ୟାଣ୍ଡେକ୍ସର ଭିତ୍ତିଭୂମି ଉପରେ ନିର୍ଭର କରୁଥିବାରୁ ଏହାର ସେବା ବାଧାପ୍ରାପ୍ତ ହେବାର ପ୍ରଭାବ ଅନ୍ୟ କ୍ଷେତ୍ରକୁ ମଧ୍ୟ ବ୍ୟାପିପାରେ । ଡିଜିଟାଲ ପେମେଣ୍ଟଠାରୁ ଆରମ୍ଭ କରି ଯାତାୟାତ ଏବଂ ଘରର ସୁରକ୍ଷା ବ୍ୟବସ୍ଥା ପର୍ଯ୍ୟନ୍ତ ଅନେକ ସେବା ଏହା ଉପରେ ନିର୍ଭର କରୁଥିବାରୁ ଲୋକଙ୍କ ଦୈନନ୍ଦିନ ଜୀବନ ପ୍ରଭାବିତ ହେଉଛି ।

ଏହି ଘଟଣା ପୁଣି ଥରେ ଦର୍ଶାଇଛି ଯେ ଯୁଦ୍ଧ କେବଳ ସୀମା ଏବଂ ସାମରିକ ଘାଟି ମଧ୍ୟରେ ସୀମିତ ନୁହେଁ । ଡିଜିଟାଲ ଭିତ୍ତିଭୂମି ଉପରେ ଆକ୍ରମଣ ହେଲେ ମଧ୍ୟ ସାଧାରଣ ଲୋକଙ୍କ ଅର୍ଥ କାରବାର, ଯୋଗାଯୋଗ ଏବଂ ଦୈନନ୍ଦିନ ଜୀବନ ଗଭୀର ଭାବେ ପ୍ରଭାବିତ ହୋଇପାରେ ।