ନୂଆଦିଲ୍ଲୀ: ଟାରିଫ୍ ଲାଗୁ କରି ବିଶ୍ଵକୁ ବିଚଳିତ କରିଥିବା ଡୋନାଲ୍ଡ ଟ୍ରମ୍ପଙ୍କୁ ବଡ଼ ଝଟ୍‌କା । ଆମେରିକାର କୋର୍ଟ କହିଲେ, ଟ୍ରମ୍ପଙ୍କ ଅଧିକାଂଶ ଟାରିଫ୍ ହେଉଛି ବେଆଇନ୍ । ରାଷ୍ଟ୍ରପତିଙ୍କ ନିକଟରେ ଟାରିଫ୍ କିମ୍ବା ଟିକସ ଲଗାଇବାର ଅଧିକାର ନଥିବା କୋର୍ଟ କହିଛନ୍ତି । କୋର୍ଟଙ୍କ ଏହି ଟିପ୍ପଣୀ ପରେ ଟ୍ରମ୍ପ କହିଛନ୍ତି, ଦେଶକୁ ଧ୍ଵଂସ କରିଦେବ ଏହି ନିଷ୍ପତ୍ତି ।

କ୍ଷମତାର ଦୁରୂପଯୋଗ କରୁଛନ୍ତି ଟ୍ରମ୍ପ

ଆମେରିକାର କୋର୍ଟ ଅଫ୍ ଅପିଲ୍ସ ଫର୍ ଦ ଫେଡରଲ ସର୍କିଟ ସିଧା ସିଧା କହିଛନ୍ତି, ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ତାଙ୍କ ପାଖେ ଥିବା ଜରୁରୀକାଳୀନ କ୍ଷମତାର ଅସଦ୍ ବ୍ୟବହାର କରିଛନ୍ତି । ଦୁନିଆର ପ୍ରତ୍ୟେକ ଦେଶ ଉପରେ ତାଙ୍କ ମନଇଚ୍ଛା ଟାରିଫ୍ ଲଗାଇବାର କୌଣସି ଅଧିକାର ରାଷ୍ଟ୍ରପତିଙ୍କର ନାହିଁ । ଟାରିଫ୍ ଲଗାଇବା ନେଇ ଅସୀମିତ ଅଧିକାର ରାଷ୍ଟ୍ରପତିଙ୍କୁ ଦିଆଯାଇ ପାରିବ ନାହିଁ । ତେବେ ଦେଶର ଅର୍ଥ ବ୍ୟବସ୍ଥାକୁ ଦୃଷ୍ଟିରେ ରକି କୋର୍ଟ ତତ୍କାଳ ଟ୍ରମ୍ପଙ୍କ ନିଷ୍ପତ୍ତି ଉପରେ ରୋକ୍ ଲଗାଇ ନାହାନ୍ତି ।

ଅକ୍ଟୋବର ପର୍ଯ୍ୟନ୍ତ ସମୟ

ଟାରିଫ୍ ବାହାନାରେ ଦୁନିଆକୁ ଧମକାଉଥିବା ଟ୍ରମ୍ପଙ୍କ ପାଇଁ ଏହା ଆଇନଗତ ଭାବେ ବଡ଼ ଝଟ୍‌କା । ଏହା ପୂର୍ବରୁ ନ୍ୟୁୟର୍କ ଫେଡରଲ ଟ୍ରେଡ୍ କୋର୍ଟ ମଧ୍ୟ ଟ୍ରମ୍ପଙ୍କ ଟାରିଫ୍ ନେଇ ଏଭଳି ନିଷ୍ପତ୍ତି ଶୁଣାଇଥିଲେ । ଏବେ କୋର୍ଟ ଅଫ୍ ଅପିଲ୍ସ ଫର୍ ଦ ଫେଡରଲ ସର୍କିଟ୍ ମଧ୍ୟ ଦୋହରାଇଛନ୍ତି । କୋର୍ଟ ବର୍ତ୍ତମାନ ଟାରିଫକୁ ତତ୍କାଳ ପ୍ରଭାବରେ ରୋକ୍ ଲଗାଇ ନାହାନ୍ତି ଏବଂ ସୁପ୍ରିମକୋର୍ଟ ଯିବାକୁ ଟ୍ରମ୍ପ ପ୍ରଶାସନକୁ ସମୟ ଦେଇଛନ୍ତି । ଅକ୍ଟୋବର ପର୍ଯ୍ୟନ୍ତ କୋର୍ଟଙ୍କ ଏହି ନିଷ୍ପତ୍ତିକୁ ଚ୍ୟାଲେଞ୍ଜ କରି ପାରିବେ ଆମେରିକା ରାଷ୍ଟ୍ରପତି ।

କ'ଣ କହିଲେ ଟ୍ରମ୍ପ ?

କୋର୍ଟଙ୍କ ଏହି ନିଷ୍ପତ୍ତିକୁ ନେଇ ଅସନ୍ତୋଷ ଜାହିର୍ କରିଛନ୍ତି ଡୋନାଲ୍ଡ ଟ୍ରମ୍ପ । କହିଛନ୍ତି, କୋର୍ଟଙ୍କ ଏହି ନିଷ୍ପତ୍ତିକୁ ଯଦି ଲାଗୁ ହେବାକୁ ଦିଆଯିବ, ତାହେଲେ ଏହା ଆମେରିକାକୁ ବରବାଦ କରି ଦେବ । ମାମଲାକୁ ନେଇ ହ୍ଵାଇଟ୍ ହାଉସର ମୁଖପାତ୍ର କୁଶ ଦେଶାଈ କହିଛନ୍ତି, ଆଇନ୍ ଅନୁଯାୟୀ ନିଷ୍ପତ୍ତି ନେଇଛନ୍ତି ଟ୍ରମ୍ପ ଏବଂ ଏହି ମାମଲାରେ ଆମର ବିଜୟ ହେବ ।

ଅନ୍ୟପଟେ ଆମେରିକାର ଆଇନ୍ ବିଶେଷଜ୍ଞଙ୍କ ଅନୁସାରେ, କୋର୍ଟଙ୍କ ଏହି ନିଷ୍ପତ୍ତି କ୍ଷତିରୁ ରକ୍ଷା କରି ପାରିବ । ଟ୍ରମ୍ପ ଲଗାଇଥିବା ଟାରିଫର ପ୍ରଭାବ କ'ଣ ପଡ଼ିବ ତାହା ଏବେ ସ୍ପଷ୍ଟ ନୁହଁ । ତେବେ ଆମେରିକା ବାଣିଜ୍ୟର ଭଲ ପାଇଁ କୋର୍ଟ ନିଷ୍ପତ୍ତି ଶୁଣାଇଛନ୍ତି । ଯଦି ସୁପ୍ରିମକୋର୍ଟ ଏହି ରାୟକୁ ବଳବତ୍ତର ରଖନ୍ତି ତାହେଲେ ଟ୍ରମ୍ପଙ୍କ ପାଇଁ ଏହା ବଡ଼ ଚେତାବନୀ ହେବ ।

ବିଦେଶ ସମ୍ପର୍କିତ ଅଧିକ ଖବର ପଢ଼ନ୍ତୁ