ଭେନେଜୁଏଲା ସଙ୍କଟକୁ ନେଇ ଜାତିସଂଘ ସୁରକ୍ଷା ପରିଷଦରେ ମୁହାଁମୁହିଁ ଦୁଇ ମହାଶକ୍ତି ଆମେରିକା ଏବଂ ଇରାନ। ଆମେରିକାର ସାମରିକ ଦାଦାଗିରି ବିରୋଧରେ ଇରାନ ଏବେ ନ୍ୟୁକ୍ଲିୟର ଧମକ ଦେଇ ସମଗ୍ର ବିଶ୍ୱକୁ ସ୍ତବ୍ଧ କରିଦେଇଛି । ଭେନେଜୁଏଲାରୁ ନିକୋଲାସ୍ ମାଦୁରୋଙ୍କୁ ଆମେରିକା ସେନା ଦ୍ୱାରା ବଳପୂର୍ବକ ଉଠାଇ ନେବା ଘଟଣା ଏବେ ଜାତିସଂଘ ସୁରକ୍ଷା ପରିଷଦରେ ଏକ ବଡ଼ ବିବାଦର ରୂପ ନେଇଛି ।

ଜାତିସଂଘରେ ଏହି ବିଷୟ ଉପରେ ଚାଲିଥିବା ଆଲୋଚନା ସମୟରେ ଇରାନର ପ୍ରତିନିଧି ଆମେରିକାକୁ ତୀବ୍ର ସମାଲୋଚନା କରିଛନ୍ତି। ଇରାନ ଅଭିଯୋଗ କରିଛି ଯେ ଆମେରିକା ଏକ ସାର୍ବଭୌମ ଦେଶର ଗଣତନ୍ତ୍ରକୁ ହତ୍ୟା କରୁଛି। ପରିସ୍ଥିତି ଏପରି ହୋଇଛି ଯେ, ଇରାନ ନିଜର ଆଣବିକ କାର୍ଯ୍ୟକ୍ରମକୁ ତେଜିବା ସହ ଆମେରିକାର ପଦକ୍ଷେପ ବିରୋଧରେ ନ୍ୟୁକ୍ଲିୟର କାର୍ଯ୍ୟାନୁଷ୍ଠାନର ସଂକେତ ଦେଇଛି । ଇରାନର ଏହି ଆଭିମୁଖ୍ୟ ବିଶ୍ୱ ରାଜନୀତିରେ ଉତ୍ତେଜନାକୁ ଶିଖରରେ ପହଞ୍ଚାଇ ଦେଇଛି, ଯେଉଁଠାରେ ଋଷ ଏବଂ ଚୀନ୍ ମଧ୍ୟ ଇରାନ ସହ ସ୍ୱର ମିଳାଇଛନ୍ତି।

ଅନ୍ୟପଟେ ଏବେ କୁହାଯାଉଛି ଭେନେଜୁଏଲା ରାଷ୍ଟ୍ରପତିଙ୍କୁ ଅପହରଣ ପରେ ଏବେ ଆମେରିକା ଖୋଜୁଛି ଖାମେନିଙ୍କୁ। ତାଙ୍କୁ ଅପହରଣ କରିବାକୁ ପ୍ଲାନ କରୁଛନ୍ତି ଡୋନାଲ୍ଡ ଟ୍ରମ୍ପ। ବିଶେଷଜ୍ଞଙ୍କ ଅନୁମାନ ଯେ, ୱାଲି-ଏ-ଆମର କେବଳ ଏକ ସୁରକ୍ଷା ବାହିନୀ ନୁହେଁ, ବରଂ ଇରାନର ଶକ୍ତିର ମେରୁଦଣ୍ଡ। ଯଦି ଖାମେନିଙ୍କ ସହିତ କିଛି ହୁଏ, ତେବେ ଏହି ବାହିନୀ କ୍ଷମତା ପରିବର୍ତ୍ତନକୁ ଶୀଘ୍ର ଏବଂ ନିୟନ୍ତ୍ରିତ ଉପାୟରେ ପରିଚାଳନା କରିବ। ଏହି କାରଣରୁ, ଯଦି ଏହା ଆମେରିକା ହୋଇଥାନ୍ତା, ତେବେ ତେହେରାନରେ ଅନୁପ୍ରବେଶ କରିବା ଏବଂ ଖାମେନିଙ୍କୁ ବନ୍ଦୀ କରିବା କାଗଜରେ ଯେତିକି ସହଜ ମନେ ହେବ, ଭୂମିରେ ସେତିକି ଅସମ୍ଭବ ମନେ ହେବ।

ସେପଟେ ଆମେରିକା ସେନା ଦ୍ୱାରା ଗିରଫ ହେବା ପରେ ନିକୋଲାସ୍ ମାଦୁରୋଙ୍କୁ ନ୍ୟୁୟର୍କର ମାନହାଟନ୍ ଫେଡେରାଲ୍ କୋର୍ଟରେ ହାଜର କରାଯାଇଛି। ସେଠାରେ ତାଙ୍କ ବିରୋଧରେ ଡ୍ରଗ୍ସ ଚାଲାଣ ଏବଂ ଦୀର୍ଘ ଦଶନ୍ଧି ଧରି ଆମେରିକାକୁ ବିଷାକ୍ତ ନିଶାଦ୍ରବ୍ୟ ପଠାଇବାର ଗୁରୁତର ଅଭିଯୋଗ ଲଗାଯାଇଛି। କୋର୍ଟରେ ମାଦୁରୋ ନିଜକୁ ନିର୍ଦ୍ଦୋଷ ବୋଲି ଦାବି କରିବା ସହ ଏହାକୁ ଏକ ରାଜନୈତିକ ଷଡ଼ଯନ୍ତ୍ର ବୋଲି କହିଛନ୍ତି।

ତେବେ ତାଙ୍କୁ ଜାମିନ ମିଳିନାହିଁ ଏବଂ ସେ ବର୍ତ୍ତମାନ ଆମେରିକା ଜେଲରେ ରହିବେ। ଏହି ଘଟଣା ପରେ ଭେନେଜୁଏଲାରେ ତାଙ୍କ ସମର୍ଥକମାନେ ଉତ୍ତ୍ୟକ୍ତ ହୋଇପଡ଼ିଛନ୍ତି । ଏହାରି ଭିତରେ କାରାକାସରେ ପୁଣି ଥରେ ଭୟଙ୍କର ଗୁଳିକାଣ୍ଡ ଓ ଅଶାନ୍ତି ଦେଖାଦେଇଛି। ଡେଲସି ରୋଡ୍ରିଗୁଏଜ୍ କ୍ଷମତା ସମ୍ଭାଳିଥିଲେ ମଧ୍ୟ ସାମରିକ ସମର୍ଥନକୁ ନେଇ ଦ୍ୱନ୍ଦ୍ୱ ଜାରି ରହିଛି ।