ବାଉଳା ହେଲେଣି ଟ୍ରମ୍ପ । ଶାନ୍ତି ନୋବେଲ ପାଇଁ ଦିନେ ଜିଦି କରୁଥିବା ନେତା, ଆଜି ରାଗରେ ରକ୍ତ ଚାଉଳ ଚୋବାଉଛନ୍ତି । ୟାକୁ ମାରିବି ତାକୁ ମାରିବି କହି ସାରା ବିଶ୍ୱରେ ଉତ୍ପାତ ଆରମ୍ଭ କରିଛନ୍ତି । ତେଣୁ ଏବେ ପୂରା ବିଶ୍ୱ ଟ୍ରମ୍ପଙ୍କ କାର୍ଯ୍ୟକଳାପ ପ୍ରତି ଅସନ୍ତୋଷ ପ୍ରକାଶ କରିଛି । ଅନ୍ୟପଟେ କିଛି ନେତା ସିଧା ସଳଖ ଭାବେ ଟ୍ରମ୍ପଙ୍କୁ ଧମକ ଦେଲେଣି । ଆଉ ଏହାରି ଭିତରେ ଟ୍ରମ୍ପ ଆଉ ଏକ ବଡ଼ ନିଷ୍ପତ୍ତି ନେଇଛନ୍ତି ।

ଆମେରିକାକୁ ନୋ ଏଣ୍ଟ୍ରି ବୋର୍ଡ ଲଗାଇଛନ୍ତି ଟ୍ରମ୍ପ । ଜାନୁଆରୀ ୨୧ ରୁ ଋଷ, ଇରାନ, ଆଫଗାନିସ୍ତାନ, ବ୍ରାଜିଲ ସମେତ ୭୫ଟି ଦେଶ ପାଇଁ ଭିସା ବନ୍ଦ କରିଛି ଆମେରିକା । ଆମେରିକାର ବୈଦେଶିକ ମନ୍ତ୍ରାଳୟ ପକ୍ଷରୁ ଅନିର୍ଦ୍ଦିଷ୍ଟ କାଳ ପାଇଁ ଭିସା ବିରତି ଆରମ୍ଭ ହେବାକୁ ଯାଉଛି । କନସୁଲାର ଅଧିକାରୀମାନଙ୍କୁ ଭିସା ଆବେଦନ ପ୍ରତ୍ୟାଖ୍ୟାନ କରିବାକୁ ୟୁଏସ ଷ୍ଟେଟ ଡିପାର୍ଟମେଣ୍ଟ କଡ଼ା ନିର୍ଦ୍ଦେଶ ଦେଇଛି ।

ସମୀକ୍ଷା ସମୟରେ କନସୁଲାର ଅଧିକାରୀମାନେ 'ପବ୍ଲିକ୍ ଚାର୍ଜ' ନିୟମକୁ ଅଧିକ କଠୋର ଭାବରେ ଲାଗୁ କରିବେ । ଏହି ପଦକ୍ଷେପ, ସୋମାଲିଆ, ରୁଷିଆ, ଆଫଗାନିସ୍ତାନ, ବ୍ରାଜିଲ, ଇରାନ, ଇରାକ, ମିଶର, ନାଇଜେରିଆ, ଥାଇଲ୍ୟାଣ୍ଡ, ୟେମେନ ସମେତ ୭୫ ଦେଶ ପାଇଁ ପ୍ରଯୁଜ୍ୟ । ଏଯାଏ ଭିସା ରଦ୍ଦ ହେବାକୁ ଯାଉଥିବା ଦେଶର ସମ୍ପୂର୍ଣ୍ଣ ତାଲିକା ଜାରି ହୋଇନାହିଁ । ରାଷ୍ଟ୍ରପତି ଟ୍ରମ୍ପ ଇମିଗ୍ରେସନ ଆଇନର 'ସାର୍ବଜନୀନ ଚାର୍ଜ' ବ୍ୟବସ୍ଥାକୁ ଅଧିକ କଠୋର କରିବାକୁ ନିର୍ଦ୍ଦେଶ ଦେଇଛନ୍ତି ।

ସେପଟେ ହୁତୁହୁତୁ ଜଳୁଛି ଇରାନ । ଟ୍ରମ୍ପଙ୍କ ସାମ୍ରାଜ୍ୟବାଦ ନୀତିକୁ ନେଇ ବିଶ୍ଵରେ ଘମାସାନ । ମାଦୁରୋଙ୍କ ପରେ ୟୁଏସ ଟାର୍ଗେଟରେ ଇରାନ ସୁପ୍ରିମ ଲିଡର ଖାମେନେଇ । ଭେନେଜୁଏଲା ପରେ କ୍ୟୁବାରେ ବି ଶାସନ ପରିବର୍ତ୍ତନର ସ୍ପଷ୍ଟ ସଂକେତ । ଏବେ ଟ୍ରମ୍ପଙ୍କ ଟାର୍ଗେଟରେ ଗ୍ରୀନଲ୍ୟାଣ୍ଡ ଓ ତେହେରାନ ।

ରାଜରାସ୍ତାରେ ଉଗ୍ର ହେଉଛି ଉତ୍ୟକ୍ତ ଯୁବପିଢ଼ିଙ୍କ ଆକ୍ରୋଶ । ଏପଟେ ଇରାନୀ ଯୁବକଙ୍କୁ ପ୍ରଦର୍ଶନରେ ସାମିଲ ହେବାକୁ ଅପିଲ କରିଛନ୍ତି ନିର୍ବାସିତ କ୍ରାଉନ ପ୍ରିନ୍ସ ରଜା ପହଲବୀ । ଗତବର୍ଷ ଡିସେମ୍ବର ୨୮ରୁ ଆରମ୍ଭ ହଇଥିବା ହିଂସାତ୍ମକ ପ୍ରଦର୍ଶନରେ ବର୍ତ୍ତମାନ ସୁଦ୍ଧା ୨ ହଜାରରୁ ଅଧିକ ମୃତ୍ୟୁ ହୋଇଥିବା ବେଳେ ପରିସ୍ଥିତିକୁ ନେଇ ନୂଆ ଚକ୍ରବ୍ୟୁହ ରଚିଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ।

ଭେନେଜୁଏଲା ରାଷ୍ଟ୍ରପତି ନିକୋଲାସ ମାଦୁରୋଙ୍କ ପରି ଇରାନ ସୁପ୍ରିମଲିଡର ଆୟାତୋଲା ଅଲି ଖାମେନେଇଙ୍କୁ ଉଠାଇ ନେବାକୁ ଯୋଜନା ପ୍ରସ୍ତୁତ ହୋଇସାରିଥିବା ବିଶ୍ଵବ୍ୟାପୀ ଚର୍ଚ୍ଚା ଜୋର ଧରିଛି । ଟ୍ରମ୍ପଙ୍କ ବୟାନରୁ ମଧ୍ୟ ଏହାର ସଂକେତ ମିଳିସାରିଛି । ଟ୍ରମ୍ପ ଗୋଟିଏ ପଟେ ନାଗରିକ ଅଧିକାର ନେଇ ଇରାନୀ ଯୁବକଙ୍କୁ ଉତ୍ତେଜିତ କରିବା ସହ ନିଜ ଦୂତଙ୍କ ସହାୟତାରେ କ୍ରାଉନ ପ୍ରିନ୍ସଙ୍କ ସହ ବଢ଼ାଉଛନ୍ତି ସମ୍ପର୍କ ।