ସାରା ବିଶ୍ୱରେ ଅନେକ ଛୋଟ ବଡ଼ ମନ୍ଦିର ରହିଛି । ପ୍ରତ୍ୟେକ ମନ୍ଦିରର ନିଜସ୍ୱ ଇତିହାସ ଅଛି ଏବଂ ସେଠାରେ ହେଉଥିବା ରୀତିନୀତି ମଧ୍ୟ ଅନନ୍ୟ । ତଥାପି କେତେକ ମନ୍ଦିରର ପରମ୍ପରା ଏତେ ଭିନ୍ନ ଯେ ସାଧାରଣ ମଣିଷ ସେ ବିଷୟରେ ଥରେ ଚିନ୍ତା କରିବାକୁ ବାଧ୍ୟ ହେବ । ଆପଣ ଅନେକ ମନ୍ଦିର ବିଷୟରେ ଶୁଣିଥିବେ, କିନ୍ତୁ ଏପରି ଏକ ମନ୍ଦିର ବିଷୟରେ ଜାଣିଛନ୍ତି କି ଯାହାକୁ ଛାଡ଼ପତ୍ର ମନ୍ଦିର କୁହାଯାଏ । ଏପରିକି ଏହାର ନାମ ଡିଭୋର୍ସ ଟେମ୍ପଲ ବା ଛାଡପତ୍ର ମନ୍ଦିର ।

ଛାଡ଼ପତ୍ର ନାମ ଶୁଣି ଏପରି ଲାଗୁଥିବ ଏ ମନ୍ଦିରରେ ଦମ୍ପତିଙ୍କ ମଧ୍ୟରେ ଛାଡ଼ପତ୍ର ହେଉଥିବ କିମ୍ବା ସମ୍ପର୍କ ଶେଷ ହୋଇଯାଉଥିବ । ହେଲେ ଏହି ମନ୍ଦିରର ଇତିହାସ ପ୍ରାୟ ୭୦୦ ବର୍ଷ ପୁରୁଣା ଆଉ ଏଠାରେ କେହି ଛାଡପତ୍ର ନିଅନ୍ତି ନାହିଁ । ବର୍ତ୍ତମାନ ଆପଣ ନିଶ୍ଚିତ ଭାବରେ ଭାବୁଥିବେ ଯଦି ଏହି ମନ୍ଦିରରେ ଛାଡପତ୍ର ହୁଏନି, ତେବେ ନାମ ଛାଡପତ୍ର ମନ୍ଦିର କାହିଁକି ରଖାଗଲା? ଆସନ୍ତୁ ଏ ମନ୍ଦିରର ଇତିହାସ ସମ୍ପର୍କରେ ଜାଣିବା...

ଛାଡପତ୍ର ମନ୍ଦିର ଜାପାନର କାନାଗାୱା ପ୍ରଦେଶରେ ଅବସ୍ଥିତ । କାନାଗାୱା ଜିଲ୍ଲାର କାମାକୁରା ସହରସ୍ଥିତ ମତସୁଗାଓକା ତକୋଇ ମନ୍ଦିର ଛାଡପତ୍ର ମନ୍ଦିର ଭାବରେ ଜଣାଶୁଣା । ଏହି ମନ୍ଦିର ପ୍ରାୟ ୭୦୦ ବର୍ଷ ପୁରୁଣା । ଏହି ମନ୍ଦିରର ଇତିହାସ ମହିଳାମାନଙ୍କ ସହିତ ଜଡିତ । ଯେଉଁ ମହିଳାମାନଙ୍କର କେହି ନଥିଲେ ସେମାନଙ୍କୁ ଏହି ମନ୍ଦିରରେ ଆଶ୍ରୟ ଦିଆଯାଉଥିଲା । ଏହା ବ୍ୟତୀତ ଯେଉଁମାନେ ଘରୋଇ ହିଂସାର ଶିକାର ହେଉଥିଲେ, ସେମାନଙ୍କ ପାଇଁ ଏହି ମନ୍ଦିର ହିଁ ଘର ଥିଲା । ଯେଉଁଠି ସେ ନିଜକୁ ସୁରକ୍ଷିତ ଓ ନିରାପଦ ମନେ କରୁଥିଲେ ।

କିମ୍ବଦନ୍ତୀ ଅନୁଯାୟୀ, ପ୍ରାୟ ୭୦୦ ବର୍ଷ ତଳେ କାକାସୁନି ନାମ୍ନୀ ଜଣେ ମହିଳା ନିଜ ସ୍ବାମୀ ଦ୍ୱାରା ନିର୍ଯାତିତ ହେଉଥିଲେ । ସେତେବେଳର ସାମାଜିକ ନିୟମ ଅନୁଯାୟୀ, କାକାସୁନ୍ ତାଙ୍କ ସ୍ବାମୀଙ୍କୁ ଛାଡ଼ପତ୍ର ଦେଇପାରୁ ନଥିଲେ । ତେଣୁ ସେ ଏହି ମନ୍ଦିରରେ ରହିବାକୁ ଲାଗିଲେ । ଏହା ପରଠାରୁ ସ୍ବାମୀଙ୍କ ଠାରୁ ନିର୍ଯାତିତ ହୋଇଥିବା ଅନେକ ମହିଳା ଏହି ମନ୍ଦିରରେ ଆଶ୍ରୟ ନେଇଥିଲେ । ୩ ବର୍ଷ ଧରି ମନ୍ଦିରରେ ରହିବା ପରେ ସେମାନଙ୍କୁ ଛାଡ଼ପତ୍ର ମିଳିପାରୁଥିଲା । ତେବେ ପରେ ଏହି ସମୟ ସୀମାକୁ ହ୍ରାସ କରାଯାଇ ୨ ବର୍ଷ କରାଯାଇଥିଲା ।

Argus News | argus news | Odisha Latest News, Breaking News, Trending News, Live TV