ଆଜି ପୁଣି ଫଟାଫଟ କ୍ରିକେଟର ମଜା ନେବେ କ୍ରୀଡ଼ାପ୍ରେମୀ । ଭାରତ-ପାକିସ୍ତାନ ଯୁଦ୍ଧ ସ୍ଥିତି ପାଇଁ ସ୍ଥଗିତ ଥିବା ଆଇପିଏଲ ଆଜିଠାରୁ ପୁଣି ଆରମ୍ଭ ହେବାକୁ ଯାଉଛି । ଆଇପିଏଲ୍‌ର ଦ୍ବିତୀୟ ପର୍ଯ୍ୟାୟ କୋଲକାତା ନାଇଟ୍ ରାଇଡର୍ସ ଏବଂ ରୟାଲ ଚାଲେଞ୍ଜର୍ସ ବେଙ୍ଗାଲୁରୁ ମ୍ୟାଚ୍‌ରୁ ଆରମ୍ଭ ହେବ । ଆଇପିଏଲ ୨୦୨୫ର ବାକି ମ୍ୟାଚ ୬ଟି ସହରରେ ଯଥା ବେଙ୍ଗାଲୁରୁ, ଜୟପୁର, ଦିଲ୍ଲୀ, ଲକ୍ଷ୍ମୌ, ମୁମ୍ବାଇ ଓ ଅହମ୍ମଦାବାଦରେ ଖେଳାଯିବ । ମେ’ ୨୯ରେ କ୍ୱାଲିଫାୟର ଏବଂ ମେ’ ୩୦ରେ ହେବ ଏଲିମିନେଟର ମ୍ୟାଚ ।

ଜୁନ ୧ରେ କ୍ୱାଲିଫାୟର-୨ ମ୍ୟାଚ ପରେ ଜୁନ ୩ ତାରିଖରେ ଫାଇନାଲ ମ୍ୟାଚ ଖେଳାଯିବ । ପ୍ଲେ-ଅଫ୍ ର ମ୍ୟାଚ୍ କେଉଁ ସ୍ଥାନରେ ଖେଳାଯିବ ସେ ନେଇ ପରବର୍ତ୍ତୀ ସମୟରେ ଘୋଷଣା ହେବ ବୋଲି BCCI ପକ୍ଷରୁ କୁହାଯାଇଛି । ସେହିଭଳି ଗ୍ରାଣ୍ଡ ଫାଇନାଲ୍ କୋଲକାତା କିମ୍ବା ଅହମଦାବାଦରେ ଖେଳାଯିବ ବୋଲି ଅନୁମାନ କରାଯାଉଛି ।

ଦ୍ବିତୀୟ ପର୍ୟ୍ୟାୟ ଆଇପିଏଲରେ ଇଂଲଣ୍ଡ ଖେଳାଳି ଡୋଫ୍ରା ଆର୍ଚର, ଜେମୀ ଓଭରଟନ, ସେମ କରଣ ବାକି ମ୍ୟାଚ ଖେଳିବାକୁ ଭାରତ ଫେରିବେ ନାହିଁ । କିନ୍ତୁ ଜୋଶ ବଟଲର, ବିଲ ଜ୍ୟାକବ୍ସ, ଲିୟାମ ଲିଭିଙ୍ଗଷ୍ଟୋନ ଓ ଜେକବ ବେଥଲ ସହିତ ଅନ୍ୟ ଖେଳାଳୀ ଭାରତ ଆସିବାକୁ ସମ୍ମତି ଜଣାଇ ସାରିଛନ୍ତି । ଭାରତ-ପାକିସ୍ତାନ ସୀମାରେ ଉତ୍ତେଜନା ଯୋଗୁଁ ମେ ୯ ତାରିଖରେ ଆଇପିଏଲ୍ ଏକ ସପ୍ତାହ ପାଇଁ ସ୍ଥଗିତ ହୋଇଥିଲା । ଧର୍ମଶାଳାରେ ପଞ୍ଜାବ କିଙ୍ଗସ୍ ଓ ଦିଲ୍ଲୀ କ୍ୟାପିଟାଲ୍ସ ମଧ୍ୟରେ ଖେଳାଯାଉଥିବା ମ୍ୟାଚ୍ ସୁରକ୍ଷା କାରଣରୁ ଅଧାରୁ ବନ୍ଦ ହୋଇଥିଲା ।