କଥାରେ ଅଛି ଯେଉଁ ତରକାରୀରେ ଆଳୁ ପଡ଼ିନଥାଏ, ତାହା ଏତେ ସ୍ୱାଦିଷ୍ଟ ଲାଗିନଥାଏ। ଆଳୁ ଆମ ନିତିଦିନିଆ ଖାଦ୍ୟରେ ସବୁଠାରୁ ଅଧିକ ବ୍ୟବହାର କରାଯାଏ। ଘରର ଖାଦ୍ୟ ହେଉ କିମ୍ବା ବାହାରର ଖାଦ୍ୟ। ଆଳୁ ବହୁତ ବ୍ୟବହାର କରାଯାଏ। କିନ୍ତୁ ଆପଣ ଜାଣନ୍ତି କି ଆଳୁ ଖାଇବା ଆପଣଙ୍କ ସ୍ବାସ୍ଥ୍ୟ ପାଇଁ କେତେ କ୍ଷତିକାରକ ହୋଇପାରେ? ସାଧାରଣତଃ, ଘରେ ବହୁତ ଆଳୁ ସାଇତା ହୋଇ ରଖାଯାଏ। ଏଥିରେ ବିଭିନ୍ନ ପ୍ରକାରର ଆଳୁ ଥାଏ। କିନ୍ତୁ ଏଥିରେ ଥିବା ୨ ପ୍ରକାରର ଆଳୁ ସ୍ବାସ୍ଥ୍ୟ ପାଇଁ ହାନିକାରକ ବୋଲି ବିଶେଷଜ୍ଞମାନେ କହିଛନ୍ତି। ବିଶେଷଜ୍ଞଙ୍କ ମତରେ, ସବୁଜ ଆଳୁ ଏବଂ ଗଜା ହୋଇଥିବା ଆଳୁରେ ‘ସୋଲାନିନ’ ନାମକ ବିଷାକ୍ତ ପଦାର୍ଥର ପରିମାଣ ବୃଦ୍ଧି ପାଏ।

ଯେତେବେଳେ ଆଳୁ ଦୀର୍ଘ ସମୟ ପର୍ଯ୍ୟନ୍ତ ଆଲୋକରେ ରହିଥାଏ ସେତେବେଳେ ଏହା ଘଟେ। ଏମିତି ଆଳୁ ଖାଇବା ଦ୍ୱାରା ବାନ୍ତି, ପେଟ ଯନ୍ତ୍ରଣା, ମୁଣ୍ଡବିନ୍ଧା, ଦ୍ରୁତ ହୃଦସ୍ପନ୍ଦନ କିମ୍ବା ଅନ୍ୟାନ୍ୟ ଅନେକ ଗମ୍ଭୀର ରୋଗ ହୋଇପାରେ। ଏହା ବ୍ୟତୀତ, ମୃତ୍ୟୁର ଆଶଙ୍କା ମଧ୍ୟ ହୋଇପାରେ। ଯଦି ଆଳୁରେ ସବୁଜ ଦାଗ ଅଛି କିମ୍ବା ଆଳୁ ଗଜା ହୋଇଛି, ଯାହାକୁ ଆଳୁର ଆଖି ମଧ୍ୟ କୁହାଯାଏ, ତେବେ ଭୁଲରେ ମଧ୍ୟ ଏପରି ଆଳୁ ଖାଆନ୍ତୁ ନାହିଁ।

ଏଗୁଡ଼ିକ ବିଷାକ୍ତ ଏବଂ ସ୍ବାସ୍ଥ୍ୟ ପାଇଁ କ୍ଷତିକାରକ। ଅନେକ ଲୋକ ପିଆଜ ସହିତ ଆଳୁ ରଖନ୍ତି। କିନ୍ତୁ ଏପରି ଭୁଲ କରନ୍ତୁ ନାହିଁ। ଯଦି ଆପଣଙ୍କ ପାଖରେ ଆଳୁର ପ୍ରଚୁର ପରିମାଣ ଅଛି, ତେବେ ଏହାକୁ ଠିକ ଭାବେ ରଖନ୍ତୁ ଏବଂ ଏଥିରୁ ଖରାପ ଗଜା ହୋଇଥିବା ଆଳୁକୁ ବାହାର କରନ୍ତୁ। ସର୍ବଦା ଥଣ୍ଡା, ଶୁଖିଲା ଏବଂ ଅନ୍ଧାର ସ୍ଥାନରେ ଆଳୁକୁ ସାଇତି ରଖନ୍ତୁ। ଏହାକୁ ଅଧିକ ଆଲୋକରେ ରଖିବାକୁ ଦିଅନ୍ତୁ ନାହିଁ।

Argus News | argus news | Odisha Latest News, Breaking News, Trending News, Live TV