ପ୍ରତ୍ୟେକ ବାପା-ମାଙ୍କର ଚିନ୍ତା ଥାଏ ତାଙ୍କ ଶିଶୁର ଯେପରି ଦେହ ସବୁବେଳେ ସୁସ୍ଥ ରହୁ । ଶିଶୁର ଯତ୍ନ ନେବା ସେମାନଙ୍କ ପାଇଁ ଖୁବ୍‌ ଗୁରୁତ୍ୱପୂର୍ଣ୍ଣ । ଖାସ୍ କରି ପ୍ରଥମ ଥର ବାପା-ମା’ ହୋଇଥିବା ଦମ୍ପତ୍ତିଙ୍କ ମନରେ ପିଲାର ଲାଳନପାଳନକୁ ନେଇ ଅନେକ ପ୍ରଶ୍ନ ଉଠିଥାଏ । ସେମିତି ଏକ ପ୍ରଶ୍ନ ହେଉଛି ଶିଶୁର ଡାଇପର୍‌ କେତେ ସମୟରେ ବଦଳିବା ଜରୁରି? ଆଜିକାଲି ଦୁନିଆରେ ଡାଇପର ପ୍ରତ୍ୟେକ ଘର ପାଇଁ ଖୁବ୍‌ ଦରକାର ଜିନିଷ ହୋଇପଡିଛି । ବିଶେଷକରି ନବଜାତକଙ୍କଠାରୁ ଆରମ୍ଭ କରି ଛୋଟ ଶିଶୁଯାଏ ଡାଇପର ବାପାମା’ଙ୍କ ଜୀବନକୁ ସହଜ କରି ଦେଇଛି । କିନ୍ତୁ ସେମାନଙ୍କ ମନରେ ଗୋଟିଏ ପ୍ରଶ୍ନ ନିଶ୍ଚୟ ଆସିଥାଏ ଯେ ଶିଶୁକୁ ଗୋଟିଏ ଡାଇପର କେତେ ସମୟ ଯାଏ ପିନ୍ଧାଇବା ଉଚିତ୍‌ ।

ଡାଇପରର ଉଚିତ୍‌ ବ୍ୟବହାର ପିଲାର ନିଦ ଓ ସ୍ୱାସ୍ଥ୍ୟ ଉଭୟ ପାଇଁ ଲାଭଦାୟକ ହୋଇଥାଏ । ଦୀର୍ଘ ସମୟର ଯାତ୍ରା, ରାତିରେ ଶୋଇବା ଓ ବାହାରକୁ ବୁଲାବୁଲି ପାଇଁ ଯିବା ସମୟରେ ହିଁ ଡାଇପରର ବ୍ୟବହାର ବେଶି ଗୁରୁତ୍ୱପୂର୍ଣ୍ଣ । ଆବଶ୍ୟକଠାରୁ ଅଧିକ ସମୟ ଯାଏଁ ଶିଶୁକୁ ଡାଇପର ପିନ୍ଧାଇବା ଦ୍ୱାରା ରାସେସ୍‌, ତ୍ୱଚା ସଂକ୍ରମଣ ଓ ଆର୍ଦ୍ରତା ଯୋଗୁଁ ଜଳାପୋଡ଼ା ପରି ସମସ୍ୟା ସୃଷ୍ଟି ହୋଇଥାଏ ।

ଗୋଟିଏ ଡାଇପର କେତେ ସମୟ ପିନ୍ଧାଇବା ଉଚିତ୍‌
ଡାକ୍ତରଙ୍କ ଅନୁସାରେ ଗୋଟିଏ ଡାଇପରକୁ ୩/୪ ଘଣ୍ଟା ଭିତରେ ବଦଳାଇବା ଜରୁରି । ନବଜାତକଙ୍କ କ୍ଷେତ୍ରରେ ଗୋଟିଏ ଡାଇପରକୁ ୨-୩ ଘଣ୍ଟାରେ ଥରେ ବଦଳାଇବା ଆବଶ୍ୟକ । କାରଣ ସେମାନଙ୍କ ତ୍ୱଚା ଖୁବ୍‌ ସମ୍ବେଦନଶୀଳ । ତେଣୁ ଓଦା ଡାଇପର ଅଧିକ ସମୟ ରହିବା ଦ୍ୱାରା ରାସେସ୍‌ ଓ ସଂକ୍ରମଣ ହେବାର ଆଶଙ୍କା ଅଧିକ ରହିଥାଏ । ରାତିରେ ଶିଶୁକୁ ଲଗାତାର ଶୋଇ ରହିବା ପାଇଁ ବାରମ୍ବାର ଡାଇପର ବଦଳାଇବା ଦରକାର । ଶିଶୁର ତ୍ୱଚାକୁ ସୁସ୍ଥ ରଖିବା ପାଇଁ ଦିନରେ ଡାଇପର ହଟାଇବା ପରେ ଅଧାଘଣ୍ଟା ଯାଏଁ ବିନା ଡାଇପରରେ ଛାଡି ଦିଅନ୍ତୁ । ଏହି ସମୟରେ ଶିଶୁର ତ୍ୱଚା ନିଶ୍ୱାସପ୍ରଶ୍ୱାସ ନେବା ସହ ରାସେସ୍‌ର ସମ୍ଭାବନାକୁ କମ୍‌ କରିଥାଏ ।

ଅଧିକ ସମୟ ଡାଇପର ପିନ୍ଧାଇବା କେତେ କ୍ଷତିକାରକ?
ଦୀର୍ଘ ସମୟ ଯାଏଁ ଡାଇପର ପିନ୍ଧାଇବା ଦ୍ୱାରା ଶିଶୁର ତ୍ୱଚାରେ ରାସେସ୍‌, ଲାଲ୍‌ ଲାଲ୍‌ ଫଳିବା ଓ କୁଣ୍ଡାଇ ହେବା ପରି ସମସ୍ୟା ଉପୁଜିଥାଏ । ସେହିପରି ତ୍ୱଚା ଓଦା ରହିବା ଯୋଗୁ ବ୍ୟାକ୍ଟେରିଆ ଓ ଫଙ୍ଗସ୍‌ ତୀବ୍ର ବେଗରେ ବଢିଥାନ୍ତି । ଫଳରେ ଶିଶୁଠାରେ ୟୁରିନାରୀ ଟ୍ରାକ୍‌ ଇନ୍‌ଫେକ୍ସନ ହୋଇପାରେ । ଲଗାତାର ଡାଇପର ବ୍ୟବହାର କରିବା ଦ୍ୱାରା ଶିଶୁର ତ୍ୱଚାରେ ବାହାର ପବନ ନ ବାଜିବା ଯୋଗୁ ଜଳିବା ସହ କୁଣ୍ଡାଇ ହେବାର ଆଶଙ୍କା ବଢ଼ିଥାଏ ।